Na Tapunia Le Malumalu!

Na faatulaga le ma faaipoipoga i le malumalu mo le aso 7 o Iulai, 2009—o se aso sa ma tulimatai i ai ma le naunautai. O le ola ae e latalata i le Malumalu o Aba Nigeria, sa ma fiafia ai lava e ui ina matou siitia ese atu, ae o le toatele o uo ma tagata o aiga o loo nonofo pea i le eria o le a mafai ona matou faatasi a le o totonu i le malumalu po o se taumafataga mulimuli ane.

Sa ma taunuu i Aba ina ua maea se malaga e silia ma le ono itula mai Lagos ma faia a maua sauniuniga faaiu mo le ma faamauga ma le taumafataga. Peitai e tolu aso ao lei oo i le aso na atofaina mo le faaipoipoga, ae ta’u mai ia i maua ua tapunia faafuasei le malumalu sei toe fofogaina mai. Sa ma popole ma ua le mautonu. Sa le mafai e se tasi ona ta’u mai ia i maua po o afea e ono toe tatala ai le malumalu, lea ua tapunia ona o vevesiga i le eria. I le le fiafia, sa ma ta’u atu i uo ma aiga ua toe tolopo le ma faamauga, ma ua ma toe foi ma le faanoanoa i Lagos e aunoa ma le iloa po o afea e ono mafai ona toe seti ai se isi aso o le faamauga i le malumalu.

Ina ua ma taunuu atu i Lagos, sa ma tatalo faatauanau ina ia toe tatala le Malumalu o Aba Nigeria. Na tuanai atu le vaiaso e aunoa ma ni tala e uiga i se aso e toe tatala ai. O lenei vaiaso e tasi na foliga e pei ua tasi le tausaga ia i maua. Na ma tulimatai atu i la maua faaipoipoga i le malumalu ma le faamanatuina faatasi ma uo ma aiga i se taimi vave lava pe a talafeagai.

Ao alu pea le taimi e aunoa ma se tala e uiga i se aso e toe tatala ai, sa ma lagona loa e tatau ona ma toe mafaufau i se isi fuafuaga. Ona o le Malumalu o Aba Nigeria ua na o le pau lea o le malumalu i Nigeria, sa ma iloaina loa e tatau ona ma malaga i le Malumalu o Accra Ghana pe afai ma te mananao e faamauina i maua i se taimi vave lava. Ae paga lea, sa taugata le malaga mo i maua. Ae ua leva foi ona ma fuafua mo se faaipoipoga i le malumalu, ma e ma te iloa e tatau ona ma agai i luma.

Na nono mai se tupe mai aiga ma uo, na faia foi o maua tusifolau faavaomalo, valaau atu i le Malumalu o Accra Ghana e seti se aso, ma totogi o maua pasese i le vaalele e felelei ai i Ghana.

Sa ma taunuu i Accra i le aso 14 o Aokuso, 2009, ma sa ma o i le malumalu i le aso na sosoo ai. Sa na o le tagata e faia le faamauga ma molimau e toalua na matou faatasi i totonu o le potu o faamauga. E leai ni uo, leai se aiga, ma e leai ma se isi o ē sa matou faatasi, na ma iloaina. Ae peitai i se atunuu ma te le masani ai, i se eria e mamao ese mai o maua aiga, sa ma iloa o le nofoaga lea e tatau ona ma i ai, ma faia le mea e tatau ona ma faia. I lena lava taimi, sa ma lagonaina le mana o le faavavau ma malamalama atili manino ai i le alofa o le Tama Faalelagi mo i ma’ua ma mo Ana fanau uma.

O le tulaga e faanoanoa ai, na maliu lo’u toalua i le 2010 ina ua uma ona fanauina le tama muamua. Ou te matuai misia lava o ia ae ou te maua le mafanafana i le iloaina ua uma ona faamauina i ma’ua i le malumalu. Ou te faafetai ai pea e faavavau ma te lei tolopoina le ma faaipoipoga i le malumalu e ala i le faatali mo se taimi talafeagai. O le ma faaipoipoga o se mea ou te faapelepele i ai ma e aofia ai ma se tala ou te le faagaloina lava.