Fiafia i le Talalelei

Ina ua atoa lo’u 14, sa faafesagai la’u aoga ma le falesa o le Au Paia o aso e Gata Ai. Sa ou vaai i ni alii i ofutino papae o o i totonu ma o mai i fafo o lena fale tele. Sa ou mafaufau po o a ni mea o loo faia i totonu.

I se tasi aso sa matou mananao ai ma au uo matou te taaalo lakapi, ae sa leai se avanoa i le malae o la matou aoga. Na fai mai se tasi, “Tatou taaalo i le falesa. E i ai so latou nofoaga manaia i fafo e taaalo ai.” O la’u fesootaiga muamua lena ma le Ekalesia—i fafo o le falelotu.

O le lua tausaga mulimuli ane sa valaaulia ai e se tasi o uo a lo’u uso ia lo’u tuafafine la te o i le Lotu AAG, ma sa ou alu ai foi. Sa ou fiafia lava o le a mafai ona ou iloa mea o loo fai i totonu o lena falesa.

Ina ua matou taunuu iina, sa matou vaaia nisi o tagata o loo taaalo i se taaloga faigofie. Sa foliga fiafia tele i latou, ma sa ou matauina lena mea. “Aisea latou te fiafia ai?” Na ou mafaufau ai.

Sa ou iloaina ina ua fai au lesona e faifeautalai ma papatisoina. O le fiafia e sau mai totonu. O lo’u liua na suia ai lou olaga, olaga o la’u fanau, ma augatupulaga a sau ma ua mavae atu.

Po o le a lava sau mea o fai i fafo atu o aoaoga a le Ekalesia o le a le aumaia ia te oe le fiafia. Atonu o le a e ata ai po o sina taimi laitiiti o le fiafia, ae o le fiafia moni o totonu lea o le talalelei.

E tusa lava pe ulagia oe e au uo i nisi o taimi, ae o le a latou faamemelo ia te oe mo lou tu atu mo au mataupu faavae.

E alolofa ou matua ia te oe. Po o le a lava se mea la te fai mai ai ia te oe e le faapea ua la soona faia oe; ae ona la te fia puipui ia te oe.

Ia faafetai pea e le aunoa mo ou matua, le talalelei, ma le fiafia o loo aumaia ai i lou olaga.