Na Faataunuuina Lana Folafolaga

O le taimi o le sauniga tuufaatasi a le au perisitua ma le Aualofa i le 2009, na faamatala ai e lo matou taitai vaega o faitaulaga sili le naunautaiga a la matou au peresitene o le siteki mo tagata matutua uma e ave se igoa o le aiga i le malumalu i totonu o le tausaga. Sa ia faailoa mai ni polokalama a le siteki ma uarota e fesoasoani i tagata ina ia ausia lena sini. I lana faaiuga, na ia tuuina mai ai se folafolaga mausali e ala i le mana o lona valaauga i le polokalama o talafaasolopito faaleaiga faapea afai o le a tatou taumafai ina ia ausia le sini a le siteki, o le a tatou manuia.

Ina ua uma le sauniga sa ma talanoa ma lo’u toalua e uiga i le folafolaga ma ioeina ai e le faatatau lea ia te au; ua uma ona ma faaaluina le 40 tausaga e sailiili ai lala uma o le gafa o lo’u aiga. Sa faigata ona maua ou tuaa, ma e le’i tele se ma sailiiliga mo le tele o tausaga. Sa ma talitonu e le toe i ai se mea e mafai ona faia. Ae ui i lea, sa lagona pea i lo’u mafaufau le siuleo o le folafolaga a le taitai vaega mo ni nai aso mulimuli ane. Sa ou filifili loa e faataitai i lana folafolaga. Ao ou sioa atu i le pepa o faasologa o lo’u gafa, sa ou taumafai e mafaufau po o le a se mea e mafai ona ou faia.

Ina ua mavae le tolu aso o mafaufau ma le faaeteete, sa ou lagona le musuia e vaai i se nofoaga faapitoa mo faamatalaga e uiga i se tasi o tagata i le faaiuga o le laina o la’u pepa gafa. E itiiti ifo ma le afa aso sa ou sailiili ai i luga o le Initoneti, ma sa ou iloa ai sa i ai se isi tamaloa na sailia lena faaiu i le aulotu faa-Peretania. O se tasi o igoa sili ona lata mai na ia maua o le tagata lea e i le faaiuga o le laina o la’u gafa. O le faaaogaina o ana faamatalaga, na mafai ai ona faaauauina lo’u gafa i le isi lima augatupulaga—e oo i tua i le 1650—ma e aofia ai igoa o faaiu o le tele o tamaitai i lo’u gafa a o le’i faaipoipo, ma igoa o le tele o uso ma tuafafine. Sa ma ofo ma lo’u toalua ma sa ma fiafia.

Sa amata ona ou sailiili i se taimi mulimuli ane i faamatalaga i luga o le Initoneti e uiga i le tama o le tama a lou tama matua lea na foliga mai ua matuai leiloa lava. Ina ua uma se sailiga puupuu, sa ou mauaina o ia. Sa ou maua na siitia ese o ia mai Penisilevania, ISA ma o atu ai i Wisconsin, ISA, i se taimi mulimuli ane ae faatoa uma le maliu o lona faletua muamua. Faatasi ai ma faamaumauga a Wisconsin, sa ou faaopoopoina le silia ma le 400 igoa i le talafaasolopito o lo’u aiga.

Sa ou iloaina mulimuli ane e 100 ou tuaa na tau i Taua a le Lotoifale o Amerika. Sa ou maua ni tupulaga se ono e oo i le 1600.

O le vaitaimi muamua e 40 tausaga o a’u sailiiliga, sa ou faamaumauina pe a ma le 65 igoa i la’u pepa gafa o gafa ma e toeitiiti 3,000 igoa o loo faila i la’u komepiuta. O le 20 masina talu ona mavae le folafolaga a la’u taitai vaega o faitaulaga sili, sa ou faaopoopoina le silia ma le 70 igoa i lau pepa o gafa ma e sili atu ma le 17,000 igoa i totonu o faila i la’u komepiuta, e aofia ai ma peresitene o le Iunaite Setete e toalua.

Na fetalai mai le Alii ia i tatou o Lana upu “o le a faataunuuina lava, pe fai atu i lo’u lava leo po o le leo o a’u auauna, ua tusa lava ia” (MFF 1:38). E moni, o le folafolaga a le Tama Faalelagi, na tuuina mai e ala atu i se taitai perisitua musuia ua faamaonia, na faataunuuina lava.