Sa Ou Suia lo’u Mafaufau

Sa 21 ou tausaga ma o a’u e pule i le isi vaega o se fale oti ulu. Sa ou faiaoga i se vasega Peraimeri i le lotu. Sa lelei lo’u olaga, ae sa ou lagona le le onosai. Na foliga mai sa i ai se isi mea sa manaomia ou te faia—ae ou te le iloa po o le a.

Sa valaauina au e lo’u epikopo i totonu o lona ofisa i se tasi Aso Sa ma fesili mai ia te au pe na ou mafaufau e auauna atu i se misiona. Sa matuai ou le’i saunia lava. E na o le lua tausaga talu ona avea au ma se tagata o le Ekalesia ma e ou te lei mafaufau lava e auauna atu i se misiona.

Sa ou tau atu i le epikopo ou te le manatu e fetaui se misiona mo a’u. Ao ou aluese mai lona ofisa, na fai mai o ia, “Ia, afai e sui lou mafaufau, ta’u mai ia te au.” Sa ou mafaufau ua tapunia le autu, ae na faaauau pea ona toe faalogoina i lo’u mafaufau ia upu a le epikopo.

Sa ou fesiligia au lava pe faapefea ona ou auauna atu i se misiona. Sa na o au lava le tagata o lou aiga e auai i le Ekalesia. Pe faapei ni lagona o lo’u aiga? O le a se mea e mafai ona ou faia i la’u vaega o le fale oti ulu? Pe mafai ona ou gafatia le auauna atu mo se tausaga ma le afa?

Ao ou mafaufau i nei fesili, sa musuia au e faitau le Tusi a Mamona. Sa ou aumaia i luga ma sue i le mataupu e valu o le Alema. Ao ou faitau e uiga ia Alema ma Amoleka ma le i ai ia la’ua misiona, sa ou iloa sa ou manaomia foi ona “talai atu le afioga a le Atua” (fuaiupu e 30). Sa ou tauina atu i lo’u epikopo i le Aso Sa na sosoo ai ua suia lo’u mafaufau ma ua ou manao e auauna atu i se misiona.

Sa fesoasoani lo’u aiga, ma sa mafai ona faatau atu la’u vaega o le fale oti ulu. Sa ou faamisiona i Caracas, Venesuela, ma o loo faaauau pea ona ou seleseleina ia faamanuiaga o le auauna atu ma le mamalu i le Alii.