Tasi le Upu ma se Lesona o le Olaga Atoa

Sa matuai vevela lava fafo e 115 tikeri F (46˚C), o se tulaga masani ai mo se aso o le taumafanafana i fafo i le faatoaga i Brawley, Kalefonia, ISA. Sa ou kikiina le pa’u o le lolivai lapoa lea ua faatolu ona leaga i aso e fa. Sa ou faalagolago i la’u galuega o le taumafanafana e totogiina mea tau faafiafiaga, ofu aoga, ma faaiu ai lava i le kolisi. E ui i le vevela, ae ou te ita tele pe a ou vave manava, peitai e foliga mai o le a faapea foi ona tatau ona ou vave manava.

Na savali mai Tavita, o se tagata o la matou uarota ma o se uo faaleaiga, mai le fale gaosimea e vaai i le loli. O le faailoaina atu o lou le fiafia ia te ia, sa faaosoosoina au e fai atu se upu sa ou faalogo i isi o faaaogaina pe a lē fiafia. Ae ou te lei lafo atu le upu, na oo mai se manatu i lou mafaufau e le tatau ona ou faia aua ou te iloa o se upu e le lelei. Peitai i se taimi vave lava, sa ou lē amana’iaina, ma mafaufau e leai lava se tasi o le a iloaina. Sa ou faia le upu, ae ou te lei maua ai se lagona lelei.

Ina ua tilotilo mai i luga, ma fai mai David o le a la faia ma Tamā le loli pe a la mafaia. Ae i le taimi nei, ua ou maua isi galuega e fai mo le vaega o totoe o le aso.

Na ou oso atu i totonu o le loli a Tama i le faaiuga o le aso, ma amata le ma tietiega i le fale. E lei leva ona ma o i le auala, ae tilotilo mai Tama ia te au ma fai mai na tau atu e David ia te ia ou uiga na faaalia i le leaga o le loli, o la’u paulauvale ma mea uma lava. “Fai mai David na te lei mafaufauina e faalogo i se upu faapena o tautala i ai so’u afafine,” o le tala lea a Tama. “E na te faaaloalo tele ia te oe, lau pele.”

Sa faatautau lo’u ulu, ma na vave ona oo mai ou loimata. Sa ou faamaualaloina au lava i vaaiga a tagata o e sa ou popole tele i o latou manatu. Ae o le sili o ia mea uma, sa ou lagona le faanoanoa ia te au lava ia ma na ou iloa e faapena foi le Atua. Sa ou iloaina ai o le ala lea sa ou le maua ai se lagona lelei ina ua ou faia lena upu.

Sa ou faia se folafolaga ou te le toe faia lava se upu po o soo se mea lava e le fiafia i ai le Atua, e le faapea ona ou te le fia manao e maasiasi tamā ma David ia te au ae ona o se mea sa’o e fai. Sa ou aoaoina, o le amiosa’o o le auala lea e te amio ai pe a e mafaufau e leai se tasi o loo tilotilo atu.