E Mena Ikekei

Ngke e tokara ana 11 n ririki temanna mai ibuakoia natira mwaane, e uti ma te maraki n atu ae korakora. N te moan tai I taku bwa e taotaobong nakona n reirei, ma I a waekoa ni kunea bwa e korakora biuana. I a uotia nakon te taokita, ao n te tai ae waekoa ti a kawaekoaira nakon te onaoraki. Ikanne ao e a kuneaki te aoraki irouna ae te spinal meningitis, te aoraki ae rangin korakora.

Ngkai e a nang moanna n rangin korakora aorakina, e a moanna n reke irouna te katikitiki. E tuangai te taokita bwa N na otinako man te ruu. Ngke I nakonako inanon kawain te onaoraki, I a maku ao I a tang. Temanna te aine ae I aki kinaa e katoka baina iaou n rabwatai. I tataro ni kabaibaiti bwa e na buoka natiu te mwaane te Atua ao a na nakoraoi bwaai ni kabane. I uringnga au namakin bwa bwaai ni kabane a na nakoraoi

E rinanon te korokoro natiu te mwaane ao e bane wiiki aika a bati ni kamarurungakina. I uringnga te namakin ae korakora n rau. Te taneiai aei bon te katoto nakoiu ibukin mwakan te tataro.

Iai anenen te Buraimwaari ae atunaki “Ana Tataro te Ataei.” E taekina te titiraki, “Tamara are i Karawa, ko mena raoi ikanne? Ao ko ongo ao ni kaekai aia tataro ni kabane ataei?” Aia Boki n Anene Ataei

Ao te kaeka e bon koaua raoi: eng, E ongo.

Ngkana ko kan ataia bwa e maiu Tamara are i Karawa, ngkanne aio te tai ni katorobubua ao ni bubuti, “Tamara are i Karawa, Ko bon mena ikanne? I maeka ma Ngkoe imwain ae I roko nako aon te aba? I kona ni manga oki ni manga maeka ma Ngkoe?”

E na kaeka am tataro. E na kaongoko ae E mena ikekei. Ko aki kona n tiku ni maroaa. Ti kainnanoia ni katoa aoa, ao E mena ikekei ibukira.