Bwaina te Kakaonimaki

Ngke I tokara au kauabwi tabun n ririki, I ira te ukeuke ae moan te kanganga n rin inanon te reirei ibukin bitineti aika rangin kinaaki i Buranti. I rang kamatebwai mwaka inanon aoa aika mwaiti ni katoa bong ibukin uoua te ririki. Ma I aki toki n nanako n taromauri ao n te intitute ao ni kakoroi bukin katabeau inanon te Ekaretia.

Te kabanea ni kakawaki ni mwakoro ibukin te ukeuke bon te intawiu. Iai au intawiu ma teuana te reirei, ao ngke a kunea bwa ngai kain te Ekaretia, e aki nako raoi.

Imwina I a ira te ukeuke man te reirei are e bane riki nanou ni kan nako iai. Imwin tabeua taai n tain te intawiu, te tia karaoa te intawiu e a moanna n titiraki bwa tera ae I karaoia itinanikun au aoa ni kamatebwai. I ataia bwa bon te titiraki are e kona ni kaotia bwa N na butimwaeaki ke N aki. Ma I iangoia inanon te teekan bwa N na kakaonimaki nakon au koaua.

I taku, “Ngai bon kain Ana Ekaretia Iesu Kristo ibukia aika Itiaki ni Boong aika Kaitira,” ao imwina I kabanea 15 te miniti ni kabwarabwara bwa tera ae I karaoia inanon te Ekaretia.

E taku te tarekita n te reirei, “Ko ataia, I kukurei ngkai ko taekina aio. Ngke ataein te reirei ngai, I kamatebwai n te United States, ao temanna mai ibuakoia raoraou bon kain te Moomon. Bon te mwaane ae rangin kakannato, te aomata ae rangin nanoanga. Au iango irouia kain te Moomon bwa aomata aika a rangin tamaroa.”

Te rauaki terana! Ngai te moan n aomata mai ibuakoia taan kan reirei n te ririki anne ni butimwaeaki nakon te reirei aio.

Iai uoua reirei aika a oti ma n te karaki aio. Te moan, ti riai n aki karinanoa te mwaaka are iai iroura iaoia tabeman. Kauoua, ti riai n tainako ni kakaonimaki nakon ara koaua. Karaoa am kabanea ni kona, ao te Uea e na buokiko ma ake nikirana.