Atiibu, Kainikatebe, ao Borotino

Te rianna n oki nakon te mwenga man te reirei bon te bwai ae aki kaunga. N tabetai I iangoa taekan katabeau n au numera, n tabetai I iangoa taekan te bwai ae ti karaoia n te kiraati n te tabo n takakaro, ao n tabetai I nakonako n aki iangoa te bwai teuana.

Ma te bong aio e boni kaokoro. E biriaitua au iango. Imoau I kona n nooria uoman ataeinimwaane are I takakaro n tabetai ma ngaiia—Josh ao Marcus—a karaoi borotino ao a kotokoteai.

“Ei, David, nakomai ikai!” e takarua Josh, ni ngarengare. “Iai te bwai ae ti kani kaotia nakoim.”

E ngare naba Marcus.

Josh ao Marcus a uaia n ikawai teuana te ririki iaou, ao e matoatoa riki aia kare nakoiu. I ataia bwa n te tai ae e aki maan a na moanna ni kareai ni borotino. E ngae ngke a rangin tamaroa nakoiu n tainako, I taku bwa tao a kaibeibei taian aiti nako nanon taian borotino.

I moanna ni iangoi anga ake N na kona ni katoka iai aia kare.

Ni biri inanon te kawai ni kararoaia? Tiaki, a na bae ni bainingareai ao ni weteai n ara tabeua.

Ni kabirimwakaai n rimoaia? Tiaki, a birimwaaka riki nakoiu ao a na waekoa n roko irou.

Ni katea oin au bwai ni kaikoaki man taian borotino Tiaki te iango ae tamaroa, ni iangoakina bwa uoman ngaia ao bon ti ngai. E na bon reke aia anga ni mena iaon te tabuki, ao akea te tabo ae N na kona ni karabai iai inano.

I baireia bwa N na karaoa te bwai ae e riai—n nakonako ni karaurau n rimoaia ao n tataninga kiban taian borotino.

Ngke I a kaan ma te tabuki, e a kaoti teuana te iango inanou, I uringa Tamuera te Reimwanaite, are e taetaekina te euangkerio inanon teina iaon te oo. Ngke a rawa aomata n ongo n te bwai are e taekinna, a kareia n taian atiibu ao ni katebea n taian kainikatebe.

I ataia bwa e kamanoa Tamuera te Uea man taian atiibu ao kainikatebe. Tao E kona ni katuai nako taian borotino mairou.

I tataro inanou, ni butia Tamara are i Karawa bwa N n aki bo n borotino. I ataia bwa I riai n ninikoria ao n aki nanououa—n aron Tamuera. Ngke I a roko n te tabuki, I onimakinna raoi bwa N na aki ikoaki.

N aron ae I kataningaia, a moanna ni kiba taian borotino. Tabeua borotino a kiba ni katua atu n ae rangi ni kaan n te aro are I kona n namakina te ang ngke a titiba irarikiu. Tabeua borotino a katua angan baiu, ao tabeua a bwaka iaon raoi waeu, ma akea mai ibuakoia ae I bo iai. Akea naba teuana!

A teimatoa ni karekare ataeinmwaane n karokoa ae I a raroa nako ma te tia, ma I ataia bwa I mano. Nikiran riannau n okira mwengau e bon aki rangi n kaunga—ao I bon aki nora kakukureina. I a tia ni kamanoaki n aron Tamuera te Reimwanaite. I ataia bwa te tataro ao kamwakuran te onimaki iroun te Uea e a tia ni kakabwaiai.