Kawakinan Berita aika a Tabu

Te berita ae tabu bon te kabaeaki n te boraraoi ibukin te maiu n tamnei, te berita ae matoatoa nakon te Atua ae Tamara are ti na maiu ao n iango ao ni mwakuri n te kawai ae koaua—kawain Natina, te Uea ae Iesu Kristo. Ni kaboanimwina, te Tama, te Nati ao te Tamnei ae Raoiroi a berita nakoira ni karekean bwaninin te mimitong man te maiu ae akea tokina.

E rangin kakaongora irou bwa berita aika a tabu a bon karaoaki n aron ae onoti, n tatabeua. Iai te berita ae tabu n tain te bwabetito ao n te kamatoaki, are e kairira n te kawai nakon te maiu ae akea tokina. Otenanti aikanne a karaoaki ibukia aomata n tatabemania, temanna imwin temanna, e aki kakawaki bwa mwaitira aika te kabanea n rietata ae a na riai ni karekea.

Iai te berita ae tabu n te tai are a karekea iai te nakoanibonga mwaane.Te katabeaki anne e anganaki temanna n te tai teuana.

Te kabanea n rietata ni berita aika a tabu are ti kona ni karaoi bon inanon te tembora. Ikanne are ti kona iai ni karaoi berita aika a tabu ma Tamara are i Karawa ao ike E kaukii riki Ana kakabwaia aika a bwanin nakoira. Teuana riki, aikai bon namakin irouia aomata ake a tia n rinanona, n aron are ngkana ti nako n te tembora ni kabaeaki nakoia aomata n tatabemania.

Anne aron katean abanuean te Atua—temanna te aomata n te taina, te berita ae tabu n te taina, ni kabane kawai ni mwanangara n te maiu n rabwata e kairira nakon kabanea n rietata ni berita aika a tabu man te tembora ae tabu.

E bon rangi ni kakawaki ibukim bwa ko na ota n te nako n te tembora ibukin oin am entaumente, n raonaki ma otenanti aika korakora are e katauraoiko ibukin te entaumente anne, bon mwakoro aika a rangi ni kakawaki ibukin katauraoam n am mwakuri ni mitinare ao am motinnano n am mwakuri ni mitinare.

Ngkana ko nako n te tembora, ko na moanna n ota ni kakaawakin berita aika a tabu akanne n te tembora, te aki kamaenakoaki n reitakim ma am entaumente ikekei ao tokanikaim n am mwakuri ni mtinare.

Ni koauana, te taeka ae entaumente e kaota kakawakin te itoman anne. Te entaumente bon te bwaintangira. Iai inanona te aekaki n taeka n aron taurii, are bon te bwaintangira ae onoti ni moanakin te maiu n taanga irouia aika a boou inanon maiuia ni iein. Inanon au tai ni beretitenti ibukin te Uniwetiri ae Brigham Young, I kabanei tabeua taai ni kataakin katean ana kataumwane ae teimaan te iuniwetiri, bon te bwaintangira ae te mwane mairouia taan anganano aika a tituaraoi.

Anne te bwai ae karaoia te Atua ibukira ni katoaa te tai are ti karaoa iai ara berita ae tabu ma Ngaia. E bwaintangira nakoira. Ti berita bwa ti na karaoi tabeua bwai, ma are e kaineti nakon te otenanti, ao ni kaboanimwina E berita ibukin kakabwaia aika a onoti—bwaintangira aika kamimi, bwaintangira aika aki kona n taekinaki, bwaintangira aika a kuri n aki kona ni kabwarabwaraki. Ngaia are I taetae nakoim n aiaron are I taetae nakoiu—ngkana ti tangiria n tokanikai n nakoara, ngkana ti tangiria ni karekea te ibuobuoki ao baika a raka ao kakabwaia nako mairoun te Tama, ngkana ti tangiria ni karekea ukin mataroan karawa nakoira bwa ti aonga ni karekea mwaakan te aro n atua, ti na riai ni kawakin ara berita aika a tabu!

Ko ataia bwa ko aki kona ni karaoa te mwakuri aio n ti ngkoe. Ti riai ni karekea ana ibuobuoki karawa; ti riai ni karekea ana bwaintangira te Atua. E reiakina aio ni moan wakinan ana mwakuri ni koron boong aikai. N reiakinan “kaboan maiun Tion,” e taku te Uea:

“Bwa aonga ni katauraoia, ao bwa aonga au aomata n reireinaki riki ma te kororaoi, ao n rinanon taneiai aika bati, ao n atatai riki n ae kororaoi ni kaineti ma katabeaia, ao bwaai ake I kainnanoi mairouia.

“Ao e aki kona aio ni kakoroaki bukina ni karokoa ae a bwaintangiraki unimwaane ma te mwaaka mai ieta.

Bwa nooria, I a tia ni katauraoa te entaumente ae korakora ao te kakabwaia ni kabwaroi nako aoia, n aron ae ngkana a kakaonimaki ao n teimatoa inanon te nanorinano i matau (taraa D&C 105:10–12)

Te mwakuri aio e boni matoatoa ao ana kakaitara teuare e buakaka nako iai e bon rangi n korakora n te aro are ti kainnanoa te mwaaka ae tabu ni katamaroa ara kekeiaki ao ni buoka kawakan te Ekaretia. Te king nako anne ibukira ngaira aomata n tatabemanira bon te berita ae tabu are ti karaoia n te tembora n ongeaba ao n angakarea, ni katabuaki nakon te Tama, ao Ana berita are e na anganira “te entaumente ae korakora.”

E buokiko aio n nora aron nanon ara berita aika onoti, ni kakaokoro bon rinanin taai aika raka ao ni kamimin te mwakuri? N aron bwaai tabeua n te babaire ni kamaiu, aia tokanikai ni kabane unimwaane ao taian titita ni katobibia te aonaba e baireaki bwa temanna te mitinare n te taina.

Tiaki karaoi berita aika a tabu n aron uoote ao titeiki aika bwanin. Tiaki, ti karaoi berita aika a tabu n aron te Tari Brown ke te Tari Burns, Titita Jones ke Titita Jensen. Te kiing nakon te mwakuri aio bon kawakinan berita aika a tabu irouia aomata n tatabemania nako.

I aki ataia bwa te mition raa ae ko na beku iai, ma I aki kakoaua ae Tamara are i Karawa e a tia ni karaoai berita aika a onoti nakon am mition n aron te mition. I ataia E a tia ni karaoi berita aika korakora bon ibukim.

E riki ngkana te mition ae bwanin e katiteuanaaki man korakoran aia etieti mitinare, man kawakina aia berita aika a tabu mitinare, are ti kamwaingii iai maunga. Ngkana iai te katiteuanaki ao te mwaka, te entaumente mai karawa, e roko nakoia aomata n tatabamania n te mition, akea te bwai ae kona n “tuka te mwakuri man rikirakena.”Bon man te kawai aio are ana “koaua te Atua are e na waki nako ma te ninikoria, nanoanga, ao te inaomata.”¹

Ti karekea te onimakinaki anne ngkana akea te reitaki ae mamara inanon te tiein, ngkana akea te uruaki inanon te otanga. Te buaka ni kaitara te buakaka ao te kairua bon te kawai are e reke iai tokanikain te euangkerio—teuana te berita ae tabu n te taina, temanna te aomata n te taina, temanna te mitinare n te taina.

Anne bukina ae taetae iai te Uea nakoia taani kairiri n te Ekaretia ngkoa, “Kabaeingkami inanon te mwakuri ae tabu i matau—bwa ngkai ko karaoa aio, te mimitong e na raonaki ma te abanuea are ko karekea” (taraa D&C 43:9–10).

Te taetae anne e kaineti ma berita aika a tabu. Anne raoi te bwai are ti nako ni karaoia n te tembora—ni kabaeira ma te Uea ao imarenara ma te korakora anne nakon ngkanne “mwakuri inanon ae tabu ni kabane.” Ni kaboan mwiina, te mwaaka ao te mimitong e na roko nakoira ao nakon ara mwakuri. Bon inanon te kibuntaeka ma nanona ae kabwarabwaraki ni kawakinan te berita ae tabu e taku te Uea, Ngai, te Uea, I kabaeaki ngkana ko karaoa ae I tuangko; ma ngkana ko aki karaoa ae I tuangko, akea am berita (taraa D&C 82:10).

Onimakinai. Te kiing nakon te mwakuri aio bon man kawakinan ara berita aika a tabu. Akea riki te kawai ae ti kona ni karekea ao ni kaota mwakan te aro n atua. Ko karekea ana taeka te Uea iaon te bwai anne.

Ko na nako n te tembora ni katauraoiko ibukin am mwakuri ni mitinare. Kawakin am berita aika a tabu ake ko karaoi ikekei, ni kabane. A bon onoti nakoim, boraraoi aika rangin tabu ake ti karaoi ngaira n tatabemanira nako ma Tamara are i Karawa.

Ngkai I butiko aio, I tangiria bwa kona ataia ae I karaoa naba ae ti te arona. N na kawakin naba au berita aika a tabu. Teuana mai ibuakon berita aika a tabu akanne n riki, bwa te membwa n te Kooram n Abotoro n te Tengaun ma Uoman, te tia kakoaua ae onoti ibukin aran Kristo n te aonaba ni kabuta (taraa D&C 107:23). Ni kawakinan au berita aika a tabu, I aki tii kakoaua nakoimi n te bong aei ibukin te Uea ae Iesu Kristo ao Ngaia n tauraki n te kaibangaki, ma Ngai bon te tia kakoaua—ae weteaki, katabuaki, ma te kariaiakaki n uota te kakoaua anne nakon te aonaba. I rangin kukurei n reitiko ma ngai n te mwakuri anne, raoraou kairake aika tangiraki.

I ataia bwa e maiu te Atua, bwa bon Ngaia Tamara are i Karawa ni koaua, ao E na bon kawakin Ana berita nakoira n aki toki. I ataia bwa Iesu bon te Kristo, ana Rikitemanna te Atua n te iriko, ao te Tia Kamaiua te aonaba. I ataia bwa E korakai, wawanako rarana ao e mate bwa ti aonga ni karekea te maiu are akea tokina.

I ataia bwa te Tama ao te Nati a kaoti nakon te burabeti n ataenimwaane ae Iotebwa Timiti, te moan burabeti ibukin boong aikai, are e a tia naba n anga rarana bwa te kakoaua ibukin nakoana, te kanikina ae kakannato ibukin ana kakaonimaki temanna nakon ana berita aika a tabu. I atai kiing nakon nakoa ni burabeti aika a tia n ruorikaaki inanon tiein aika aki kona n uruakaki rinanoia 15 tabeman mwaane nikarokoa te tai aei are a maeka n ana bwai ao ana mwakuri ni burabeti Beretitenti Thomas S. Monson, ana tia tararua ibukia ibonga aika rietata te Atua iaon te aba n te bong aei.

E koaua te mwakuri aio. Katanoata aikai a bon koaua. I ataia n tatabemania nako mai ibuakoia mwaane ao aine n te rabwata ake a tia ngkoa ni maiu. I ataia man ana kaotioti te Tamnei ae Raoiroi, are e anga te kawai nakon maiu ao ae iai nanona nakon au koaua ao are e kanakomaiai—ma ngkami—n riki bwa te tia kakoaua ae onoti ibukin te Tia Kabooa te aonaba.