Te Bwai ae Kakawaki

I taneiai ni mwakuri ma te tienta ibukin buokaia katitamwa are e kangaanga irouia taan mwakuri bwa ana kona n reitaki ni kinaia ibon irouia. N te Kaonobong teuana ao ara tiubwawaitia e iaongoia bwa ti na katawanou ma kaain te kurubu ni kabane ni karekea ara tai ni kona ni kinaira. E tuangiira ni kabane bwa ti na uota te bwai ae kakawaki nakoira ao ni kabwarabwara bwa bukin tera e kakawaki.

Ngke I tabe ni iangoa ana bubuti neierei, I namakinna bwa aio te tai ae rangin ni kakawaki bwa N na reireiniia taan mwakuri taekan te euangkerio. Bukina bwa taekan te aro bon te taobiki ae rangin ni kaireke iai te kauntaeka, I ataia bwa N na rangin ni karaurau ma te taobiki are N na uotia ao N na kanga ni kabwarabwara bukin kakawakina irou.

Ngke e a roko te tawanou, ti bane ni kukurei ni kona ni kinaira raoi riki. Imwiin te katawanou ao ara tia kairiiri e moana ara waaki ni kakukurei man kabwarabwaraan ana bwai ae rangin ni kakawaki—n nen tamneia ana utu. E taekina nakoira ana kanganga are e a tia ni kaitara ma ngaia ngke e raure ma buuna, n riki ngaia bwa te tina ae akea buuna, ao ni moana maiuna ae boou.

Imwiin kabwarabwara tabeua, ao e a roko n au tai. I tuangiia raou ni mwakuri bwa au bwai bon te bwai ae I uouotia ni katoabong: bon au mwamwa ae te RTE. I tuangiia bwa maan aikai a tei ibukin “Rinea te Eti” ao te mwamwa anne e kauringai bwa N na ongotaeka nakon ana tua te Atua n tainako. Tabeman aomata a titiraki taekan te Ekaretia ao aia onimaki Aika Itiaki ni Boong Aika Kaitira, are e anganai te tai n tuangiia bukin kakawakin te utu n ana babaire Tamara are i Karawa ibukiia natina, are a kona utu n riki bwa utu aika akea tokiia, ao bwa iai te Tia Kamaiu are E anga maiuna ibukira. I tibwauai naba tabeua bwaai aika I a tia n rinanoi n au tai ni mitinare. Ngke I taetae, I namakina te Tamnei, n aroia naba raou ni mwakuri.

N te bong are imwiina tabeman a titiraki tabeua titiraki ibukin te euangkerio, ao I kaoia tabeman mai ibuakoia nakon te taromauri. I mwiina e bitaki au mwakuri ao n aki kona n ataia bwa iai mai ibuakoia ae a teimatoa ni kan ataia riki, ma I kukurei bwa I a tia n tuangiia Ana Ekaretia Iesu Kristo ae te koaua bwa e mena ikai n te aonaaba ao Tamara are i Karawa iai ana baire ni kakukurei ibukiia Natina.

Ngkai ngaira kaain Ana Ekaretia Iesu Ibukiia aika Itiaki ni Boong Aika Kaitira, iai katabeakira n tibwaua te euangkerio. Rinanon bwaai aika uarerekea man bebete n aron te mwamwa RTE, ti kona n reiakin reirei aika tamaroa ae a na kona ni mwakuri ibukin kamaiuaia tarira ao mwanera.