Wareka Ana Boki Moomon

Ti kantaningaaki bwa ti na kaonaki n te kimwareirei, ma nanora a rawawata ao baira akea kanoaia. Debra Caelia Carter e roko n ana tai, Eberi 26, 2010, ma e bungiaki ni mate.

Ngke ti a nakon mwengara, I uota te burangketi ae uarerekea ae bingke are ti a tia ni kabongana n taua ao ni bwabwakoa Debra n te onaoraki. Ngke I tekateka iaon te kaintekateka, n taonaki n te nanokawaki, natira te mwaane ae uoua ana ririki e nakon te burangketi are akea kanoana ao ni wirikiriki, “Mauri, mwaneu ae te teei. I tangiriko.”

A bwaka ranin matau, ao I tannako. Ngke I karaoa arei, I noori taekan te boutita man te maekatiin te Friend n tine iaon te oo: “Tamara are i Karawa bon ti teuana te tataro raroana, ao te Tamnei ae Raoiroi bon ti te wirikiriki raroana.”¹

I waaki ni kaota nanou nakon te Atua n tataro ni karaurau, ma te rawawata. Ngke I karaoia, I namakina te Tamnei ae Raoiroi ni wirikiriki, “Wareka riki Ana Boki Moomon.” I a tibwa tia ni warekia, ma te namakin e onoti ao te namakin ae matata.

I moantaai n uti n te moan n ningabong are imwiina, I waaki ni wareka Ana Boki Moomon. I kabonganai bentira ao mwaaka ni kanikinaai kiibu ni kabane ibukin te onimaki, tataro, kantaninga, anuan Iesu Kristo, taekinan te euangkerio, ao ni kakauongo raoi nakon ana taeka te Uea. I ataia bwa I riai ni karaoa ae a tia ni karaoia Nibwaai, Enoti, Moronaai, ao burabeti riki tabeman n Ana Boki Moomon ngke a rootaki n te kataaki. Ao I riai ni karaoia n aron ana tangira te Tia Kamaiu are e kaona nanoia n taai ni kanganga.

N tain te kamatebwai ni katoabong, man booki aika tabu, I namakina bain te Uea ni katobibiai n Ana tangira, ao I namakina te mwaaka n Ana karea ni kamaiu ibukira ni kabane. E taetae te Tamnei nakoiu, e rabunai te rau, ao kaeka nakon au tataro a roko. N iangoan taeka ake I wareki e anganai te korakora n au tai n rawawata.

N te bong teuana I kaonaki n te kimwareirei iroun te Tamnei ngke I wareki taeka aikai:

“I tangiriia ataei aika a uarereke ma te tangira ae kororaoi; ao bon titebo ni kabane ao taan katoonga te kamaiuaki. …

“Ataei aika a uarereke … a bane ni maiu iroun te [Atua] ibukin Ana nanoanga. …

“Bwa nooria ataei ni kabane aika a uarereke a bane ni maiu iroun Kristo” (Moronaai 8:17, 19, 22; kairaki kabwarabwaraana).

I namakinna ae ti tebo ma I kona n noora natiu te aine ni maiu inanon Kristo—ni ngare ao ni kukurei ao ni mwaneaki ni Baina. Man te tai anne I namakina te mwaaka n nanomatoa, ao I namakina te kantaninga ae boou n rin inanon tamneiu ibukiia au utu. I ataia bwa ngkana ti kamatoaira nakon te Mwakuri ni Kamaiu, booki aika tabu, aia taeka burabeti aika maiu, ao ngaira n tatabemaniira rinanon ara berita n te tembora, ti na manga ikotaki n riki bwa te utu ae akea tokina.

I tangira Ana Boki Moomon, are e kakoaua raoi Iesu Kristo, are E karaoia ibukira, ao tera ae ti riai ni karaoia bwa ti na riki n Arona. Ana Boki Moomon e uota te oota nakon maiu ao e kaona nanou n te onimaki iroun Kristo.