Riki bwa te Ota ni Katoto
Kairake n Ataeinimwaane man te Ekaretia—riikan, taan reirei, ao ibonga man te nakoanibonga ae kakannato ae te Aaron—ko a tia ni katoka iaom aran te Tia Kamaiu; ko butimwaea Ana nakoanibonga ae Tabu; ko a tia ni weteaki bwa ko na karaoa Ana mwakuri ao ni kakabwaiaia ake a kinako. Ngkai aio te tai ibukim ni kakoroi bukin am beku n te nakoanibonga ao “kaota nako” bwa te “kainibaire ibukia aba” (D&C 115:5).
Ngkai aio te tai n “kaoti ami ota i mataia aomata n ai aron aikai, bwa a na noori ami mwakuri aika raraoi, ao a na neboa Tamami are i karawa iai” (Mataio 5:16). Iesu Kristo bon te katoto ae kororaoi. Kataia ni Kina, Iriria, ao n riki n ai Arona man kaawakin Ana tua ao ana kainibaire te Ekaretia are e kabwarabwaraaki inanon Ibukin Kakorakorakia Kairake. Ngkana ko karaoia, ko na riki bwa te korakora n te ota n te maiu n tamnei nakoia ake i rarikim.
E taku te Uea, “Kam na itiaki ake kam butimwaea ana mwakuri te Uea” (taraa D&C 133:5). Aron itiakim e na butimwaiko n kaotako nako ma te oota ae onoti nakoia am membwa n te uoote ke te mwaanga ngkai ko tei ibukin te Tia Kamaiu ni kakabwaia te toa ae tabu nakoia ni katoa Tabati.
Taratara raoi ao kabonganai raoi taai ni katoa bong ni beku ibukin am utu, raoraom, membwa n te kooram, ao tabeman. Ko na riki bwa te minita ae kakukurei ibukin te oota nakoia ao nakoia ake a tabe n tarataraiko.
Kaota nako ma te iraorao ae koaua ao te nanoanga nakoia nikabane. Tibwaua kakabwaia aika kamimii man ana bootaki ni kakukurei te Ekaretia ao ana reireri te euangkerio ma raoraom. Bwaina te ninikoria ao kaoia nakon te Ota ao Maiun te Aonaaba—n aron Iesu Kristo.
Ti tangiriko. Ti tataro ibukimi. Ti kaota ara kakoaua bwa te Uea e tangiriko ao e kainnanoiko ni katea abanueana. Ngkai aio te tai ibukim n “teirake ao n kaota nako” ngkai te tia taua Ana nakoanibonga ae Tabu. Ngkai ko karababaa te nakoanibonga aio ao kakoroa bukin am beku ibukin te Atua, otam e na riki bwa “te kainibaire ibukia aaba.”