Te amuiraa e o vau

I te matamua ra, ua mana‘o noa vau i te hopea hepetoma no te amuiraa rahi ei taime roa roa e te mea haumani, tera râ, a tere noa ai te tau, ua au roa vau i te reira e ua tia‘i au i tera taime ma te anaanatae. E nehenehe i te hopea hepetoma no te amuiraa rahi ia riro ei taime faaîraa i te pae varua, tera râ, e mea ohie atoa ia vaiiho i teie mau mana‘o rahi ia morohi atu i roto i te oraraa ia monire a‘e. Teie i muri nei te tahi mau mana‘o tei tauturu ia’u ia tamau noa i te apo rahi mai mai roto mai i te amuiraa.

E faaineine au no te amuiraa na roto i te papa‘iraa i te tahi mau uiraa, ei reira, e tapaʻopaʻo vau i te tahi mau nota ia pahonohia mai te reira. I muri iho, e mea au roa na’u ia faauta uira mai i te mau aʻoraa o te amuiraa rahi e na reira atoa te mau himene i ni‘a ia LDS.org e e tuu vau i te reira i roto i te hoê matini MP3, ei reira vau e faaroo ai i te hoê aʻoraa e te mau himene a rave noa ai au i ta’u ohipa i te mahana. E mea au atoa na’u ia tuatapapa i te amuiraa i roto i te Liahona. E faateatea vau i te tahi mau parau ma te tapaʻopaʻo i te tahi mau nota i te hiti o te api i roto i ta’u iho Liahona. E ia tae faahou mai te tahi amuiraa, ua oti atoa ïa ta’u Liahona i te papa‘i-haere-hia na roto. I te tahi mau taime, e tuatapapa amui matou te utuafare i te mau aʻoraa i roto i te pureraa pô utuafare.

Parau mau, no te tape‘a i te varua te itehia nei i roto i te amuiraa e no te haapii tamau mai mai roto mai i te mau aʻoraa, titauhia ia ohipa tatou, ua haamaitai rahi mai râ te reira ia’u. Ua rahi roa hoʻi te puai e te arata‘iraa ta’u i farii i roto i te mau taime fifi na roto i te tuatapaparaa i te mau aʻoraa o te amuiraa rahi, e ua ite roa vau e, e mea faaûruhia teie mau aʻoraa.