Nahea ratou i te iteraa ?

Ua horo‘a te peresideni Dieter F. Uchtdorf, tauturu piti i roto i te Peresideniraa Matamua, i te hoê aʻoraa i te mau tuahine i te taime no te putuputuraa rahi a te Sotaiete Tauturu i te matahiti 2011, e aʻoraa tei haaputapu i to’u aau e tei faatae i te hau i roto ia’u. Ua paraparau oia no ni‘a i te tiare iti eiaha-e-haamoʻe-ia’u e te auraa no to’na na rauraurii e pae ta tatou e ti‘a ia haamana‘o.¹

I muri iho i te putuputuraa, ua parau mai ta’u tamahine Alyssa i te hoê aamu no ni‘a i to’na hoa o Jessie, e taiete naʻinaʻi ta’na, taiete hamani maa. Ua anihia Jessie na to’na feia faatere no te Sotaiete Tauturu ia hamani i te tahi maa rii monamona no muri iho i te putuputuraa rahi a te Sotaiete Tauturu. Ua parau Jessie ia Alyssa e, i tera iho taime ua ite ona eaha ta’na e hamani atu—250 auʻa iti faraoa monamona. E ua parau atura Alyssa e, e haere mai ona no te tauturu ia tari i te mau faraoa monamona i te fare pû o te tĭtĭ.

Tae mai nei taua mahana ra, e ua haere Alyssa no te tauturu atu, ite atura oia ia Jessie, ua fatata i te taʻi. Ua ineine te mau auʻa faraoa monamona, teie râ, ua hapono Jessie i te hoho‘a o te reira i te hoê fetii e ua parau mai taua fetii nei e, aita i navaʻi roa to te reira nehenehe no te putuputuraa.

Ua feaa atura Jessie ia’na iho. Ua tae a‘era te mana‘o e, e ohipa huru faahiahia rii paha ïa ta te feia faatere no te Sotaiete Tauturu e tia’i ra, e ere paha ïa teie mau auʻa rii faraoa monamona. Feruri haere a‘era oia i te tahi rave‘a no te faanehenehe atu â i teie mau auʻa faraoa monamona, eita râ e taimehia. Afaʻi noa’tura raua Alyssa i teie mau auʻa faraoa monamona, ua pe‘ape‘a roa ïa Jessie i te mana‘oraa e, aita i tuʻati ta’na ohipa i te hinaaro o te mau tuahine—paraparau mai nei te peresideni Uchtdorf.

I to’na paraparauraa no teie tiare iti eiaha-e-haamoʻe-ia’u, ua piahia te hoê hoho‘a no teie tiare iti ninamu. E tiare rii noa, e tiare nehenehe râ e to’na mau rauraurii iti e te tahi reni. Ua putapu te mau aau atoa i te poroʻi a te peresideni Uchtdorf, to’na taparuraa mai ia matou eiaha matou ia faaonevaneva e te mau uʻaraa ruperupe rahi e faaati nei ia matou ma te haamoʻe roa’tu i na mea ohie e pae, te mau parau mau faufaa rahi ta te reira e haapii nei ia matou.

I muri mai i te pure hopea, ua haere te mau tuahine i roto i te piha putuputuraa. I to Alyssa raua Jessie tomoraa i roto, te ite nei raua pauroa te mau tuahine i mua i te airaamaa no te mau monamona ma te ani e, « Nahea ratou i te iteraa ? »

I ni‘a i te auʻa faraoa monamona atoa, te vai ra te û paari uouo tei faanehenehehia i te hoê noa tiare iti, e tiare huʻa, e pae rauraurii, e tiare eiaha-e-haamoʻe-ia’u.