Faafariuraa e faatusiaraa i Finelani

Na Melissa Zenteno

Eaha te auraa te riroraa ei taata apî paari haapa‘o maitai i Finelani ? Te faa’ite nei te tahi taure‘are‘a tamaroa no ni‘a i ta’na peu tumu e to’na faaroo.

I te atea rii noa o te mau pae tahatai no Helsinki, Finelani, te vai nei te pare moana no Suomenlinna, tei patuhia i te 18raa o te tenetere no te paruru ia ratou i te enemi. Patuhia i ni‘a e ono motu, e tapa‘o teie pare no te hinaaro aueue ore o te taata Finelani.

E paturaa ê râ ta te mau melo no Finelani i haere atu e mata‘ita‘i a ratere atu ai ratou i to ratou oire pû. Ua riro te hiero no Helsinki Finelani ei tapa‘o faa’ite i to ratou faafariuraa e te paruru ta ratou e farii nei na roto i te oraraa i te evanelia.

No Niilo Kervinen, e taureʻareʻa 24 matahiti no Rovaniemi, Finelani, e hoo naʻinaʻi ïa to te tere na ni‘a i te pereoo auahi, 10 hora, no te tapae i Helsinki no te fanaʻo i te haamaitairaa ia tavini i roto i te hiero.

Na mua a‘e te haamoʻaraa o te hiero no Helsinki Finelani i te avaʻe atopa ra 2006, e tere roa ïa Niilo e te mau melo o te paroisa i te hiero no Stockholm Suede e aore râ i te hiero no Copenhague, Dânemâta. « E tere hoê hepetoma i te tau veʻaveʻa o te faafaaearaa haapiiraa, », te haamana‘o nei oia. E mea na ni‘a i te pereoo mataienaa e e mea puhapa noa i te roaraa o te reira mau tere, e haamanaʻoraa rahi roa ïa te reira no’na.

Atira noa’tu, e haamaitairaa faahiahia mau ia fana‘o i te hoê hiero i to’na fenua aiʻa. « I te faaara-raa-hia te hiero no Helsinki, ua oaoa roa vau », te na reira nei o Niilo. « Te taʻi noa nei â te pure haamoʻaraa i roto i to’u aau i te mau taime atoa ia tomo vau i roto ».

E mea taa ê mau Niilo i to’na mau hoa no teie here to’na i te hiero. « E nunaa itoito te nunaa Finelani e te ohipa rahi nei ratou, teie râ, te vaiiho nei ratou i te tahi taime rii no te mau mea pae varua i roto i to ratou oraraa », te faataa nei oia. Noa’tu te parau nei o Niilo e, ua haamaitaihia oia i te mau hoa maitai, i to’na paariraa mai, ua papû roa mai te taa-ê-raa i roto i te huru oraraa o to’na mau hoa e te huru oraraa tei haapiihia ia’na. E no teie taa-ê-raa, ua turaʻihia Niilo ia imi i to’na iho iteraa papû i te 17raa o to’na matahiti. « Titau-roa-hia ia’u ia rave i te hoê faaotiraa no te ite mai i hea e ti‘a ai e o vai te taata e ti‘a ia’u ia riro », ta’na ïa parau. « Na roto i te mau haamaitairaa a te Fatu e na roto i te arata‘iraa a te utuafare e a te mau hoa maitai, ua roaa ia’u i te hoê iteraa papû puai a‘e no te Ekalesia ».

I to’na paraparauraa no ni‘a i te faafariuraa, ua parau Elder David A. Bednar no te Pŭpŭ no te Tino Ahuru Ma Piti Aposetolo, « Te fafau atu nei au e, mai te mea e, e itehia ia tatou te parau mau, e e faafariuhia tatou i te Fatu, e vai papû noa tatou ma te aueue ore e eita roa e hi‘a ».¹ Noa’tu â e mea aufau te tere i Helsinki e e mea huru atea atoa, ua fafau roa Niilo ia’na iho no te riro mai ei pĭpĭ na te Mesia. E no Niilo, e ere roa te reira i te hoê faatusiaraa.

Te tahi faahou â parau no ni‘a ia Niilo

Eaha te maa matarohia e te nunaa Finelani ?

Te tahi o te mau maa au roahia a‘e e au, o te tihopu tâmano ïa e te inaʻi ria taripu anoʻi i te umara putete faarapu. E amu rahi atoa matou i te faraoa olura.

Eaha ta outou mau ohipa faaarearearaa ?

E mea au na’u ia faahee na ni‘a i te hiona, mata‘ita‘i i te hoho‘a e aore râ haere noa na rapae. Ua tavini au i ta’u misioni i te fenua Tapone, e no reira, te haapii atoa nei au i te reo Tapone i te taime vata.

Eaha te huru te arapaeraa i Finelani ?

E ere te arapaeraa i te peu rahi i ô matou. E arapae te taata mai te peu ua faahinaaro a‘ena raua ia raua. I ô nei, e ere te arapaeraa i te hoê faanahoraa no te haamâtau i te tahi. Te vai nei te feia apî paari haapa‘o maitai i ô nei, noa’tu pai aita i rahi roa te mau melo. I te tahi mau taime, e tere atea roa te mau melo feia apî paari no te arapae i te hoê taata ta ratou i farerei i roto i te hoê oriraa na te feia apî paari.