Pee i te peropheta

Ua hinaaro rii au e horo‘a’tu e pae rave‘a no te pee i te hi‘oraa o te peresideni Monson.

1. E nehenehe ta tatou ia vai anaanatae noa e e nehenehe ta tatou ia vai oaoa.

I roto i te Poe Tao‘a Rahi, te parau nei te peropheta Iosepha Semita i to’na « huru anaanatae » (Iosepha Semita—Aamu 1:28). Te « anaanatae », o te huru atoa ïa o te peresideni Monson.

I te hoê taime, ua parau te peresideni Monson e : « E… nehenehe ta tatou ia ma‘iti i te huru anaanatae. Eita ta tatou e nehenehe e arata‘i i te tereraa o te mata‘i, e nehenehe râ ta tatou e faatiti‘aifaro i te mau ie. Te auraa ra, e nehenehe ta tatou ia ma‘iti ia vai oaoa e ia vai anaanatae noa, noa’tu te mau ohipa e tupu mai ».¹

I te hoê mahana, te tia’i ra vau i rapae mai i te piha apooraa a te Peresideniraa Matamua. Ua anihia vau ia haere i ô no te tahi tuhaa o te apooraa no ni‘a i te mau hiero. Ua parahi mamû noa vau i rapae i te piha, o vau ana‘e. Ua mana‘o roa vau e, tei roto a‘ena te Peresideniraa Matamua i te apooraa e i roto i te tahi minuti, e anihia vau ia amui atu ia ratou.

A parahi noa ai au i reira, haru atura to’u tariʻa i te maniania o te tahi taata te haere mai ra, te hiohio ra. Ua mana‘o a‘era vau e, « Aita paha teie taata i ite i te tura. Aita tera ohipa hahaere na mua i te piha toroʻa a te Peresideni o te Ekalesia ma te hiohio ».

Aita i maoro roa, faaura mai nei teie taata hiohio i te poro o te vahi haereraa—o te peresideni Monson iho. Ua oaoa roa oia e te anaanatae. Aroha mai nei oia ia’u ma te parau e, « Maa minuti noa paha e haamata atu ai tatou i te apooraa ».

Noa’tu â te teimaha o te Ekalesia taatoa i ni‘a i to’na tapono, e hi‘oraa oia no te oaoa e e mea anaanatae noa to’na huru. E mea ti‘a ia tatou ia riro mai te reira te huru.

2. E nehenehe ta tatou ia vai marû e ia faa’ite i te here i te mau tamarii.

Pinepine Iesu i te faahiti i te parau no te mau tamarii. Oia atoa, pinepine Ta’na peropheta, te peresideni Monson i te faahiti i te parau no te mau tamarii. Ua ite mata vau i te huru no to’na here i te mau tamarii, i te mau oro‘a haamoʻaraa hiero ihoa râ, e na roto i to’na hi‘oraa, tei haapii mai ia tatou e nahea i te faariro ia ratou. I te mau oro‘a haamoʻaraa hiero atoa, e hi‘o oia i te mau tamarii. E mea au roa na’na ia faaô mai ia ratou i roto i te oro‘a no te ofaʻi tihi, pinepine oia i te ani i te tahi o ratou ia parai i te timâ na ni‘a i te ofaʻi tihi ei faaôraa ia ratou i roto i teie tapa‘o no te rave-faaoti-raa i te hiero. E rave oia i te tahi ohipa ia arearea atoa mai ratou. E rave oia i te tahi ohipa ia haamana‘o ratou i te reira. E faa’ite noa oia i te mata ataata ia ratou. E faaitoito oia ia ratou ma te arue i ta ratou ohipa. E mea au te reira ia hi‘o.

Ia aroha ana‘e oia i te taata, e ite outou i te tahi mau taime i to’na rima i te taʻiriraa i roto i to te tahi rima, e aore râ te faahaʻutiraa i to’na tariʻa, te faaitoitoraa ia tavini i te hoê misioni e ia faaipoipo i roto i te hiero.

Maa matahiti i teie nei, ua tarenahia te peresideni Monson ia haamoʻa i te hiero no Oquirrh Mountain Utah i te mahana no to’na oro‘a fanauraa. I to’na tapaeraa i te hiero e te haere ra ona i te uputa tomoraa o te hiero, te tiaʻi mai nei te hoê pŭpŭ feia apî. Ua ite ratou e mahana fanauraa te reira no te peresideni Monson e ua himene ratou ia’na i te himene no te oro‘a fanauraa. Faaea atura oia no te fariu ia ratou ma te mata oaoa iti rahi. Haamata atoa’tura oia i te arata‘i i te himene a himene noa ai ratou. E i te hopea, faahiti mai nei ratou i teie parau « E ia rahi atu â ». Parau mai nei oia ia’u, « Tera ta’u tuhaa au roa a‘e ».

E mea here te mau tamarii e te feia apî o te Ekalesia ia’na, e aita ratou e feaa ra e, ua here atoa oia ia ratou !

3. E nehenehe ta tatou e pee i te mau muhumuhu a te Varua.

Ua faahiti nehenehe mai te peresideni Monson i to’na pûpûraa ia’na iho i te Fatu e to’na hinaaro papû ia pee i te mau muhumuhu a te Varua, teie ta’na mau parau : « Te ohipa au roa a‘e ta’u i ite i roto i te oraraa, o te putapuraa a te hoê muhumuhu e te raveraa ia au i te reira, e i muri iho te iteraa e, e pahonoraa te reira i te pure a te tahi taata e aore râ te hinaaro o te tahi taata. E ua hinaaro noa vau ia ite mai te Fatu e, ia hinaaro ana‘e Oia i te tahi taata horo ohipa, teie o Tom Monson no te horo No’na ».²

E hi‘oraa teie e ti‘a ia tatou paatoa ia hinaaro ia pee.

4. E nehenehe ta tatou ia here i te hiero.

E itehia te peresideni Monson i roto i te aamu o teie nei ao ei taata patu hiero rahi i roto i te aamu o te Ekalesia. Mai te taime a riro ai oia ei Peresideni o te Ekalesia, mai fepuare 2008 atu, ua tamau noa oia i teie ohipa rahi no te paturaa i te mau hiero. I roto i na matahi e ono to’na riroraa ei peropheta, ua faaara te peresideni Monson i te paturaa o na hiero apî e 33.

Ua parau te peresideni Monson, « Ia ora ti‘amâ noa tatou tata‘itahi, ma te rima e te aau mâ, ia fafa mai te hiero i to tatou nei oraraa e to tatou utuafare ».³

Teie atoa te tahi parau fafau faahiahia ta’na i horo‘a mai : « A here noa ai tatou i te hiero, a fafa ai tatou i te hiero e a haere ai tatou i te hiero, e anapanapa mai to tatou faaroo i roto i to tatou oraraa. A haere noa ai tatou i teie mau fare mo‘a o te Atua, a haamana‘o noa ai tatou i te mau fafauraa ta tatou e rave nei i reira, e roaa ia tatou ia faaoroma‘i i te mau fifi atoa e ia upooti‘a i ni‘a i te faahemaraa atoa.  »⁴

E pee na tatou i te hi‘oraa ta te peropheta i tuu i mua ia tatou na roto i te hereraa i te hiero.

5. E nehenehe ta tatou ia vai marû, ia rave maitai e ia here.

E hi‘oraa faahiahia te peresideni Monson no te hereraa ia vetahi ê. Ta’na ohipa taviniraa taatoa tei î i te haereraa e farerei i te mau utuafare ; e te tuuraa i to’na rima i ni‘a i te mau upoo e te horo‘araa i te mau haamaitairaa ; e te tahi atoa taniuniuraa tia’i-ore-hia no te tamahanahana e no te faaitoito ; e te haponoraa i te tahi rata faaitoitoraa, e rata haafaahiahiaraa e rata haamauruururaa ; e te hahaereraa i te mau fare maʻi e i te mau pû aupururaa ; e te faataaraa i te tahi taime no te haere i te tahi hunaraa taata pohe e oro‘a hunaraa noa’tu ta’na tapura ohipa rahi.

Mai ta te Faaora atoa e rave, ua haere o Thomas Monson ma te hamani maitai haere (hi‘o Te Ohipa 10:38) e ma te here ia vetahi ê ; ua riro mau te reira ei puai arata‘i i to’na oraraa.

Teie te tahi hi‘oraa rahi no te maitai o te peresideni Monson tei tupu i te matahiti 2012. Te fatata ra te hiero nehenehe no Brigham City Utah i te oti, ua farerei au i te Peresideniraa Matamua no te paraparau no ni‘a i te tereraa o te oro‘a haamoʻaraa. Tei te hoê atea hoê hora noa o Brigham City i te oire no Roto Miti, i te pae apatoʻerau, e ohipa ohie roa ïa na te peresideni Monson ia tere atu i ô no te oro‘a haamoʻaraa.

Tera râ, ua parau te peresideni Monson, « E oire aiʻa Brigham City no te peresideni Boyd K. Packer, teie aposetolo rahi tei parahi noa i piha‘i iho ia’u e rave rahi matahiti i roto i te Tino Ahuru Ma Piti. Ua hinaaro vau ia fana‘o oia i te hanahana e te haamaitairaa no te haamoʻa i teie hiero i to’na oire aiʻa. E faaatea vau, e e tono vau i te peresideni Packer no te haamoʻa i te hiero no Brigham City. Te hinaaro nei au ia riro taua mahana ra ei mahana no’na ».

Ua riro mau ihoa taua mahana ra ei mahana faahiahia no te peresideni Packer e te tuahine Packer tei paari atoa i Brigham City. Ua putapu roa vau i te maitai o te peresideni Monson e ta’na tapa‘o aroha i to’na hoa aposetolo. E nehenehe ta tatou paatoa ia riro mai te reira te huru. E nehenehe ta tatou e horo‘a rahi e e hamani maitai atu e e feruri rahi atu â i te feia e faaati ra ia tatou.

Ua haapii mai te peresideni Monson ia tatou i te huru oraraa e ora na roto i ta’na mau poroʻi faahiahia e te faaûru mau i te taime no te amuiraa rahi. Ua haapii oia ia tatou nahea i te riro ei feia pee ia Iesu Mesia na roto i to’na iho hi‘oraa rahi e te faahiahia. Papû roa, ua horo‘a mai te Fatu ia tatou i te hoê hi‘oraa no te mau mea atoa, e te hoê o te mau hi‘oraa e ti‘a ia tatou ia pee atu, o tera ïa no to tatou peropheta here.

Te faa’ite papû nei au e, e te vai nei hoê Atua i ni‘a i te raʻi o tei ite ia tatou e o te here nei ia tatou. Ua horo‘a mai oia ia tatou i te hoê peropheta—no te arata‘i ia tatou, no te haapii ia tatou e no te faatere ia tatou i roto i teie mau mahana hopea nei. Te ti‘aturi nei au e, te tia’i nei te Fatu ia here tatou i te peropheta, ia paturu tatou ia’na e ia pee i to’na hi‘oraa.

Te faariro nei au mai te hoê haamaitairaa rahi te oraraa i te tau o Thomas S. Monson, te peropheta a te Fatu. A pee ai tatou i te peresideni Monson e a tamata ai ia riro mai ia’na ra te huru, e manuïa papû mai tatou no te riro mai ei mau pĭpĭ haapa‘o maitai na te Fatu ra o Iesu Mesia.