Ngāue Tokoni he Taimí Ni ke Tokoni ʻAmui Ange

Naʻe pehē ʻe Molomona mo tuhu ki he taua ʻo e ʻapisiasí ʻoku ʻasi hake he funga niú, “Te ta lova ki he ʻapisiasí!” Naʻá ne lele ʻaki e vave tahá ke ʻi muʻa ʻi hono tehina ko Mōlení.

Kuo ʻosi lue mai e ongo tamaikí mo ʻena mātuʻá ʻi ha maile ʻe taha nai mei honau ʻapí, ka naʻe kei lova mālohi pē ʻa Molomona mo Mōleni ʻi heʻena aʻu atu ki he ʻā ukameʻa ʻi tuʻa he ʻapisiasi ʻo honau uōtí. Naʻá na tuʻu ke fakatau ʻena mānavá.

Kimuʻa peá na fili pe ko hai naʻe mālohí, ne ui atu ha kiʻi tamasiʻi, “ʻOkú mo fie ʻakapulu?”

Naʻe saiʻia ʻa Molomona ʻi he ʻakapulú, ka naʻe ʻamanaki ke ne fakamaʻa mo hono fāmilí e fale lotu fakauōtí ke maau ki he lotú he ʻaho hono hokó.

Naʻe kalokalo ʻa Molomona. Naʻá ne kaila mai, “ʻIkai he taimí ni—mahalo ʻanai ange!”

ʻIkai fuoloa ne ngāue mālohi ʻa Molomona mo Mōleni. Naʻe ʻunuakiʻi ʻe Molomona e ngaahi seá peá ne tafi mo ʻene tamaí e falikí kae mopi ʻa Mōleni mo ʻene faʻeé.

Naʻe fufulu fakataha ʻe he ongo tamaiki tangatá e sioʻata he falemālōloó. Naʻe pehē ʻe Mōleni, “Naʻe ʻikai ke u fakakaukau te u saiʻia he fakamaʻa ʻapisiasí, ka ʻoku fakafiefia. Fēfē koe, Molomona? Ko e ʻuhinga ia naʻá ke haʻu ai kae ʻikai ke ke vaʻinga ʻakapulú?”

Naʻe fakakaukau ʻa Molomona kau ki heʻene tamaí. Ko e pīsope ia ʻi honau uōtí, ka naʻá ne kei toʻo ha taimi ke tokoni ʻo fakamaʻa e ʻapisiasí.

Naʻe pehē ʻe Molomona “ʻOku ou ʻi hení he ʻoku ou fie hangē ko Tetí.”

Pea naʻá ne fakakaukau ki he kau faifekau ʻi hono uōtí. Naʻá na femoʻuekina he tukituki ʻi he ngaahi matapaá mo hono vahevahe ʻo e Tohi ʻa Molomoná mo e niʻihi kehé. Te nau fakaafeʻi ʻa e kakaí ke nau haʻu ki he lotú ʻi he fale naʻe fakamaʻa ʻe he ongo tamaiki tangatá.

Naʻe fakakaukau ʻa Molomona, “ʻOku ou ʻi hení koeʻuhí he ʻoku ou fie ngāue fakafaifekau ʻi ha ʻaho.” Te u lava ʻo tokoni ki he kau faifekaú ʻaki hono fakamaau e ʻapisiasí.

Naʻe fakakaukau ʻa Molomona ki ʻapongipongi, ki haʻane ʻā hake mo hono tokouá ʻi he 6:00 a.m., lue lalo ki he lotú ʻi hona sote hina mo e hēkesí, pea teuteuʻi ʻa e ngaahi sea mo e tohi himi ʻi he loki Palaimelí.

Naʻá ne fakakaukau, “ʻOku ou ʻi hení he ʻoku ou fie maʻu ke u ngāue ʻi haku uiuiʻi he Siasí”.

Naʻe fakakaukau ʻa Molomona ki he vave pē haʻane hoko ko ha tīkoni. Te ne tufa e sākalamēnití pea fai mo ha ngaahi meʻa lahi kehe.

“ʻOku ou ʻi hení he te u maʻu e lakanga fakataulaʻeikí ʻi he taʻu foʻoú, pea ʻoku ou fie fai e meʻa kotoa te u malavá he taimí ni ke teuteu ai.”

Kuo ʻosi fai ʻe Molomona ha meʻa ke teuteu ki he lakanga fakataulaʻeikí: kuó ne maʻu ʻene Pale Tui ki he ʻOtuá. Naʻá ne ʻosi ako ke moʻui ʻaki e ongoongoleleí pea tokoniʻi e niʻihi kehé.

Ne faifai pea naʻá ne sio ki he ʻata hono tokouá ʻi he sioʻatá mo malimali.

Naʻá ne pehē, “ʻOku ou ʻi hení he ʻoku ou ʻofa ʻi he ʻEikí, pea ʻe tokoni ʻeku ngāue tokoni he taimi ní ke u mateuteu ke ngāue tokoni ʻamui ange.”

ʻOku nofo ʻa e tokotaha naʻá ne faʻú ʻi ʻIutā, USA.