Ngaahi Fehuʻi mo e Talí
“ʻOku ou feinga ke mapuleʻi ʻeku fakakaukaú, ka ʻoku lahi fau e ngaahi ʻahiʻahí. Te u lava fēfē ʻo maʻu ha ngaahi fakakaukau ʻoku maʻa ange?”
ʻOku faingataʻa ke mapuleʻi hoʻo ngaahi fakakaukaú, ka ʻoku malava ke fai pea maʻu ai e ngaahi tāpuakí: “ʻI hoʻo feinga ke mapuleʻi hoʻo ngaahi fakakaukaú, te ke lava leva ke ikunaʻi ha ngaahi ʻulungaanga, ʻa e ngaahi ʻulungaanga maʻulalo fakafoʻituituí. Te ke lava ʻo maʻu ha loto-toʻa, lavaʻi ʻa e ilifiá, pea maʻu mo ha moʻui fiefia.”1
Fakakaukauʻi foki e ngaahi tāpuaki ko ʻení:
-
ʻE tokoni atu e ngaahi fakakaukau maʻá ke “ʻāsili mālohi ʻa hoʻo falalá ʻi he ʻao ʻo e ʻOtuá,” pea “ʻe hoko ʻa e Laumālie Māʻoniʻoní ko ho takaua maʻu ai pē” (T&F 121:45–46).
-
ʻE tokoni atu e ngaahi fakakaukau maʻá ke ke fakatokangaʻi e ueʻi fakalaumālié, koeʻuhí he ʻoku folofola ʻa e Laumālie Māʻoniʻoní ki ho lotó mo e ʻatamaí (vakai, T&F 8:2–3).
-
ʻE tokoni atu ʻa e ngaahi fakakaukau maʻá ke ke talangofua ki he ʻuluaki fekau maʻongoʻongá: ke ʻofa ki he ʻOtuá ʻaki ho lotó kotoa, laumālié, mo e ʻatamaí (vakai, Mātiu 22:37).
ʻOku lahi ha ngaahi meʻa te ke lava ʻo fai ke ke fakakaukau maʻa aí, ʻa ia te ke lava ʻo sio ki ai ʻi he ngaahi fakakaukau he ngaahi peesi ko ʻení. Ka ko e taha ʻo e ngaahi tefitoʻi meʻa te ke lava ʻo faí—pea ko ha founga māmālie ia—ke ikunaʻi ʻa e “tangata fakakakanó.” ʻOku saiʻia ʻa e tangata mo e fefine fakakakanó ʻi he ngaahi fakakaukau ʻulí. Ko e founga ʻeni ke ikunaʻi aí: “He ko e tangata fakakakanó ko e fili ia ki he ʻOtuá … pea ʻe pehē ai pē ʻo taʻengata pea taʻengata, kae ʻoua kuó ne talangofua ki he ngaahi fakahinohino ʻa e Laumālie Māʻoniʻoní, pea liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí pea hoko ʻo anga tatau mo ha tamasiʻi siʻi, angavaivai, angamalū, loto-fakatōkilalo, faʻa kātaki, fonu ʻi he ʻofa” (Mosaia 3:19).
Ko e hā ha meʻa ʻe taha te ke lava ʻo fai he ʻahó ni ke fakaafeʻi ʻa e Fakalelei ʻa e Fakamoʻuí ke fakahoko e liliu ko ʻení ʻi hoʻo moʻuí?
Mītiá mo e Kaungāmeʻá
Ko ha kamata lelei ke fili e ngaahi faiva, hiva mo e tohi ʻoku langaki moʻuí. Fili ʻa e kaungāmeʻa te ke lava ʻo pukepuke ai e talanoa tāú mo fai e ngaahi ʻekitivitī angamāʻoniʻoní. ʻI ha ʻi ai ha ngaahi meʻa lelei ange ke fakakaukau ki aí, ʻe faingofua ange ke toʻo e ngaahi fakakaukau koví, pea ʻe siʻisiʻi ʻene hokó.
ʻEmipā S., taʻu 18, ʻi Pilītisi Kolomupia, Kānata
Lotú
ʻOku tau ofi ange ki he Tamai Hēvaní ʻi heʻetau lotú pea tokoniʻi au ke u fakakaukau lelei maʻu pē. ʻOku fakamālohia ʻe he ako folofola fakaʻahó ʻeku loto falala ki hono ikunaʻi ʻo e ngaahi ʻahiʻahí; ʻoku lava ke u sio ʻi he folofolá ki he ngaahi sīpinga ʻo e kau ākonga faivelenga ʻo Kalaisí. ʻOku tokoni foki ʻa hono vahevahe ʻeku fakamoʻoní ke maʻa maʻu pē ʻeku fakakaukaú.
Tasa M., taʻu 17, Kievi, ʻIukuleini
Ngaahi Folofolá
ʻOku tokoni ʻa hono lau e folofolá kimuʻa he akó he pongipongi kotoa pē. ʻI he taimi pē ʻoku ou fakakaukau kovi aí, ʻoku ou fetongi ʻaki leva ia ha meʻa ʻoku lelei angé. Kae ʻoua ʻe pehē, “ʻIkai, ʻoua ʻe fakakaukau pehē” (ʻa ia ko ha meʻa lelei ke fai), fetongi ʻaki ia ha fakakaukau. Manatuʻi, ʻokú ke puleʻi hoʻo fakakaukaú, ʻikai ko Sētane. Ko e ngaahi foha mo e ʻofefine loto-toʻa kitautolu ʻo e Tamai Hēvaní pea ʻoku ʻi ai ha misiona ke feinga maʻu pē ke lelei ange.
Niki C., taʻu 16, ʻĀkanisasi, USA
Lelei pe Tonu?
He ʻikai ke ke lava ʻo mapuleʻi maʻu pē ha fakakaukau ʻoku haʻu, ka te ke lava ʻo puleʻi pe te ke tauhi ia. Te ke lava ʻo fehuʻi: ʻE ʻi ai nai ha lelei ʻo e fakakaukau ko ʻení maʻaku? Te ne tokoniʻi nai au ke u ʻalu ʻi he hala totonú? ʻI ha haʻu ha fakakaukau kovi, hivaʻi ha foʻi hiva lelei, fakakaukau ki ha manatu melie pe lotu. Ko hono fetongi pē ʻo e ngaahi fakakaukau koví ʻaki ha meʻa lelei.
Lisa P., taʻu 17, ʻi Tenimaʻake
Sīpinga ʻa Līhaí
ʻI he 1 Nīfai 15:27, naʻe talaange ʻe Nīfai ki hono ngaahi tokouá, naʻe ʻakilotoa ʻenau tamaí ʻi heʻene misi ki he fuʻu ʻakau ʻo e moʻuí ʻe he fulikivanú. Ka naʻe ʻikai ke fakatokangaʻi ʻe Līhai ʻa e fulikivanú he “[naʻe] moʻua ʻa ʻene fakakaukaú ʻi ha ngaahi meʻa kehe.” ʻOku moʻoni ʻeni he ʻahó ni. Kapau te tau holi ke fakafonu kitautolu ʻaki e māʻoniʻoní, lotua ia, pea nofotaha ʻi he ngaahi meʻa ʻo e māʻoniʻoní, pea fakafonu ʻetau fakakaukaú ʻaki e ngaahi meʻa ʻo e māʻoniʻoní mo e angatonú pea he ʻikai ikunaʻi kitautolu ʻe he ngaahi fakakaukau ʻulí.
Haiti W., taʻu 16, ʻAlesona, USA
Ngaahi Himí
ʻE lava e ngaahi himí ʻo tokoniʻi kitautolu ke fakakaukau maʻa ange. ʻOku fakatupulaki ʻe he mūsika leleí ʻa e laumālié. ʻI heʻeku lava ʻo fanongo ki he ngaahi himí, ʻokú ne fakatupulaki maʻu pē au ki he tuʻunga nonga mo fakasilesitiale angé. ʻOku nau tokoniʻi au ke u manatuʻi e ʻofa ʻa e Tamai Hēvaní maʻatautolu takitahá, pea faingofua ange ke taʻofi ʻa e ʻahiʻahí.
ʻAmenitā A., taʻu 18, ʻAmasona, Palāsila
Ako Folofola Fakafāmilí
ʻI he taimi ʻoku haʻu ai ha fakakaukau koví, ʻoku ou feinga ke manatuʻi ha ngaahi potufolofola ne u lau mo hoku fāmilí ʻi he pongipongí. ʻOku lau folofola fakataha hoku fāmilí he pongipongi kotoa he 6:00. ʻOku fuʻu pongipongia ka ko ha tāpuaki pea ʻai ke u ongoʻi mālohi lolotonga e ʻahó.
ʻElena W., taʻu 16, Suisalani
Sākalamēnití
ʻOku pehē ʻi he lotu tāpuakiʻi ʻo e sākalamēnití kapau te tau toʻo kiate kitautolu e huafa ʻo Kalaisí, tauhi ʻEne ngaahi fekaú, pea manatu maʻu ai pē kiate Ia, te tau maʻu maʻu pē Hono Laumālié ke ʻiate kitautolu. ʻI heʻetau manatuʻi Iá, ʻoku tau feinga ai ke tekeʻi ʻa e ngaahi fakakaukau fakamāmaní pea tokanga taha ki he ngaahi meʻa taʻengatá. ʻI heʻetau manatuʻi maʻu pē Iá, ʻe liliu ʻo lelei ange ʻetau ngaahi fakakaukaú, holí mo e tōʻongá.
Makei M., taʻu 18, ʻIutā, USA