Ako Lahi Ange ʻo kau ki he Meʻa ʻOku Hanganaki Maí

Naʻe fakataha mai ʻa e toʻu tupú ʻi ha loki ʻi he falelotú ʻokú ne fakafofongaʻi e senitā akoʻanga fakafaifekaú. ʻOku pehē ʻe Sēkope R. ʻo e Uooti Mosí, “Ne vahe mai ke mau ako kau ki ha fonua. ʻOkú ne ʻomai e ongo te mau maʻu ʻi hano maʻu ha uiuiʻi fakafaifekau pea ʻilo ʻe lava ke ui kita ki ha feituʻu ʻoku makehe mei he meʻa angamahení.”

ʻOku pehē ʻe Saimone W ʻo e Uooti ʻOsiloú, “Pea ne mau ʻalu ki he loki hokó ʻoku ʻi ai ha tokotaha kuo foki mai mei he ngāue fakafaifekaú, naʻá ne fai e fatongia ʻo ha palesiteni fakamisiona. Naʻe talanoa ʻa e tokotaha ʻosi ngāue fakafaifekaú mo ha niʻihi kehe kuo ʻosi ngāue fakafaifekau ki he meʻa ke ʻamanaki ki ai lolotonga ha ngāue fakafaifekau. ʻOku pehē ʻe Saimone, “ʻOku ou pehē naʻe fuʻu lelei ke ako meiate kinautolu kuo ʻosi ngāue fakafaifekaú e meʻa ke ʻamanaki ki ai ʻi ha ngāue fakafaifekau taimi kakató. Naʻe maʻu foki ʻe kinautolu ne kau maí ha pine hingoa, vahe ki ha hoa, pea fakahinohinoʻi ke nofo mo honau hoá he taimi kotoa pē.

Naʻe akoʻi ʻe ha ngaahi akó e toʻu tupú kau ki hono fakatupulaki fakalaumālié kae pehē ki hono tokangaʻi ʻo e ngaahi fie maʻu fakatuʻasinó, hangē ko e foó, mumuiʻi ha patisetí, pea mo e tauhi ha sino ke moʻui leleí.

ʻOku pehē ʻe ʻInia Sofi J. ʻo e Uooti ʻOsiloú, “Ne u saiʻia moʻoni ʻi he ako kau ki hono kamataʻi ha talanoa ki he ongoongoleleí. Ko ha meʻa ia te u lava kamata fakahoko he taimí ni.”

ʻOku pehē ʻe Kalo Feletiliki O. ʻo e Uooti Feletilikisitetí, “Naʻá ku fiefia ʻi hono aleaʻi e founga hono fakaʻaongaʻi ʻo e Malangaʻaki ʻEku Ongoongoleleí. Ne u faʻa fakakaukau maʻu pē ʻoku ʻi ai ha lisi folofola ʻa e kau faifekaú ke ako, ka naʻá ku ʻilo ʻe tokoni e meʻa ʻoku ou lolotonga fai ʻi he seminelí kiate au ko ha faifekau pehē foki ki he meʻa ne u ʻosi ako ʻi he Malangaʻaki ʻEku Ongoongoleleí.”

Naʻe pehē ʻe ha kau talavou tokolahi ko e taha ʻo e ngaahi ako fakangalongataʻa tahá ʻoku kau ai ʻa hono haiane ha sote hiná. ʻOku pehē ʻe Sēkope, “Naʻá ne fakamanatu mai ʻoku lahi ha ngaahi taukei te u lava ʻo ngāueʻi ke teuteu ki ha ngāue fakafaifekau taimi kakato.”

ʻOku pehē ʻe Sala R. ʻo e Uooti Saniviká, “Ne u ako ʻoku lahi ha meʻa te u lava ʻo fai he taimí ni ke ngāue fakataha mo e kau faifekau taimi kakato ʻi hení ke tau hoko kotoa ko ha timi. Ko ha kau faifekau foki mo e kāingalotú.”

Ko ha fakamanatu ʻoku ngāue ʻa e kau faifekaú ʻi he māmaní kotoa, pea ne fai ha kiʻi sapa mo e founga feimeʻatokoni mei he ngaahi puleʻanga kehekehe. ʻOku pehē ʻe Saimone, “ʻOku fakamanatu mai kiate au ʻoku totonu ke u ʻahiʻahiʻi e ngaahi meʻakai foʻou he taimí ni ke u anga ki hono ʻahiʻahiʻi e ngaahi meʻa ʻoku ʻikai ke u kai maʻu peé. ʻE tokoni ia kiate au ke u anga vave ange kapau ʻe ui au ki ha feituʻu ʻoku nau kai ha meʻa ʻoku ʻikai ke u anga ki ai.”

ʻOku pehē ʻe Lisi ʻAnitelia O. ʻo e Uooti Feletilikisitatí, “ʻI he fakaʻosinga ʻo e ʻahó, hili ʻemau fanongo ki he fakamoʻoni ʻo ha toʻu tupu ʻe toko ua mo e kau ʻosi ngāue fakafaifekau ʻe toko ua, ne mau hivaʻi e himi ʻFanongo ko e ʻEiki ʻoku Ui.’ Ne u ongoʻi kapau te u hiva maʻu pē e himi ko ʻení, te u maʻu maʻu pē ha fakamanatu ʻi heʻetau hoko ko ha kau faifekaú, ʻoku tau ngāue maʻá e Tamai Hēvaní pea te Ne tāpuekina kitautolu.”

ʻI he fakaʻosinga ʻo e ʻahó, naʻe mahino ki he toʻu tupu ʻi he siteikí ʻoku ʻikai ngata pē heʻenau teuteu ki ha aʻusia ngāue fakafaifekau taimi kakato ka te nau lava ʻo aʻusia he taimí ni pea ʻi he toenga ʻo ʻenau moʻuí ha ngaahi aʻusia fakafaifekau.

ʻOku nofo ʻa e tokotaha naʻá ne faʻú ʻi ʻOsilou, Noaue.