ʻOkú Ne ʻOfeina Koe

Naʻá ku tangutu ʻi he tuliki ʻo e loki silesitialé he veʻe ʻōkaní ʻi hono fakatapui ʻo e Temipale Memifisi Tenesií. Naʻe haʻu ʻa Palesiteni Sēmisi E. Fausi (1920–2007), ko ha mēmipa ʻo e Kau Palesitenisī ʻUluakí mei he 1995 ki he 2007, ke fakatapui e temipalé. Naʻá ne nofo mo ha kau takimuʻa kehe ʻi mui he maiká. Naʻe haʻu ha kuaea Siasi ʻo tuʻu ʻi mui ʻiate kinautolu.

Naʻe hoko ha finemui ne u faiako ʻaʻahi ki ai ko ha mēmipa ʻo e kuaeá. Ne u lotua he fakatahá ke ne maʻu e meʻa ne ʻuhinga ai ʻene haʻú. Naʻá ne fakahā mai naʻá ne haʻu ki he fakatapui ʻo e temipalé ke ʻilo e tuʻunga ʻokú ne ʻi ai mo e ʻEikí. Naʻá ne fai e ngaahi angahala mamafa ʻi he kuo hilí, pea neongo kuó ne fakatomala, ka ʻokú ne kei faingataʻaʻia pē ke ne ongoʻi fiemālie ki ai pea naʻá mo haʻane ongoʻi fiefia ʻi he hiva he kuaeá.

Naʻá ku sio fakamamaʻu kia Palesiteni Fausi, ne u ongoʻi ʻi heʻene hoko ko ha fakafofonga ʻo e ʻEikí ʻi he Kau Palesitenisī ʻUluakí, te ne lava fai ha meʻa. Ka te u fakahā fēfē kiate ia, pea ʻe lava fēfē ke ne fai ha meʻa? Hili e fakatahá, te ne hū atu ki tuʻa mei he lokí hangē ko ʻene hū maí, pea he ʻikai ha fakafeʻiloaki, lulululu pe fetalanoaʻaki. Ne u laveʻi ʻokú ne femoʻuekina pea ʻi ai ha ngaahi taimi-tēpile fefonongaʻaki ka naʻá ku lotua pē.

Ne mohu fakakaukau ʻa Palesiteni Fausi peá ne sio mai kiate au ʻi ha taimi nounou—naʻe sio fakamamaʻu mai kiate au. ʻI he ʻosi ʻa e fakatahá, ne malama ha maama ʻo e fiefia mei hono fofongá.

Naʻá ne toe sio mai kiate au pea fakafokifā ne tuʻu hake, tafoki, pea naʻe fakamafao atu hono nimá. Naʻe tuhu fakahangatonu atu ki hoku kaungāmeʻá. Pea naʻá ne lea mālohi mo leʻo lahi, “ʻOku ʻofeina koe ʻe he ʻEikí!”

Naʻe siʻisiʻi mo faingofua e meʻa ne fai ʻe Palesiteni Fausí ka naʻe mālohi ʻa ia ne haʻu pē mei he Laumālie Māʻoniʻoní kiate ia he naʻe ʻikai ke u lava maʻu ia. Naʻe tāpuekina ʻe he ngaahi foʻi lea ko iá hoku kaungāmeʻá pea hokohoko atu hono pukepuke ʻeku tui ʻoku ʻafioʻi ʻe he ʻEikí e ngaahi fakaikiiki ʻo ʻetau moʻuí pea “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).