Ko ʻEku Fakamoʻoni Fetaiakí

Naʻe ʻikai lava ke u toe kalofi ha foʻi moʻoni taʻe toe veiveiua: ʻoku fetaiaki ʻa e moʻoni ʻo e ongoongolelei ʻo Sīsū Kalaisí mo e moʻoni ʻo e Tohi ʻa Molomoná. Kapau ʻoku moʻoni ʻa e ongoongoleleí, pea ʻoku moʻoni foki mo e Tohi ʻa Molomoná. Koeʻuhí naʻe ʻikai ke u ʻilo pe naʻe moʻoni e Tohi ʻa Molomoná, ʻoku ou taʻepauʻia ʻeni ʻi he meʻa kotoa ne u tupu hake ʻo tui ki aí. Ne u puputuʻu, pea ne ʻi hoku lotó maʻu pē ʻa e fehuʻi—“ʻOku moʻoni nai e Tohi ʻa Molomoná?”

Naʻe fakatupu ʻi he tupulaki hoku vā fetuʻutaki mo e Fakamoʻui ko Sīsū Kalaisí ha holi ki he moʻoní. ʻI he ʻaho ne u fakatokangaʻi ai he ʻikai pē feʻunga ʻeku ako kia Sīsū Kalaisí taʻe te u lau fakamātoato e Tohi ʻa Molomoná ko e ʻaho ia ne u loto fiefia ai ke ʻilo pe ʻoku moʻoní.

Naʻá ku lotu ke maʻu ha fakahinohino. Lolotonga e taimi ko ʻení, naʻe ui au ʻe heʻeku palesiteni fakakoló ke u faiako fekauʻaki mo e Tohi ʻa Molomoná ʻi he kalasi Tokāteline ʻo e Ongoongoleleí. Naʻá ku tali e uiuiʻí he ne u ongoʻi mahalo naʻa ko e tali ia ʻa e ʻEikí ke tokoni mai ke u ʻilo e moʻoni ʻo e Tohi ʻa Molomoná pea ke ofi ange ki he Fakamoʻuí.

Naʻe faingataʻa ʻa e faiakó. Hili e ngaahi fuofua Sāpaté, naʻá ku ʻiloʻi he ʻikai pē ke lelei kae ʻoua ke u tui ki he Tohi ʻa Molomoná.

Naʻá ku kamata ke ako e Tohi ʻa Molomoná ʻi he uike kotoa pē pea ʻikai fuoloa kuó u fiefia ʻi hono laú. Naʻe hoko kongokonga e ngaahi talanoa ʻi he Tohi ʻa Molomoná pea ne u ofi ange ai kia Sīsū Kalaisi.

Naʻá ku lau kau ki hono ʻaloʻi ʻo Kalaisí, ʻa ia ne mamata ki ai ʻa Nīfai ʻi ha vīsone:

“Naʻá ku mamata ʻo vakai ki he fuʻu kolo lahi ko Selusalemá, kaeʻumaʻā mo ha ngaahi kolo kehe foki. Pea naʻá ku vakai ki he kolo ko Nasaletí; pea ʻi he kolo ko Nasaletí naʻá ku vakai ki ha tāupoʻou, pea naʻe fuʻu hoihoifua ʻaupito ia mo hinehina. …

“Pea [naʻe pehē mai e ʻāngeló] kiate au: Vakai, ko e tāupoʻou ʻokú ke sio ki aí ko e faʻē ia ʻa e ʻAlo ʻo e ʻOtuá, ʻi he anga ʻo e kakanó” (1 Nīfai 11:13, 18).

Naʻá ku lau ʻo kau ki he palani ʻo e fiefiá pea ʻilo ʻoku fie maʻu ʻa e tui kia Sīsū Kalaisí ki hotau fakamoʻuí. Naʻe akonaki ʻa ʻAmuleki:

“ʻOku ou ʻiloʻi ʻe hāʻele mai ʻa Kalaisi ki he fānau ʻa e tangatá, ke toʻo kiate ia ʻa e ngaahi maumau-fono ʻa hono kakaí, pea te ne fai ʻa e fakalelei ki he ngaahi angahala ʻa e māmaní; he kuo folofola ʻaki ia ʻe he ʻEiki ko e ʻOtuá.

“… Hangē ko e palani lahi ʻa e ʻOtua Taʻengatá kuo pau ke fai ha fakalelei, pe ʻe malaʻia ʻa e faʻahinga kotoa ʻo e tangatá” (ʻAlamā 34:8–9).

Naʻá ku lau fekauʻaki mo e tokoni ʻa Sīsū Kalaisi ki Heʻene fanga sipi kehe ʻi ʻAmelika ʻo onoʻahó, peá u ʻilo ko e ʻOtua ia ʻo e puleʻanga kotoa pē. Naʻá Ne folofola ki he kau Nīfaí: “Pea ko e moʻoni ʻoku ou pehē kiate kimoutolu, ko kimoutolu ia ʻa e faʻahinga ʻa ia naʻá ku lau ki ai ʻo pehē: ʻOku ai mo ʻeku fanga sipi kehe ʻoku ʻikai ʻi he lotoʻaá ni; te u ʻomi mo kinautolu foki, pea te nau fanongo ki hoku leʻó; pea ʻe ʻi ai ʻa e lotoʻā pē taha, mo e tauhi pē taha” (3 Nīfai 15:21).

ʻI heʻeku lau ʻa e Tohi ʻa Molomoná, naʻe maama ange ʻeku tui kia Sīsū Kalaisí pea mahino lahi ange ʻEne palaní (vakai, ʻAlamā 32:28).

ʻOku ou fakamoʻoni ko e Tohi ʻa Molomoná ʻa e maka-tuʻu-loto ʻo ʻetau tui fakalotú. Kuo fakahā mai ʻe he Laumālie Māʻoniʻoní kiate au ko Siosefa Sāmitá ko e palōfita moʻoni ia naʻá ne toe fakafoki mai ʻa e Siasi ʻo e ʻOtuá ki he māmaní pea liliu e Tohi ʻa Molomoná mei he lauʻi peleti koulá. ʻOku fakamoʻoni e Tohi ʻa Molomoná kia Sīsū Kalaisi pea fetakinima mo e Tohi Tapú. ʻOkú na fakatou fakamoʻoni ko Sīsū Kalaisí ko e ʻAlo moʻoni ʻo e ʻOtuá pea ko e ʻOtua Ia ʻo e ngaahi puleʻanga kotoa pē, kae ʻikai ko ha taha pē.