Ko e Kāpisi Seitiité

ʻĪmisi

A cabbage sculpted out of jade.

ʻI heʻeku ngāue fakafaifekau ʻi Taiuaní, ne u fakamoleki mo hoku hoá ha kiʻi taimi ʻi he ʻaho teuteu ʻa e kau faifekaú ʻi he Musiume Palasi Fakafouna ʻi Taipeí. Ko e fakatātā manakoa tahá ʻoku ui ko e Kāpisi Seitiité (Jadeite Cabbage). Naʻe fakaʻofoʻofaʻia ai ha tokolahi, ko e meʻa pē ne u sio ki aí ko ha kāpisi ne tā tongitongiʻi. ʻOku mahino ne fakaʻofoʻofa ka ʻoku pau ne ʻi ai e meʻa ne ʻikai ke u fakatokangaʻi

Hili ʻema ʻi he musiumé, ne u fehuʻi ki hoku hoá, “Ko e hā hoʻo fakakaukau ki he Kāpisi Seitiité?”

“ʻOku ou saiʻia ʻi he fakatātā ko iá!”

Ne u fehuʻi ange, “Ko e hā hono ʻuhingá? Ko ha kāpisi pē.”

Naʻá ne pehē mai, “Ko hoʻo fakakata? Ko e Kāpisi Seitiité ko ha lea fakatātā ia ki heʻeku moʻuí!”

“ʻA e kāpisi?”

“Io! ʻOku ʻikai nai te ke ʻilo ʻe koe ʻa e talanoá?”

“Mahino pē ʻoku ʻikai.”

Naʻá ne fai mai e talanoá. Pea naʻá ne moʻoni. Naʻe hoko ia ko e lea fakatātā ki heʻeku ngāue fakafaifekaú mo ʻeku moʻuí.

Kuo pau ke lanu taha mālohi e tā tongitongi mei he seití ke mahuʻinga lahi. ʻOku ngaohi e tā tongitongí mei ha ngeʻesi seiti haohaoa ki ha totongi māʻolunga he ʻoku meimei ʻikai malava ke maʻu ha seiti haohaoa. Ko e Kāpisi Seitiité ʻoku lanu mata ʻi he tafaʻaki ʻe taha pea hinehina e tafaʻaki ʻe tahá pea ʻoku ʻi ai ha ngaahi masisisisi mo ha tungotunga. He ʻikai fie fakamoleki ha taimi ʻo ha taha tā tongitongi taukei ʻi ha konga seiti pehē, kae ʻoua kuo haʻu ha tokotaha ʻoku ui ʻe he kau Siainá ko e tokotaha tā tongitongí tuʻukimuʻá.

Kapau ʻe lava e seiti ko ʻení ke talanoa, ʻoku ou lava ke fakakaukauloto atu ki he fetalanoaʻaki mo e tokotaha tā tongitongi foʻou ko ʻení. ʻOku ou fakakaukau atu ki hano toʻo hake ʻe he tokotaha tā tongitongí e konga seití.

ʻE fehuʻi atu ʻe he seití, “Ko e hā ʻokú ke fie maʻú?”

Pehē atu leva ʻe he tokotaha tā tongitongí, “ʻOku ou fekumi ki ha seiti ke tā tongitongiʻi.”

“Pea toki kumi ha konga kehe. ʻOku ʻikai haku mahuʻinga. ʻOku ou lanu kehekehe ʻe ua ʻokú na fefiohi pe he ʻikai te ke lava ʻo fakamavahevaheʻi kinaua. ʻOku ʻi ai ha ngaahi masisisisi mo ha tungotunga ʻiate au. He ʻikai pē haku mahuʻinga. ʻOua te ke maumauʻi ho taimí.”

“He seiti fakakaukau vale tama ko koe. Falala mai kiate au. Ko ha tokotaha tā tongitongi tuʻukimuʻa au. Te u ngaohi koe ko ha meʻa mahuʻinga.”

Ko e meʻa ʻokú ne ʻai e Kāpisi Seitiité ke fakaofó ko hono hanga ʻe he tokotaha tā tongitongi tuʻukimuʻá ʻo fakaʻaongaʻi e vaivaiʻanga ʻo e seití—ʻa e ngaahi lanu ʻe uá, masisisisi mo e tungotungá—ke hā moʻoni ange ke ʻai e kāpisí. Ne hoko ʻa e konga hinehiná ko e vaʻa ʻo e kāpisí, pea ʻasi moʻoni ange ʻa e ngaahi laú ʻi he masisisisí mo e tungotungá. Ka naʻe taʻe ʻoua e “ngaahi vaivai” ʻo e seití, he ʻikai lava ʻo ʻasi moʻoni.

Koeʻuhí ko e fakaʻofoʻofa ʻo e tā tongitongi ko ʻení, ne hoko ia ko ha meʻaʻofa ki he taha ʻo e fale ʻo e tuʻí ʻi Siainá pea teuteuʻi ʻaki e holo ʻo e ngaahi palasi fakaʻofoʻofa ʻi ʻĒsiá ʻo aʻu ki he musiume ʻi Taiuaní.

ʻOku ou manatu ai ki he ʻEta 12:27: “Kapau ʻe haʻu kiate au ʻa e tangatá te u fakahā kiate kinautolu honau vaivaí. … ʻOku feʻunga ʻa ʻeku ʻofá ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó; he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu.”

Hili ʻeku mamata ki he Kāpisi Seitiité, ne kamata ke hoko e potufolofola ko ʻení ko ha maama foʻou. ʻOku tau hoko kotoa ʻo hangē ko e konga seiti ko ʻení, ka ʻoku kei tā tongitongiʻi kitautolu. Kuo pau ke tau falala ki he tokotaha tā tongitongi tuʻukimuʻa ko Sīsū Kalaisí, ʻa ia te Ne toʻo hotau ngaahi vaivaí pea fakamālohia ia. ʻI heʻetau ngaahi vakai taʻe haohaoá, ʻoku tau faʻa nofotaha ai ʻi heʻetau ngaahi taʻe haohaoá pea loto mamahi koeʻuhí ʻoku tau fakakaukau he ʻikai ke tau toe lelei ange. Ka ʻoku ʻafio mai hotau Fakamoʻui ko Sīsū Kalaisí ki he meʻa te tau lava ʻo hoko ki aí. ʻI heʻetau fakaʻatā ʻEne Fakaleleí ke ngāue ʻi heʻetau moʻuí, te Ne ʻai ke tau hoko ko ha meʻa mahuʻinga ʻo nofo ʻi ha ʻaho mo e Tuʻi ʻo e ngaahi tuʻí.