Wan Lesen we I Gud Tumas
I Kam long Elda Valeri V. Cordón
Blong Olgeta Seventi
“Bambae mi openem skae, mi letem olgeta gudgudfala samting i kam long yufala we i plante we i plante” (Malakae 3:10).
Mi bin stap groap long Gwatemala, famli blong mi i gat wan faktri we i stap mekem ol yunifom blong ol tim blong spot.
Papa blong mi i wantem ol pikinini long famli blong oli lanem blong wok had. Mifala i stap helpem hem insaed long faktri. Mi mekem fulap rong samting taem mi bin smol. !I luk olsem se mi mi stap brekem samting oltaem! Be taem mi kam bigwan, papa blong mi i letem mi lukaot long ol masin blong somap wul.
Papa blong mifala i stap pem mifala from wok we mifala i stap mekem. Afta, bae hem i askem: “?Bae yu mekem wanem wetem mane blong yu? Mi bin save stret ansa: “Pem taeting blong mi mo sevem mane blong go long misin.”
Taem mi gat 13 yia, bisnis blong mifala i lusum plante mane. Mifala i mas salem fulap masin blong somap. Mifala i nomo gat tu handred wokman, be mifala i gat we i no bitim faef. Oli wok insaed long garaj blong mifala long hom.
Mi stap pem taeting blong mi oltaem, be mi neva andastanem gud olsem wanem nao i bin impoten. Afta, mi bin lanem wan lesen we i gud tumas. Wan Satedei moning, mi harem papa mo mama, tufala i toktok kwaet. Papa i talem long mama se mane we i stap, i inaf nomo blong pem taeting, o blong pem kaekae. I no gat inaf blong tufala tugeta. Mi bin wari. ?Bae papa i mekem wanem?
Long Sandei, mi luk papa i givim envlop long branj presiden blong mifala. !Hem i bin jusum blong pem taeting! Mi bin glad se hem i mekem, be mi bin wari tu. ?Bae mifala i kakae wanem?
Long nekis moning, sam pipol oli noknok long doa. Oli bin talem long papa blong mi se oli nidim ol yunifom naoia. Oltaem, ol pipol oli stap pem mifala afta we mifala i somap flatem oda. Be ol pipol ia oli pem papa blong mi long dei ia, !iven bifo we oli gat ol yunifom!
Long wan wiken ia, mi bin lanem wan naesfala lesen we i bin stap wetem mi blong wan laeftaem. Loa blong taeting i helpem yumi blong bildimap fet blong yumi mo soem tangkyu blong yumi long Papa long Heven. !Blong pem taeting, hem i wan blesing!