Mi Filim se Mi Stap long Hom Bakegen

Mi no bin rere long telefon kol blong brata blong mi. Hem i talem: “Mama i jes ded.” “Hem i foldaon mo i bangem hed blong hem.”

Mi sek wantaem. Mama i go finis; mi mi jes toktok wetem hem nomo long naet bifo. Mi stap wokem askem miwan se from wanem nao samting ia i hapen. Mi no save andastanem from wanem nao hem i mas livim mi i stap. !Mi mi kros! Mi stap wetem kros blong mi blong plante wik.

Long en, mi disaed se huia nao bae mi blemem hem from. Hem i rong blong God. God i tekemaot hem long mi eli tumas. Mama blong mi i mestem fulap impoten taem blong laef blong mi, mo mi bin ting se hemia i from Hem. Mi no bin wan memba blong Jos long tetaem ia, be mi mi wan strong Kristin. Mi no bin dipen long God blong kasem paoa, be mi tanem i go longwe long Hem mo mi sarem Hem i stap aotsaed long laef blong mi.

Mi misim mama blong mi fulap. Taem mi bin stap groap, hom blong mi wetem papa mo mama blong mi, i bin olsem wan sef ples. I nomata se mi stap wea, o mi stap mekem wanem, evri taem we mi storian wetem mama blong mi o spendem taem wetem hem, mi bin filim se mi stap long hom. Naoia, filing ia “blong stap long hom” we mi bin laekem, filing ia i nomo gat.

Ol yia oli pas, mo mi bin lusum kolosap ful fet blong mi. Mi bin traem blong andastanem from wanem mama blong mi i mas ded, be i no gat wan samting i bin save karem pis i kam long mi. Afta, blong wan wik olsem, tingting ia i bin stap kamkam oltaem long maen blong mi: mi nidim blong lukluk i go long heven blong kasem andastaning. Mi talem long gudfala fren ia blong mi we i bin wan memba blong Jos. Hem i bin askem sapos mi glad blong lanem moa abaot fet blong hem.

Mi no bin luksave stret long tetaem ia, be Spirit i bin wekemap sol blong mi we i bin stap long wan bigfala slip. Moa mi bin stap lanem abaot gospel, moa mi bin filim se mi bin faenem wan sef ples bakegen. Filing ia “blong stap long hom” i kambak bakegen.

Mi bin kasem baptaes long Mei 2013. Mi mi talem tangkyu se fet blong mi i kambak bakegen. Mi nomo stap tanem baksaed blong mi long God. Be, mi stap akseptem Hem. Mi stil harem nogud smol se mama i bin ded kwiktaem, be from fet blong mi long God, mi save, se wan dei, bambae “mi stap hom” wetem mama mo famli blong mi blong oltaem.