Lusum mo Faenem
Mi save se Papa long Heven i stap ansarem ol prea. Taem famli blong mi i bin stap long Jemani, mifala i bin go long wan Volksmarch long vilej blong mifala. Volksmarch i wan taem we ol fren mo ol neiba oli gat wan gudfala taem tugeta, mo oli go wokbaot long bus tugeta. Papa mo mama i talem se mi save go wokbaot fastaem long grup wetem wan long ol fren blong mi, mo mifala i stat wokbaot folem rod ia.
Smol taem afta, mi nomo save luk wan blong famli blong mi. Mi talem long fren blong mi se bae mi stanap long rod nomo mo wet long olgeta. I no longtaem afta, mi nomo save luk fren blong mi o famli blong hem, mo papa mo mama blong mi i no kam yet. Mi stap miwan long dak bus, mo mi bin fraet. Mi disaed blong talem wan prea se bae wan i faenem mi.
Long nara pat blong dak bus ia, papa blong mi i filim Tabu Spirit i talem long hem: “Go lukaotem boe blong yu.” Hem i bin filim se mi nidim hem bigwan, mekem se hem i tanem raon mo talem long mama blong mi se bae hem i go lukaotem mi. Sam minit afta, papa blong mi i kam, i ronron folem rod ia we mi bin stap wetlong hem mo i faenem mi. !Mi bin glad tumas blong faenem papa blong mi! Taem hem i bin talem long mi se hem i bin gat wan strong filing se mi nidim help, mi bin save se Papa long Heven i bin ansarem prea blong mi.
Mi glad tumas blong save se i nomata weaples mi stap long hem, mi save toktok long Papa long Heven. Bambae Hem i helpem mi blong faenem rod blong mi.