Hemia Nao Ples
Simeon Nnah
Aba, Naejeria
Pikja i kam long Allen Garns
Papa blong mi, i wan strong Kristin man, mo hem i tijim mi blong gat fet long Jisas Kraes. Fet ia i bin helpem mi blong laef tru long wan sivil wo long Naejeria we i tekem tri yia long ol let yia blong 1960 taem mi bin stap long ami. Afta long hemia, mi kam konfius mo mi stop blong go long jos.
Taem mi kam long Yunaeted Stet long 1981, blong kam skul, mi bin filim se mi nidim God insaed long laef blong mi. Blong tu yia, mi bin go long ol defren jos long Boston, Masajusets, be i no gat i stret long tingting blong mi. Mi no bin filim Spirit, mekem se mi stop blong lukluk raon.
I no longtaem afta, waef blong mi, Mabel, i aot long Naejeria i kam joenem mi long 1984; bakegen, mi bin filim strong blong kam kolosap long God mo kam pat blong wan jos. Wan fren i kam long Naejeria, i kam visit, mo i no save se mi stap lukaotem wan jos, be hem i tokbaot wan jos we hem i bin harem, we oli gat wan buk we oli singaotem Buk blong Momon.
Afta long hemia, mi bin gohed blong lukaotem ol jos. Mi faenem wan jos we oli singaotem Jos blong Jisas Kraes blong Ol Lata-dei Sent. Toktok ia, sent, i pulum tingting blong mi. Mi no bin save se i gat wan jos wetem ol memba we oli singaotem sent. Long Sandei ia, mi disaed blong jekem.
Long sakramen miting we mi bin go long hem, kongregesen i bin singsing ol hym long wan fasin blong respek, ol pris oli blesem bred mo wota, mo seves ia, oli lidim folem oda mo wetem fasin blong gat tingting i stap daon. Afta long hemia, taem mi stap wokbaot i go long bigfala rum mo tingting i gobak long seves, mi harem nem blong mi.
“Simeon,” voes blong Spirit i talem, “hemia nao ples.”
Stret long taem ia, tufala misinari i kam kolosap. Tufala i talemaot nem blong tufala mo tufala i presentem Buk blong Momon. Mi lukluk tufala mo talem: “Mi no save eni samting long saed blong Buk blong Momon, be mi mi save Baebol. Mi mi rere.”
Tufala i stat blong tijim mi long saed blong plan blong fasin blong sevem man. I no wan manis afta yet, be mi mi baptaes. Waef blong mi i joenem Jos i no longtaem afta. Sam yia afta long hemia, mitufala i sil long Wasington D.K. Tempol mo mifala i silim ol faevfala pikinini blong mitufala long mitufala.
Insaed long tempol, plante samting oli talemaot long mi, be ol toktok we mi bin harem long fas dei blong mi long jos, Spirit i konfemem long mi plante taem tru long revelesen insaed long tempol: “Hemia nao ples.” Toktok ia we i bin kam long Tabu Spirit i kam strong mo i bin jenisim laef blong mi mo laef blong waef mo ol pikinini blong oltaem.