Lukaot Jeneresen we I Stap Kam Antap

I no longtaem i pas, mi bin go long wan Yang Singel Adalt kamp long Tonga. Long ples ia, long fored blong mi, long naesfala Fraedei moning ia, i gat ova long faef handred bes wokman blong Lod we oli stap sidaon i stap. Oli bin danis, singsing, glad blong mekem sam gufala aktiviti tugeta, mo oli bin lisin long ol instraksen we i gat insperesen we oli kam long wanwan long olgeta mo olgeta lida blong olgeta. Hem i wan glad blong stap wetem olgeta, blong filim gud fasin blong olgeta, mo blong save se, long fored blong mi ia, olgeta we oli sidaon ia, oli sam long ol lida blong Jos, blong komuniti, mo blong bisnis blong tumoro.

Yumi gat fulap samting blong selebretem wetem ol gudfala samting we Jeneresen we I Stap Kam Antap blong ol yang man mo woman insaed long Pasifik oli stap mekem. Plante long olgeta oli go long ol misin, oli mared insaed long tempol, mo oli givim seves insaed long ol wod mo ol branj raon long ol kantri blong Pasifik. Nomata ol bigfala wok ia we oli kasem, i gat yet wan bigfala hol i stap bitwin olgeta we oli gohed blong stap strong mo tru long ol kavenan blong olgeta mo olgeta we oli no gohed blong stap strong mo tru. Mo hemia, i wan bigfala wari blong mifala evriwan.

Pasifik Eria Presidensi i stap singaot i go long Jeneresen we I Stap Kam Antap blong yufala i mas kea mo wantem save abaot gudlaef we i no save finis blong sol blong yufalawan bakegen. I no gat wan memba blong jeneresen ia we i save sakemaot responsabiliti ia mo givim i go long wan narafalawan. Wanwan long yumi i mas meksua se hem i kasem laef we i no save finis taem hem i stap fidim hemwan long saed blong spirit; blong fidim yuwan, hem i wan samting we i nid blong mekem blong save mekem mo kipim olgeta kavenan mo blong stap tekpat long ol gudfala aktiviti. Wan disaepol blong Kraes we i gat disiplin bae i putum Sevya i stap long medel blong laef blong hem, mo bae i mekem olgeta samting we oli impoten olsem ol fas samting blong wok long hem long laef. Blong stap prea mo ridim skripja evri dei, blong stap go long Seminari mo Institiut, blong stap go long Jos, blong stap holem wan tempol rekomen we i laef i stap, blong stap mekem bakegen ol kavenan mo givim seves long ol narafalawan, oli samfala samting nomo we oli impoten. Yes, wanwan memba blong Jeneresen we I Stap Kam Antap bae i mas tekem responsabiliti from gudlaef blong hem long saed blong spirit taem hem i mekem ol samting we oli impoten moa.

Wetem Kraes long medel blong laef blong yumi, i gat fofala nara eria we bae i save helpem yumi blong gohed blong stap strong mo tru long Gospel ia we i kambak. Olgeta samting ia, wan pat blong hem i blong stap glad from membasip blong yu insaed long Jos. Stat long taem ia we yumi stat blong yumi no tingting hevi o ting nating long hemia, taem ia, i stret taem ia nao we bae yu stat blong no tingting hevi o ting nating long ol kavenan blong yu. Nambatu. Yumi mas tingbaot se i gat wan plan blong ol pikinini blong God we oli stap laef long wol, mo long en blong plan ia, yumi mas gobak stap laef wetem Hem wan moa taem. Sapos yumi kam blong andastanem moa Bigfala Plan ia blong Stap Glad, moa bae yumi gat sakses blong mekem finisim plan ia. Nambatri. Yumi mas tingbaot se misinari seves i mekem yumi tanem yumi moa long Kraes, mo i mekem se yumi gat moa fet long Hem. Yumi evriwan i nid blong jenisim laef blong yumi fulwan blong save stanap agensem ol spia blong enemi. Nambafo stamba poen, hem i blong yu komitim o givim yu fulwan long mared. Mared bitwin wan man mo wan woman, God nao i odenem, mo yumi no sapos blong pusumbak i go we i no gat nid from.

I no gat wan man o woman we i mas stap hemwan long laef long wol ia, mo from hemia, God i meksua se taem samting i kam agensem hemia, help i stap blong save kasem. Jeneresen we I Stap Kam Antap bambae i faenem help ia wetem ol gudfala papa mo mama, wetem ol Prishud lida mo ol okseleri lida, wetem ol fren we oli save help we oli serem ol semmak valiu. Olsem evri memba, bambae oli faenem se bes help we oli save faenem i taem we oli nildaon, taem oli askem help blong winim ol trabol mo ol temtesen we i stap fesem olgeta. Bambae oli filim, semmak olsem we mi bin filim, ol toktok blong Tabu Spirit we i stap lidim mo i stap helpem tingting blong olgeta long taem blong ol trabol taem ia.

Blong helpem moa Jeneresen ia we I Stap Kam Antap, Elda Christofferson i bin singaot, wan spesel singaot i go long ol “Adalt man—ol papa, ol singgel adalt, ol lida, ol hom tija—blong oli stap ol eksampol we oli klin inaf, mo blong oli helpem Jeneresen ia blong ol boe we I Stap Kam Antap, blong oli kam ol man. Tijim olgeta ol sosol skil mo ol narafala skil: olsem wanem blong tekpat long wan storian, olsem wanem blong kam blong save ol narawan mo toktok wetem olgeta, olsem wanem blong toktok mo tritim ol woman mo ol gel, olsem wanem blong givim seves, olsem wanem blong no stap slak mo laekem ol gudfala aktiviti, olsem wanem blong gat ol gudfala samting blong mekem be i no blong stap putum evri taem mo tingting long ol, olsem wanem blong stretem ol mistek mo mekem ol joes we oli gud moa.” Olgeta man blong Pasifik, mifala i stap askem yufala blong yufala i girap mo mekem folem singaot ia we i kam long wan profet blong God.

Profet i talem tu se: “Paoa blong gud fasin blong wan woman, bae i no gat wan nara ples moa we bae i wok wetem mo paoa mo bae i mekem gud long nara man bitim insaed long hom. I no gat wan moa gud ples moa bitim tradisonol famli blong lukaotem mo tijim Jeneresen ia we I Stap Kam Antap; tradisonol famli i wan ples we papa mo mama i wok wan tugeta we tufala i no rao blong save lukluk ol stamba nid, blong tijim, mo blong fidim maen blong ol pikinini blong olgeta.” Hem i klia. Wan strong LDS Hom i wan impoten ples blong stap lukaotem mo tijim Jeneresen ia we I Stap Kam Antap.

Mifala i stap invaetem evri papa mo mama, mo ol lida blong meksua se, long fored blong wanem we i save kam agens, mo long fored blong temtesen, bae i no gat wan long Jeneresen ia we I Stap Kam Antap we bae i go lus, mo bambae yufala i joen wetem olgeta long faet blong olgeta blong gohed blong stap tru long ol kavenan blong olgeta, mo blong sevem ol fren blong olgeta we oli go lus.