Aposol I Mekem Sapraes long Ol Yut long Vanuatu

Taem mi luk hem, mi no bin luksave hem. Hem i luk olsem wan nomol man nomo be wan samting insaed long hat blong mi i jenis taem hem i kam kolosap long mi. Wetem wan smael mo taem hem i pusum han blong hem, mi bin luksave se hem i no wan man olbaot. Hem i wan Aposol blong Lod Jisas Kraes, wan witnes we Sevya blong yumi i bin jusum hem.

Las wik nomo mifala i bin faenem se Elda Gary E. Stevenson bae i visitim naesfala kantri blong mifala.

I no gat wan long mifala i bin save se bae hem i stap long eapot long tetaem ia.

Mifala naen i stap longwe blong talem tata long nifiu blong mifala we i gat 18 yia, Ethan, we i aot long Kanada i kam blong visit. Ol fofala gel blong mi, ol fo nifiu mo wan nis, mifala i bin stap wetem aelan sot, ol sot jin traosis we oli katkatem mo mifala i no werem sus. Yes, mifala i draelaeg.

Mifala i luk wan smol grup blong ol lida blong Jos we oli werem ol waet sot mo nektae, wetem ol waef blong olgeta we oli werem ol naes kala dres mo oli holem ol salulsalu. I no had blong kasem se hemia i blong rere blong Elda Stevenson i kasem ples. Mifala i traem blong stap longwe blong i no gat man i luk mifala, be mifala i stap hop se bae mifala i save luk Aposol.

Mi laenemap ol pikinini wan dasen taem mo talem olgeta se sapos oli stanap stret o oli luk naes, maet bae Elda Stevenson bae i luk olgeta. Be afta we mifala i wet wan aoa, i luk se bae i no gat nomo, mo bae mifala i no luk hem.

Mifala i sek, wan man we i dresap long naes kot i kam luk mifala. Hem i askem mifala sapos mifala i glad blong save mitim Elda Stevenson.

Mi luk daon i go long Adidas spot sus blong mi we oli stat blong brokbrok. Hea blong mi i olbaot mo T-sot blong mi i doti nomo. Ol pikinini oli draeleg nomo. Mi wantem aot.

Mi eksplenem gud nomo se mi glad we hem i askem be mifala i no dresap gud blong welkamem wan ripresentativ blong Jisas Kraes.

Be hem i talem se i oraet, mekem se mifala i stanap long bigfala sekol blong ol pipol blong welkamem Aposol. Filing ia i olsem lektrik; mo Spirit i bin stap taem mifala i bin stap wet se bae plen i kam.

Ethan i saedem hem mo talem: “Anti, ?bae yumi mas go long wanem taem blong kasem plen blong yumi?” Plen we bae hem i tekem. Mi fogetem hemia.

“Bae doa i klos long 5 pas 4,” mi talem long hem mo semtaem lukluk fon blong mi. Hem i 3 pas 4. Hat blong mi i brok. I let tumas mo mifala i mas aot.

“Ethan, bae yu go nao mo bae yu no gat janis blong luk hem,” mi talem long hem kwiktaem.

“?Yu tok fani? Nogat. !I moa gud mi mestem plen blong mi, be mi mas mitim Aposol ia!”

Mi no sapraes nating. Mi tanem mi blong mi tok long hem, be semtaem ol doa oli open mo ples i kwaet wantaem. Hem, hem ia i kamaot. Elda Stevenson. Oli putum salusalu long hem, mo oli kisim hem taem hem i wokbaot i kamaot long doa. Wetem bigfala smael mo paoa, Elda Stevenson i wokbaot raonem ful grup ia, i sekhan wetem evriwan, i askem olgeta nem blong olgeta, huia olgeta mo wanem nao oli stap mekem.

Elda Stevenson i holem strong han blong Ethan.

“Ethan,” hem i talem.

“Mi harem se yu stap go long wan misin, ?i tru?”

Ethan i sapraes wan taem we Aposol i singaotem hem long nem blong hem, mo hemia i kamaot klia long fes blong hem taem hem i tanem hem blong ansa long Elda Stevenson. Wan long olgeta we i bin stap tekem ol pikja mo i bin mitim Ethan fastaem i bin talem long Elda Stevenson se i gat wan yang man we i stap flae i go hom blong openem misin koling blong hem wetem famli. Bigfala smael i stap long fes blong Ethan speseli long taem blong trabol, mo i ansa: “!Yes, mi stap go!” Elda Stevenson i askem hem eni kaen kwestin taem hem i stap storian wetem ol pikinini, olsem se hemia nao hem i wantem mekem mo i no gat wan samting moa. Wan filing blong lav mo pis i kam insaed long hat blong mi, mo mi no save stopem wota blong ae blong mi we i stap ron.

Afta we Elda Stevenson mo waef blong hem i muv i go, mi holem han blong ol pikinini, mo wokbaot hariap i go kasem ples blong go insaed long plen. Mifala i kis mo hagem mifala laswan taem we Ethan mo sista blong hem, Talia, i wokbaot hariap i go tru long sekiuriti get.

Taem mifala i stap wokbaot i gobak, mi harem wan samting i stap faerap long sekiuriti glas long saed blong mi. Tru long glas we i tudak, Ethan i stap singaotem nem blong mi. “Oli no save letem mi i go long plen sapos mi no gat sus,” hem i stap talem.

Mi ron i gobak insaed mo tru long smol eapot ia kwiktaem. Mi tekemaot olfala sus blong mi, mo sakem strong i go tru long sekiuriti doa. Ethan i kasem mo mekem fani fes, i putum long leg blong hem mo i lus long kona blong bilding.

Afta long 30 aoa travel i gobak hom, mo wetem famli mo fren i raonem hem, Ethan i openem misin koling blong hem, mo i talem se bae hem i go long Kalifonia, Ranjo Kukamonga Misin.

Taem mi mit wetem wan Aposol long kantri blong Vanuatu. Hem i wan gudfala stat blong 2 yia seves.