Te Kakabwaia n Ana Koroboki Tinau
Douglas Hedger
Nevada, USA
Kamatata n te tamnei iroun Dilleen Marsh
N te tairiki teuana e bane au tai n iangoia bwa tera te rongorongo ae N na anga n te maungatabu n te uoote ae nang roko. I a tia ni kamatebwai booki aika tabu inanon te wiiki aei, ao e ngae ngke I a tia ni karekei kaetieti aika tamaroa ao atatai aika nano, I bon tuai karekea te kaetieti ae itiaki ae tangirai te Uea, ngkai te beretitenti n te titeiki, n tibwauaia ma kaain te uoote.
N au tataro, I bubuti ibukin te kairi mairoun te Tamnei bwa e na kaira au iango. Imwiina I kauki booki aika tabu ao ni manga moana au wareware. E okirikaaki au iango nakon ana kouru te uoote are ti a tibwa tia ni maroroakinna ngai ma te bitiobi. Teuana mai ibuakon kouru aikanne bwa ti na kabongana Tataekina Au Euangkerio n tibwauaan te euangkerio ma raoraora ao kaain rarikira.
I namakina ana wirikiriki te Tamnei ae Raoiroi bwa N na karina Tataekina Au Euangkerio n au kamatebwai n te tairiki anne. I anaa katotona ao ni kaukia nakon baana ane e reke. Iaon te iteraniba anne, I kunei kiibu man booki aika tabu aika koreaki n te bai—1 Nibwaai 8:8–11 ao 1 Nibwaai 11:21–22. Ngke I taraia ni kaniia, I kinai kiibu aikanne bwa a koreaki iroun tinau. Tinau ae tangiraki irou e a tia ni mate tabeua te ririki n nako, uoua te namwakaina imwiin ana ka 80 n ririki. Bon te banna ni katooto n te ninikoria ao te aki taraia i bon irouna, ae aki toki n noora te bwai ae raoiroi irouia aomata. Ao e tangiri booki aika tabu.
I kauki booki aika tabu nakon kiibu aikanne n noria bwa tera ae tuangaki bwa e na koroi. Ngke I wareki, I waekoa ni karekea n au iango te rongorongo are N na riai n anga. Bon te rongorongo ae bebete bwa kain te Ekaretia ake a tia ni katoonga uaan te euangkerio ae kangkang a na bae ni mwaninga n tabetai ae a mwaiti aika a ukoukora naba te aekaki ni uanikai anne. Ti kainnanoia ni karoko irouia ao n tuangiia te tabo ae ana kunea iai.
I uringa tinau ae akoi ngke I taraia rinanon nikiran Tataekina Au Euangkerio. Akea n te tai anne te ara, akea riki bwaai aika a na taraaki, ke te bwai teuana are na kaotia bwa tiaki ana boki te aine anne. I tekateka ma te mimi ngke I kamwataua taraan tiein n tamnei are e a karokoa nakon te tai aei. E kamatoa nakoiu te Tamnei ae I a tia ni kairaki n au iango, n aron are I a tia n tataroakinna. E uarereke ae ataia tinau, e ngae n anne n ririki aika mwaiti n nako e koroi kiibu aikanne, are e na kabonganai te Uea bwa kaekaan ana tataro n nanorinano natina te mwane.