Nakon raoi te Iango
E korakora riki te koaua nakon ae tii te namakin?
Te koaua bon te bwai are e taekinna te tia Kamaiu ngke E tuanga Betero, “Ba e aki kaota aei nako im te iriko ma te rara, ma E kaotia Tamau are i Karawa” (Mataio 16:17). Bon te atatai mai iroun te Atua ae e kaotaki rinanon te Tamnei ae Raoiroi.
E taetae te Tamnei ae Raoiroi n te bwana ae ti namakinna riki nakon ae ti ongo, ma a roko “n am iango ao i nanom” (R&B 8:2; e kairaki katuruan kakawakina)—ara iango ao ara namakin naba.
E kabwarabwaraa te Burabeti Iotebwa Timiti tamnein te kaotioti bwa te namakin ae “te wanawana ae e Itiaki ae e raanga nakoim, (n anganiko) taian iango aika a karina nakon am iango” (Teachings of Presidents of the Church: Joseph Smith [2007], 132).
Ngkana ti katuka ara iango ao nanora—ara ururing, ara namakin, ao ara kantaninga—nakon te Atua, e kona n taetae nakon ara iango ao nanora ma te bwana ae e marara man te Tamnei ae Raoiroi. Ngkai e reitaki ma tamneira, namakin ao iango tabeua a taraa n raanga nakoira. Aio te koaua ae E anganira.