N na kanga ni kaoa te Tamnei nakon mweengau ngkana a unuun aomata ke ni ngurengure?

Ngkana I rinanon te kauntaeka, I a tia ni kunea bwa taekinan kabwara au bure ao kinaakin ae ko bon bure e ngae ngke ko iangoia ke ko ataia bwa ko eti, e buoka uotan te rau ni kaokia nakon te ruu. N te tai anne kararoako, kainababwu, bita te marooro, ke ukera te bwai ae kam na boraoi ni iango iai. E na aki maan manga okin te Tamnei ae Raoiroi.

I a tia ni kunea bwa kaotan te tangira ae kororaoi nakoia kain au utu e kaoa te Tamnei bwa e na maeka ni mweengara. E taetae te burabeti ni kabotaua te tangira bwa te bwai ni kaunganano ae e karika te bitaki ao te oera ae boiarara ae karekea te kamarurung nakon te tamnei. Tamnein te tangira e karekea te Kamanoaki ao te rau n te mweenga.

Ngkana tiaki kain te ekaretia am utu, tuangiia nakobuakan am namakin ngkana a kauntaeka ao butia bwa ana katamaroa. Ngkana e aki mwakuri anne, tataro ao kataia riki. Ngkana ngaia kain te ekaretia, kauringia bwa ngaia bon natin te Atua ao bwa ana riai n totokoi itabaraara.

Ni katoa tai are kain te utu a kakauntaeka, ao e kangaanga namakinan ae iai te Tamnei ae Raoiroi, ma tiaki nanona bwa ko aki kona n namakinna ngkana ko bon tau. Tataro inanom bwa e na korakora riki te Tamnei ae Raoiroi ao kakauongo nakon te wirikiriki are e na roko. E kona ni buokiko Tamara are i karawa n namakina te rau ao e mwaatai ni karokoan te rau anne nakon mweengam.

Marooro ma am utu ni katoka te kangaanga n te kawai ae e na ibuobuoki nakoia ni kabane, ke tibwaua teuana te kibu ke anenea tekorana kunan te aro. Ko kona naba ni butia Tamara are i karawa ibukin te ibuobuoki ni katokan te kangaanga. N aei, ni kabane a na raoi ao a na kona ni katoka te kangaanga n aki kainanoa ae e na iai te tatakarua ke te kakiriwe. Akea te nanokokoraki bwa te Tamnei ae Raoiroi e na kaonrakei ngkami ma te rau ao e na anganiia ni kabane te nano n aki kan manga un.