Are i Karawa, mwaane ao aine aika a kona n riki bwa te kabanea n tamaroa

Te Aine ae akea buuna ae 55 ana ririki ae e mamananga iaon okona.

Ibukin kanganga aika a bati n aorakina ae te tioka, ao e a karika koreakin waen Kabuaa Teubwaitoi are te angaatai.

Ma e aki tuuka Kabuaa man karikirakean ana bitineti aika uoua ao mwakurina ma te onimaki n te Ekaretia. Ni koauana, ko na bae ni kangai bwa e a angana riki te nanomatoa.

E beku Kabuaa n te Uoote ae Teaoraereke 2 bwa te tia reirei n te Bootaki n Aine—te wewete ae e mamate nanona iai.

Ana bitineti ake uoua—te titoa ae e uarereke ae e tei irarikin te kawai ao te co-­op titoa are e kabonakoi bwai ake a karaoi aomata man baia ao bwai riki tabeua—ai bon oin kawain Kabuaa nakon te riki n toronibwai.

E moanaki tao e kaniia tebwina te ririki n nako, ngke inanon 2009 e a reke ana iango Kabuaa bwa e na katea ana bitineti imwin irakin te kiraati ae te riki n toronibwai are e kairaki man te Ekaretia. E a reiakinna mai ikanne bwa e na kangaa ni moana ana bitineti ao ni wakinna.

Tao bon angaraoina, ngke e a kakabwaiaaki bwa iai ana tabo ni maeka iaon Tarawa ae e kan ma rarikin te kawai are e a katea ana bitineti naba iai.

Te co-­op titoa are a kakatokai aia bwai aomata, mwane ke aine, ake a roko man abamwakoro ake tabeua, a uotii aia bwai ake a karaoaki man baia ao bwai riki tabeua bwa e na kabonakoi—E katokai boon bwai akanne ao e karekea teutana ana raka mai iai.

Ana kaunganano Kabuaa e rootiaa tabeman aine n te aba ae uarereke aei bwa ana kareke mwane ao ni buokia aia utu.

E ngae ngke e korakora te bubu n kabutaa rarikin te titoa, e bon teimatoa itiakina. Bwai ake a kaboaki nako e moa man katotongan te waa ae e uarereke ao te riena ni karokoa taian kunikai aika tokatoka mataia ao taian kamumun—taian burenibwai aika karaoaki man taian buroo. E kaboaki nako naba te karewe are e kamaanaki—beneka—te karewe are e kamangingaki inanon te bwatoro are akea kanoaia ao a kakabongana kain te tabo bwa bwain kanaia te ika.

Te kabane mwane e taraki bwa e na rang uarereke; bon ti temana te tia mwakuri, manatian te titoa, ao Kabuaa e tararuaa ana titoa are te KAB.T Handicraft Titoa. Iai te roo ibukin te raitinti ni bitineti n te ririki ao boon te iti.

E taraia Kabuaa bwa bon te kamimi te kakabwaia n reken te toronibwai, ao, n aron Beretitenti Thomas S. Monson, e tangiria naba n reiakiniia tabeman aron are e a tia n reiakina.

Ngke e riki ngaia bwa te beretitenti n te Bootaki n Aine e aki toki ni kakaitibo ma aine are e uarereke ke tao bon akea aia mwane are ana kaboi bwai ake a kainanoaki ibukin te maiu. E marurung ni kaungaia aine n te Bootaki n Aine bwa ana ira te reirei iaon te riki n toronibwai n aron are e iria ngkoa. E marooro naba ma aine n te kawa ake tiaki kain te aro bwa ana ira te reirei are e kairaki man te Aro iaon te riki n toronibwai ibukia taan karikirake. A mwaiti aika a maamaa n te moan tai, ao ni babanga aroia ngkai ana ira te reirei, ma e buokiia Kabuaa bwa aonga n aki maamaa.

E mate kainabana inanon ririki ake a anako, ma e namakina te kakabwaia bwa nimaan natina aika a ikawai a bon tararuaia. E kakaitau bwa e konaa ni kukana oin kanana ni mwengana ao n tabetai e karaoa mamaten nanona ae te tubu ni mai, are e bon kakabonakoa naba n tabetai.

E karabwarabwa Kabuaa ibukin te euangkerio. E ngae ngke e ikawai inanon te Katorika, e mareaki Kabuaa n ana aro kainabana ae te Kamatu. Imwina—inanon 11 te ririki e a reitaki ma kain te aro ae Ana Kakoaua Iehova. Ma—e namakinna inanona bwa iai te bwai ae e kakawaki ae bua.

N te bongina e a noria mitinare Ibukia Aika Itiaki ni Boong aika Kaitira n nakonako imwain te kawai. E kateiia ao n tuangiia ataeinimwane ni mitinare aikai bwa ana kawaria ni mwengana ao ni kaongoraea rongorongon te Ekaretia. E namakina te rau ngke e a ataa te bwai are e bua inanon mauna n tamnei . . . bon bwaninin ana euangkerio Iesu Kristo—ae e a reke irouna ngkai! E bwabetitoaki Kabuaa n Ana Ekaretia Iesu Kristo Ibukia Aika Itiaki ni Bong aika Kaitira n 2000. E bane nanona bwa natina nikabane ana kaina te Ekaretia; ma kukureina n ae e aki kantaningaia . . . a bane n rairaki!