Te Ngare ni Butimwaii

N te tairiki teuana e karaoa ana bootaki ni kakukurei ara uoote are ti a tia ni kabanei aoa aika a mwaiti ibukin katauraoana. Imwin te bootaki ni kakukurei e kaboo nakoiu temanna te kairake ae te tia kakae ma imwin tabeua te miniti e a manga oki ao e titiraki, “Bitiobi, tao N na manga oki ningai?” I tuangnga bwa n te Tabati, ma e waekoa n taku te teinimwaane, “Tiaki, akea riki te bootaki ni kakukurei?” E a bon tia n rang ni kukurei ma kain te roronrikirake n ara uoote ngaia are e tangiria ni manga oki.

I marooro naba ma te tanga ae a tibwa ira te bootaki ni kakukurei ao I titirakiniia bwa teraa ae a tia ni iangoia. Te buu te mwaane e taku, Ngke ti roko ikai, ti a tia n namakina te rau ao te mweengaraoi, “are e kakoauaaki naba iroun kainabana ni katoutouan atuuna. I bon kubanako n aio ibukina bwa ngke a moan roko, e bon rang mwaiti te aomata n taetae ni kawai ao ni karongoa. Ma e reitinakoa ao e taraai ao e titiraki, “Anne te Tamnei ae Raoiroi, kee?” I kubanako, I ti kona ni kangai eng.

A bon bati bwaai aika a karaoaki ni katauraoan te bootaki ni kakukurei aei, ngaia are n te tairiki anne ngke e a bane kanoana, te bwai ae I tangiria ni karaoia bwa nang nako ni mwengau ao n rawekai ni matu. Ibukina bwa I a bon kua, e a aki reke te tai are Nna iangoa au marooro ma te koraki ake a tibwa kakae. Ngke I roko ni mweengau, I karaoa au tataro ao .I a toka n te kainiwene, ma e aki reke matuu; n au iango ao I nora te Uea ae e ngare. Bon te ngare ni butimwaai. N te tai anne I a moanna n uringii bwaai aika a kamiimi are a riki n te bootaki ni kakukurei.

I ataia bwa aia mwanano n tabeia ao te tangira irouia membwa n te uoote e a tia ni karikia bwa e na kona n ringaki iai nanoia nake taan kakae ake teniman. I ataia bwa te ngare ni butimwaai bon ibukin te bwai are ti karaoia. I aki kona n taua tangiu, ao I namakina ae I rang kakaitau ibukin te bwai n tangira are e anganiira te Uea. E a tia n anganiira te ngare ni butimwaai. I kakoauaa bwa ana taeka te Uea a koaua; bwa ngkana ti kairiia ae tao ti temanna te aomata Nakoina, ai korakorara kimwareireira n abanuean te Tama (taraa R&B 18:15).