Pe e Te Alofa Mai Ea ia te A’u?

Ao faimalaga faatasi le au soo ma le Faaola i talafatai o Kaisareia Filipo, sa fetalai atu Iesu ia te i latou, “Pe se a la outou upu ia te a’u, po o ai a’u?”¹ Ona tali mai ai lea o Peteru ma faapea mai, “O oe o le Keriso, o le Alo o le Atua soifua.”² Ona oo lea i le vai i Tiperia, ona toe fesili mai foi lea o le Keriso toetu ia Peteru, “Pe sili mai lou alofa ia te au, i o latou nei?”³ Na tali atu ma le mautinoa Peteru, “Ioe, le Alii e, ua e silafia, ou te alofa ia te oe.”⁴

Na iloa e Peteru e ala atu i le Agaga Paia o Iesu o le Keriso. Sa maua lana lava faaaliga patino, ma sa avea lenei mea ma lana molimau patino. Na silafia e le Faaola lenei mea i le fetalai atu, “Amuia oe Simona Paiona; aua e le se tagata na ia faaalia atu ai ia te oe, a o lo’u Tama o i le lagi”.⁵ Ina ua mavae ona tautino atu Peteru lona alofa mo le Faaola, na tali atu Iesu ma le poloaiga, “Ia e fafaga i a’u mamoe.”⁶ O le auauna atu i lo tatou Faaola o le alofa atu lea ia te Ia, ma o le alofa atu ia te Ia, o le iloaina lea o Ia.

I le tausaga ua mavae i le Konafesi Aoao ia Aperila, na fofogaina mai ai e Peresitene Russell M. Nelson se taulaiga fou ma sili ona paia i le auala e mafai ona tatou tausia ma auauna atu ai i isi. Na ia fofogaina mai faapea, “Ua faia e le Alii ni fetuunaiga taua i le auala tatou te tausia ai le tasi ma le isi.”⁷ I le Konafesi Aoao ia Oketopa, na fofogaina mai ai e Peresitene Nelson le faatulagaina o “se fuafuaga e faaogatotonu i le aiga ma lagolagoina e le Ekalesia e aoao ai aoaoga faavae, faamalosia ai le faatuatua, ma atiae ai se lototapuai sili atu faaletagata lava ia.”⁸

Ao faaauau ona atiae e Peteru lona lava faatuatua, na fetalai atu le Faaola ia te ia, “Pe a liua mai oe, ona e faamalosi ai lea i lou uso.”⁹ O le faasalalauga e Peresitene Nelson o se aiga, e faaogatotonu i le aoaoina o aoaoga faavae ma le taulaiga fou ma sili ona paia e tausia ai ma auauna atu ai i isi, e faataga ai i tatou e faia mea lava e lua na fetalai atu ai Keriso ia Peteru.

Muamua, ia tatou atiae lo tatou lava liua patino i le Faaola o Iesu Keriso. Pe o le faasologa o sauniga o le lotu i Aso Sa sa tolu itula pe o le a lua [itula] nei, o totonu lava o puipui o o tatou lava fale lea o le a tatou mauaina ai le tele o lo tatou liua ma le tautinoga patino.

Na saunoa mai Peresitene James E. Faust (1920–2007), “Afai tatou te mananao moni lava i o tatou aiga e avea ma nofoaga o le paia, o le a tatou taumafai malosi e faia mea uma e uunaia ai le Agaga o le Alii.”¹⁰ O le punaoa ua lagolagoina e le Ekalesia o le, “Sau, Mulimuli Mai ia te A’u—Mo Tagata Taitoatasi ma Aiga” ua mamanuina e fesoasoani ia tatou aoao lelei atili ai i le talalelei, pe na o i tatou lava pe faatasi ma o tatou aiga.

Pe a faalauiloa mai soo se fetuunaiga fou i se faasologa faaletagata lava ia pe faaleaiga, atonu e sau ma ona lava luitau. O le malamalama lelei i lenei mea, ua tuuina mai ai e Peresitene Nelson ia i tatou le faamautinoaga lenei: “Ou te folafola atu pe a e galue punouai e toe faafou lou fale e avea ma se nofoaga autu e aoaoina ai le talalelei, i le gasologa o taimi o le a avea moni ou aso Sapati ma aso fiafia. O le a fiafia lau fanau e aoao ma ola i aoaoga a le Faaola, ma o le a faaitiitia le faatosinaga a le fili i lou olaga ma lou aiga. O suiga i lou aiga o le a iloga ma tumau.”¹¹

O le vaega lona lua o le faatonuga ia Peteru o le faamalosia lea o ona uso. Ua tatou faasino atu i lenei mea o le “auaunaga”. Na saunoa mai Elder D. Todd Christofferson o le auaunaga, “o le avea ma soo, ua tatou mulimuli i le Faaola, o loo tatou taumafai e fai le mea na faia e le Samaria Agalelei, ma mulimuli i le faataitaiga na Ia setiina ma o le tatou aoaoga faavae o le mulimuli ia Keriso ma avea ma Ona soo i soo se auala”¹². Ao tatou atiae uiga faaKeriso i totonu o i tatou lava, o le a le avea ma avega le tiutetauave o a tatou tofiga faaleauaunaga, ae nai lo lena, o le a lagona le manaomia ma o le a tauia ma faataunuuina uma.

O le mea na faasino i ai Keriso ina ua Ia faaaogaina le upu “nei”, ina ua Ia fetalai atu ia Peteru, “Pe sili mai lou alofa ia te au, i o latou nei”?¹³ E faasino atu i le pisi ma le tele o isi faatosinaga i o tatou olaga, lea e tauva ma o tatou taimi ma le gauai atu.

Na saunoa mai Elder Christofferson, “O le tumau ma mausali faifaipea i le faatuatua o Keriso e manaomia ai ona ulufia e le talalelei a Iesu Keriso le loto ma le agaga o le tagata, o lona uiga e le avea le talalelei na o se tasi o le tele o faatosinaga i le olaga o se tagata, ae o le taulaiga manino atoa o lona olaga ma uiga faaletagata.”¹⁴ Ao tatou atiinaeina la tatou molimau ia Keriso, o le a avea lo tatou liua ma o tatou tautinoga. O le a mafai lea ona tatou tali atu e pei ona tali atu ma le mautinoa Peteru, Ioe le Alii e ua e silafia ou te alofa ia te oe, aua o oe o Keriso, o le alofa o le Atua soifua.