O Se Tusi mai le Perofeta

Ata

issue of the Liahona magazine

Ata na tusia e Chris Lyons

Sa ou le mautonu e auai i le Ekalesia ina ua faailoa mai e lou toalua ia te au. Na ia tuuina ia te au se Tusi a Mamona, ma ina ua maea le tele o lesona ma toetoe lua tausaga o galulue ma faifeautalai, sa papatisoina au i le 2007. Sa ou tauivi mo sina taimi ina ua ou avea o se tagata o le Ekalesia. Sa ou le malamalama i le taua o perofeta o aso nei. I lou mafaufau, o se perofeta e tatau ona pei o se tasi e faapei o Mose ma lona tootoo.

“E talanoa le perofeta i le Atua?” Sa ou fesili ai i lo’u toalua.

“Ioe!” o lana tala lea.

“E te mo’i?”

“Ioe, e talanoa le perofeta i le Atua!”

“O le a ou fesili i le Alii e tau atu i le perofeta e auina mai ia te au se tusi o faapea mai o le Ekalesia lenei a Iesu Keriso.”

“Oi e leai!” sa fai mai ai lou toalua. “E le faapena le auala e fai ai!”

Sa ou lotomau.

“Afai e talanoa le perofeta i le Alii, o lea o le a fetalai le Alii ma le perofeta, ma o le a ia auina mai ia te au se tusi.”

I le lotu i se tasi Aso Sa, sa tuuina mai ia te au e se faifeautalai se DVD ma fai mai ia te au e matamata ai ma lou aiga. Na iai molimau a profeta ma aposetolo. O le tagata muamua na saunoa o Peresitene Gordon B. Hinckley (1910–2008): Sa faagaeetiaina lava a’u. E foliga mai e faamaoni o ia, ma e sa ou lagona sa ia tauina mai le mea moni.

“Vaai, o lau molimau lea i le perofeta,” sa fai mai ai lo’u toalua.

“Leai, ou te manao pea i se tusi mai ia te ia,” o la’u tali lea.

I se tasi po, na taunuu mai ai faifeautalai i lo matou aiga ma tuuina mai ia te au se mekasini.

“Ma te leiloa pe aisea, ae sa ma lagona e ao ona ma aumai lenei mekasini ia te oe,” sa laua fai mai ai. O le kopi o le Liahona o Oketopa 2006, o loo afifi pea i le pepa iila.

Sa ou tatala ma maua ai se tusiga mai ia Peresitene Hinckley o lo o saunoa mai i tagata fou o le Ekalesia. Na ia faapea mai, “Ou te tuuina atu lenei molimau, la’u faamanuiaga, ma lo’u alofa ia te outou taitoatasi ma la’u valaaulia ina ia faaauau ona avea ma se vaega o lenei vavega tele i aso e gata ai o Le Ekalesia a Iesu Keriso o le Au Paia o Aso e Gata Ai.”¹

Sa ou lagona ua pei lava na saunoa sa’o mai o ia ia te a’u. Sa le o au o se tagata o le Ekalesia ina ua faasalalauina lenei tusiga, ae sa faasaoina mo au. Ou te iloa e faafofoga mai le Alii i a tatou talosaga ma e fetalai mai o Ia i le perofeta soifua o aso nei.