Mauaina o le Filemu i le Afa o le Vaisu

O le vaai atu i se tasi e pele ia te oe o tauivi ma le vaisu toetoe lava ina a le mafai ona le matauaveina. O le vaisu e fafagaina le pepelo, faalilolilo, ma le faalata, e fanau mai ai le tetee, maasiasi, ma le le faatuatuaina—o ia mea uma e faaleagaina ai mafutaga ma isi ma fesiligia i tatou lava i lo tatou malamalama i le meamoni o tupu. Ou te le mafai ona ou faamatala atu ia te outou le tele o taimi ua feagai ai ou matua, ou uso ma tuagane, ma au ma le mamafa matautia o le “ana faapea la” ma le “pe ana faapea.”

E le tutusa aafiaga o aiga uma o aafia e le vaisu, ae i le tulaga o lou lava aiga, o le vaisu o lou tuaganae ua fai ma mafuaaga o feeseeseaiga i le auala e taulimaina ai le faafitauli. Sa i ai ni faamatalaga e malu ae malolosi e faatatau i le “gafatia” ma lagona tiga ia te au ma ou uso ina ua taulai pea lava pea le taimi o ou matua i lo matou tuagane. O nisi taimi, e faamalosia ai i matou uma ina ia faaeteete i lo matou va nonofo ai.

O le vaisu ua faapei o se afa o faamalumalu mai---o se ao o le le mautonu ma le popole ua ufitia ai luga o o tatou ulu. E ui lava ina matou popo’e pea, ma faatalitali mo le emo o le uila, i le taimi lava e tupu ai, e lavea ai pea matou i le le saunia, ma lafoai atu i matou i le le to’a lava. Taimi taitasi. O se faatamilosaga matautia e le iu lava.

Ina ua ova le faaaogaina e lou tuagane o fualaau faasaina, sa mama o ia mo le lua tausaga. Mulimuli ane ua matou iloa atu le malamalama ina ua vaai i lona tauiviga ma luitau saua o le vaisu i le sili ae ma le sefulu tausaga. Ae i le taimi lava na toe oo ai i ana amioga masani, o mea uma lava na ia galue i ai e atiae i le lua tausaga ua mavae ua masofa ifo i lalo.

Ina ua tuanai ona vaai i le saolotoga ua ataata mai, sa toe faateia foi matou i le toe tupu ma toe foi i le matau’a, vevesi, ma le afa e le mafai ona aloese mai ai o le vaisu, o se afa ua taia ai le tagata ua aafia i le vaisu a o felafoaiina foi e pele ia i latou.

Sa faamatala mai e Peresitene Russell M. Nelson le vaisu e faapenei: “Mai sina tofo itiiti e faapea e le afaina, atonu e mulimuli mai se iuga leaga. E tupu mai i le tofo le amio a’i. E tupu mai le amio a’i le faalagolago i ai. E tupu mai le faalagolago i ai i le fai ma vaisu. E faasolo lemu lava lana pipii mai. E ninii lava filifili o le mausa o le tagata e faigata ona iloa e ia e oo ina malolosi tele ma faigata ona toe motusia.”¹

O lagona o le faalataina atoa na nutimomoia a’u ma lo’u aiga.

Ae o le mea e masani ona galo ia i tatou e uiga i le vaisu ina ua toe tupu i lou tuagane, e le o filifilia e ia lana vaisu e sili ae i lona aiga, ua feagai pea i aso uma ma le faaosoosoga e le gafatia tatou te le malamalama atoa i ai.

A o ou taoto i lou moega, ou te lagona pea le vevesi masani ua totolo mai i lou mafaufau. Sa leai sou faamoemoe. Toilalo. Tiga. E ui ina sa ou aioi atu i le Atua e aveesea le tiga i lou loto ma tuuina atu le malosi i lou tuagane e foia ai lenei tofotofoga ua toe oo mai, sa ou mautinoa o le a le mafai lava ona ou toso eseina ae lava au mai le lua pogisa o le lotovaivai ina ua vaai i lou tuagane ua faamomomoina.

Ae peitai sa mafai lava ona ou faia.

O taimi uma lava ou te maua ai au lava i le loloto o le tulaga maualalo lava, pe mafua mai le vaisu o aafia ai lou tuagane poo nisi o tofotofoga o loo feagai ma au, ou te mafai ona tulai i luga, faatulaga lou sa, ma toe faaauau le folauga. Atonu e foliga mai e le mafai, ae o le mea matagofie lena e uiga i le alofa tunoa ma le alofa mutimutivale o le Faaola: pe a ou tuuina atu lou ola i Ona aao, e mafai ona Ia faia mea e le mafai. E pei ona aoao mai le Aposetolo o Paulo, “Ou te mafaia mea uma lava i le faamalosi mai o Keriso ia te a’u” (Filipi 4:13).

O ou taimi o le lotovaivai, o ou taimi o le “tulaga maualalo lava”, e masani ona oo mai pe a sologa manuia le olaga, pe a ou lagona o loo ou i le tumutumu o le lalolagi, ona, e leiloa le mea e oo mai ai, ua ou pau---ma taia! Ua ou pau fao i le eleele o le le alofa o le tulaga maualalo lava. Sa faafuasei la pau, leiloa, ma tiga. Ae o se mea e ofo ai, ina ua tuanai ona faaaluina se taimi tele o lou olaga iina a o ou feagai ma le lotolotoi o tofotofoga eseese, sa ou aoaoina o le tulaga maualalo lava e mafai ona fai ma se nofoaga matagofie. Ona ua siosiomia oe e le pogisa atoa, o le malamalama o le Faaola o loo susulu malamalama pea. Pe a e maua oe lava i le tulaga maualalo lava, manatua ia saunoaga a Elder Jeffrey R. Holland o le Korama a Aposetolo e Toasefululua: “E le mafai lava ona e magoto i lalo ifo o le malamalama le mafuatia o le susulu o le Togiola a Keriso.”²

O ou taimi i le tulaga maualalo lava na fesoasoani ou te iloa lelei ai le mana o le Togiola a Iesu Keriso. A o ou loto momomo mo lou tuagane ma mafaufau e leai se tasi e malamalama i le mea o loo feagai ma au, ou te iloa o loo silafia e le Faaola. Ou te iloa ua Ia malamalama foi i le vaisu o lou tuagane i se auala e leai lava se tasi e malamalama ai. E ui ina ou le fiafia i lena pau faavave ma le matautia i le tulaga maualalo lava, ou te faafetai mo taimi na fesoasoani mai ai le Faaola ia te au ina ia ou tulai ina ua leai sou malosi ou te tu ai lava au. E tusa ai ma le vaisu a lou tuagane, na Ia faamalosia au ina ia maua le alofa mo lou tuagane ae le o le faamasinoina poo le tuuaia o ia, ia tiga alofa mo ia e ui lava ua ia tauivi ma se mea ou te le mafai ona malamalama atoatoa i ai, ma faamagalo ia te ia ma alofa ia te ia e ui ina tele taimi ua ou tiga ai ona o ana filifiliga.

O lou tuagane o ia o se tagata lelei lava. E agaalofa ma faaaloalo o ia. E lotomaulalo ma agamalu. E atamai ma malie lava. O ia o se tagata e alofagia, o se uo lelei, ma o se tagata faapelepele o lou aiga. E le o ia lava o se tagata leaga. O ia o se atalii o le Atua ma lona taua lemafuatia ua maileia e Satani ma ona lava vaisu ona ua ia faia ni filifiliga le lelei. E pei ona aoao mai e Peresitene Dallin H. Oaks, Fesoasoani Muamua i le Au Peresitene Sili, “O nai taga laiti o le le usitai po o nai toilalo iti e mulimuli i faiga amiotonu e mafai ona tata’i ese mai ai i tatou i se taunuuga ua uma ona lapataia ai i tatou e aloese mai ai.”³ E ui lava i filifiliga le lelei a lou tuagane, o ia ma soo seisi lava o tauivi ma le vaisu, faapea foi o latou aiga, e manaomia le lagolago ma le malosi.

Sa mafatia le leoa lou aiga e uiga i tauiviga a lou tuagane mo se taimi umi. Sa matou tutumau i le maasiasi mai ia i matou lava mo tausaga. Sa tapu le vaisu, o lea sa matou le talanoa e uiga i ai. Sa matou manatu sa le tatau ona aafia e le faalagolago i vailaau faasaina aiga o loo taumafai i le mea sili ona ola ai i le talalelei ma mulimuli ia Iesu Keriso. Sa matou popole tele lava i manatu o tagata pe a latou iloa. Na tuuaia pea lava pea e ou matua i laua lava mo filifiliga a lou tuagane, sa ou nana mai au uo le mea na tupu, ma e sa matou aloese mai fesili uma e uiga i lou tuagane. Ae sa matou le iloa o le le talanoaina o lenei mea sa fai ma mea ua tigaina tele ai lo matou tulaga nai lo le mea ua i ai.

O lea ua sui ai lo’u taulimaina o le vaisu a lou tuagane. Ma o le upu taua lena: taulimaina. Mo le tele o tausaga, sa ou liliuese mai ai ma nana mai isi tagata uma, ae o lea ua ou taulimaina faatasi ma lou aiga. Ua matou saili mo ni fesoasoani ma ua matou taumafai e lagolago i isi. A o faagasolo tausaga, sa matou iloa ai o le vaisu e aafia ai le tele o aiga i le tele lava o auala—ma e leai se mea e lagona maasiasi ai pe faalilolilo. E manaomia le talanoaina, ma o i latou ua faamanualia ai, pe o e ua pele poo i latou ua feagai ma tauiviga a latou lava ia, e manaomia le faaitiitia o le faamasinoga ae faateleina le lagolago fesoasoani, mutimuti alofa, malamalama, ma le alofa. E leai se isi e tatau ona mafatia toatasi.

Ata

woman reaching up in the storm

E ui ina sa ou tatalo mo le tele o tausaga ina ia aveesea le aafiaga o lou tuagane i le vaisu mai ia te ia, sa ou aoao e le mafai ona aia i lana filifiliga saoloto. E tumau pea ia te ia lona tuusaolotoga ma fai ana lava filifiliga, e ui i noataga o le vaisu O au ma lou aiga e i ai mo ia ma alolofa ia te ia, ae le mafai ona matou faamalosia o ia e suia. O Ia e faia le faaiuga. O lea afai ua maua i matou lava ua saisaitia i le afa matautia o loo siomia ai lou tuagane, o nisi o taimi e lagona ai faapei e leai se mea e mafai ona fai i ai. E faapei o le toatele o i latou e aafia ai i le vaisu, e lagona peiseai e le mafai lava ona tatou sosolaese mai ai. Ae aunoa ma se faaletonu, ua i ai iina le Faaola e ofoina mai taimi paganoa o le saolotoga e ala mai i lagona o le filemu, mapu, ma le malamalamaaga e i ai se aso o le a lelei ai mea uma.

O le ala e tuuina mai ai e le Faaola le filemu e le masani o se vavega vave pe ofoofogia. A o ou feagai ma le malosi o matagi o le afa o le vaisu, e masani ona ou mafaufau i le taimi o tofa ai le Faaola i le afa a o malaga atu i le Sami o Kalilaia. I lena lava taimi, sa matatau Ana Aposetolo. Sa latou filifili e taulai atu i le afa nai lo le taulai atu i le Faaola, e ui sa i ai pea o Ia i o latou tafatafa i le taimi atoa. Sa Ia le tuua lava i latou ma e sa Ia maliu mai e laveai i latou—e ui lava ina sa latou masalosalo ia te Ia. (Tagai i le Mareko 4:36–41.)

Ua ou aoao e le tuua lava au e le Faaola ina ia magoto. I lou olaga, e masani ai lava o nai mea itiiti o le alofa mutimutivale o le Alii e tuusaoloto ai au e alo agai atu pea i galu o le afa o loo fafati mai e le olaga ia te au. Sa ia faatoafilemu ia te au ma tausia au lava pe a manaomia au e lou tuagane, sa Ia fesoasoani ia te au e maua le malosi moomia e ala ai mai le moega i aso ou te talitonu ua leai se malosi o totoe ia te au, ma sa faaauau ona Ia ofoina mai le filemu e ui lava i lou fefe pea ona o le le mautinoa.

Ona ua tatou faalogo soo e uiga i faalavelave e fesootai ma le ova o le faaaogaina, ava malosi e faaona ai, poo le tele o ulugalii tetea ona o ponokalafi, e foliga mai o le vaisu e fai ma mafuaaga o le lofituina, ae e le faapea o le tulaga lava lea e oo i ai. Ona o le Faaola, o loo i ai moni lava le faamoemoe e onosaia ai pea soo se tulaga.

E ui ina ou te le iloa le iuga e oo i ai le tauiviga a lou tuagane, ou te tumau ai pea i le faamoemoe, e ui ina foliga mai e le gafatia. Ou te anapogi. O lea ua ou tatalo nei mo le malamalamaaga, tiga alofa, ma le taitaiga ae le mo le aveesea vave o lona aafiaga i le vaisu. Ua ou iloa le ola patino ma le faaleagaga ia te au lava e afua mai lenei tofotofoga umi i le sefulu tausaga. Ou te faaaogaina le tele o punaoa i le mafai ai e malamalama ai i le mafuatiaina. Ma e ou te aapa atu ina ia maua lagolago matagofie mai uo ma taitai o le Ekalesia.

Ae o le mea silisili lava, ou te faalagolago i le Faaola ma Lona mana faamalolo ma le faaola. E moni Lana Togiola. E leai se faamafanafanaga sili nai lo le iloa e malamalama lelei o Ia i le mea o loo ma feagai ma lou tuagane. Ua aoao mai le Salamo 34:18, “Ua latalata mai Ieova i e ua loto momomo, ua ia faaola foi i e ua loto nutimomoia.”

Ou te iloa ua latalata mai o Ia ia te au i taimi ua momomo ai lou loto, ma e ou te iloa o le a Ia i ai pea e fesoasoani ia te au e toe faaleleia ai. E la gata o loo silasila o Ia i le afa mai le matafaga, ae o le tele o taimi o loo i ai o Ia i luga o le vaa, o feagai ma le matautia o matagi ma peau faatasi ma au. Ua Ia faaauau pea ona faatoafilemu sami sousou faigata i lou olaga ma tuu mai au e ola ma lagona le filemu moni.