O se Tatalo e Tatou te Ulufale atu ai i le Malumalu
Isaako Ututu
Lagos, Naitiria
Ata na tusia e Martin Sanders.
I ni nai aso ao lumanai ai le faasologa o le matou uarota e malaga atu ai i le Malumalu i Aba Naitiria, na valaau mai le epikopo ma fai mai ou te taitaia le malaga. Sa ou malie i ai, ma i le taeao o la matou malaga, sa fai la matou tatalo ma feosofi loa i le pasi mo le amatalia o la matou malaga.
A o matou malaga atu, sa matou usu ni pese. Sa faatumulia le ea i le olioli e le mafaitaulia. Sa tele lo matou taimi faasaoina i la matou malaga e 10 itula, ma toeitiiti lava oo i le aoauli, na amata ona faaletonu la matou pasi e leai se tasi o i matou e mafai ona faaleleia.
Sa ou momoe atu i le pamu kesi latalata ane ma maua le tagata faigaluega. Sa ou fesili i ai e faasino mai ia te au se inisinia taavale.
E aunoa ma se taimi maumau, na ia telefoni atu i ni inisinia e lua. E lei pine ae taunuu ma amata loa ona galulue. Na la iloa ua leaga le fusi o le ili. Na laua galulue mo ni itula seia oo ina uma lelei lo laua malamalama. Ona la valaau atu lea i le isi inisinia.
Na foliga mautinoa o ia ina ua ia taunuu mai ma fai se tala faauigalua, “o le a le mea ua tupu i le fusi o le ili ua le mafai ai ona oulua faaleleia?”
Sa galue o ia mo sina taimi ona faapea mai lea, “O le mea ua tupu nei ua sili atu nai lo le mea e mafai ona fai.” Na ia sii ane ana meafaigaluega ma aluese. O isi inisinia na faaauau pea ona saili se fofo, ae foliga mai o le tulaga ua matou i ai ua leai se faamoemoe.
Sa ou faliu atu i ou uso o le Au Paia ma vaaia le faanoanoa toeitiiti lava o foliga uma. A o ou mafaufau i se mea o le a fai, na oo mai le manatu ia te au: “Sa outou tatalo mo le faafitauli?”
I lena lava taimi, sa ou faapotopoto faatasi la matou vaega. Sa matou tutu i le lio ma tatalo atu i lo tatou Tama Faalelagi ina ia tuuina atu i alii inisinia le malamalama ua le o i ai ia i laua. I le itiiti ifo i le lima minute, ae sau se tasi o inisinia e vaai au.
“Ua ma’ea ona maua faia!” sa ia fai mai ai ma le fiafia tele.
Sa matou olioli ma faafetai i le Alii. E lei pine ae ou iloa leisi inisinia ua foliga lotovaivai. Sa ou taumafai e faamalo atu ia te ia, ae na ia fai mai, “O e faamalo mai ia te au mo le faaaluina o le ono itula e faapipii ai le pa’u o le ili e tasi? Sa ou faapipii ni pa’u o ili se lua ae ou te le i sau iinei. O le mea na tupu iinei e le mafai ona faamatalatalaina.”
Sa ou tau atu ia te ia na fesoasoani mai le Atua ina ua maea la matou tatalo.
“Sa outou tatalo i lenei mea?” sa ia fesili ai.
“Ioe, e tusa ma le lima minute ua tea.”
“Oi, e matagofie lena ia te outou!” sa ia fai mai ai.
Sa ou totogi ia inisinia ma o ese loa. Sa matou o uma i luga o le pasi ma faaauau la matou malaga. Mulimuli ane sa matou taunuu i le malumalu i ni nai itula, ma faafetai e faafofoga ma tali mai le Tama Faalelagi i a tatou talosaga.