O Ata o le Faatuatua
Shelly Ellegood
Kentucky, ISA
E faafetaia e Shelly tagata o le uarota o e sa aapa atu ia te ia. “Sa latou fesoasoani ia amata ona ou toe alu i le lotu, ae latou te le’i faamalosia lava a’u,” ua ia fai mai ai. “Sa latou ta’u mai lo latou auai faatasi ma a’u.”
E ui lava ina sa tiga, ua faafetai Shelly mo le malosi ua ia maua mai le Faaola e foia ma aoao ai mai ana measese: ‘E leai se tasi o le a le faia lava ni measese. Pau lava le mea taua o lo tatou aoao mai ai i ia measese.”
Ua lagona e Shelly e mafai ona avea o ia ma faataitaiga i lana fanau i le auala e mafai ai e le talalelei ona faamanuia ma suia olaga. “Ou te faamoemoe ua mafai ona latou iloa ua ou lofituina le tele o luitau” ua ia faapea mai ai. Ou te manao ina ia latou iloa afai e i ai ni o latou faaletonu, e mafai ona latou o ese mai ai. O se mataupu o le i ai o le faatuatua ma le le faavaivai lava.”
E ala mai i ona luitau, sa iloa ai e Shelly o Iesu Keriso o lona punavai mo fesoasoani. “Sa fesoasoani le Alii ia te au ao ou i ai,” ua ia fai mai ai. “Sa Ia atiae au ma ua faamalosia ai au.”
O filifiliga o le soifuaga na fai ma mea na taumamao ese ai Shelly mai le Ekalesia mo ni tausaga. Faatasi ai ma le fesoasoani a ni uo i le lotu, na mafai ai lava e Shelly ona toe maua le malosi ma le faatuatua e agai ai i luma ma avea ma faataitaiga lelei mo lana fanau.
O le pueata, o Cody Bell
Sa 13 ou tausaga ina ua ma auai ma lo’u tina i le Ekalesia. O lo’u tama fai o se tagata o le Ekalesia, ae sa lei to’aga o ia. I se tasi aso, na ia filifili ai e toe foi i le lotu. Na papatisoina i maua ma lou tina. E lei mamao atu lena ae papatisoina lo’u uso.
Sa matou nonofo i Misuri, ISA, ma e sa matou auai i se paranesi toaitiiti lava e feiloai i se potu o le fogafale lua o se fale i le lotoifale. I po o Aso To’onai, matou te o atu ma faamama ia pepa ata ma mea e ta i ai le lefulefu o sikaleti. Sa ou taina se piano feaveai laitiiti mo a matou fonotaga. O tagata o la matou paranesi sa faapei o so matou aiga.
Ina ua 16 o’u tausaga, sa matou siitia atu i Arisona, ISA. Na faigata le suiga, ae sa malosi lava le Ekalesia i Arisona. Mulimuli ane, sa ou auai i le Iunivesite o Polika Iaga ma faaipoipo. E toafa la ma fanau ma lo’u toalua ma e sa manuia lo matou olaga.
Ae sa i ai ni mea na tutupu, ma ina ua ma tete’a, sa tape lo’u igoa mai le Ekalesia. Na alu le 15 tausaga ina ia ou toe foi mai i le Ekalesia. Sa umi se taimi, ae na ou le manao e faatopetope. Sa ou manao ou te alu i le lotu mo mafuaaga lelei uma lava.
Ou te manatua ina ua matou muai siitia atu i Kentucky, ISA, sa ou ave lo’u atalii i le lotu ma ou faatali i le taavale a o alu o ia i totonu. O se taimi faigata lea. O la’u tama teine o le tagata muamua lea o la’u fanau sa faaipoipo i le malumalu, ma e sa le mafai ona ou auai. Sa tiga ai lava ou lagona, ae ioe, o lo’u lava faatamala.
E i ai nisi tagata e pei o a’u e alu se taimi umi faatoa iloa faavasega lelei ni mea. Sa onosai tagata o le uarota ma uo ia te au. Sa latou tau mai lo latou auai faatasi ma au. E i ai se tasi o aiga faapitoa na aapa mai ia te au ma sa pei o lou lava aiga moni aua sa leai se tasi na i ai mo au. Sa latou fesoasoani ia amata ona ou toe alu i le lotu, ae sa latou lei faamalosi mai lava ia te a’u. O le mea manaia ina ua oo mai le taimi talafeagai, sa toe papatisoina au e lo’u atalii.
E tele faaiuga leaga sa ou faia i lou olaga. Maimau pe ana ou le faia na measese, ae ua ou faafetai mo lesona ua ou aoaoina i le tulaga o le salamo. E leai se tasi o i tatou e olai i lenei olaga e aunoa ma le faia o measese --ua na o le Faaola sa mafai ona faia o lea. A tatou faia o measese, e taua lo tatou liliu atu ia te Ia mo le malosi ma aoao mai ai i na measese.
Ou te iloa e le mafai ona ou toe foi i tua ma sui se mea, ae o la’u sini i le taimi nei o le faia lea o mea uma e mafai ona ou faia e tuuina atu ai i la’u fanau se faataitaiga lelei aua sa lei i ai lea mo le tele o tausaga. Ou te faamoemoe ua mafai ona latou vaai ua ou faatoilaloina le tele o luitau.
Ou te manao ina ia latou iloa afai e i ai ni o latou faaletonu, e mafai ona latou o ese mai ai a o latou liliu atu i le Faaola mo se fesoasoani. O se mataupu o le i ai o le faatuatua ma le le faavaivai lava. Sa fesoasoani le Alii ia te au ao ou i ai, ma ou te iloa o le a Ia fesoasoani foi mo i latou. Sa tiga le taumafaiga, ae sa atiae au e le Alii ma ua atili ai ona faamalosia a’u.