O Lou Aafiaga i le NAF
Manao e maua se misiona maoae? O le a aoao atu e le nofoaga autu e aoao ai faifeautalai le auala e fai ai.
Manatu ane e faapea o le aso o le a maua ai lava lou valaauga i le misiona. O lou valaauga o le a aofia ai nofoaga faapitoa, gagana o le misiona, ma le aso e amata ai. Ma o lena aso, o le a e lipoti atu ai i se tasi o nofoaga autu e 13 e aoao ai faifeautalai (NAF) i le lalolagi aoao.
O le a faapefea lou aafiaga i le NAF? Sei o tatou saili iai.
O Lou Aso Muamua
Sei vagana e te nofo latalata lava i le NAF e alu ai i se taavale, o le a faatulaga e le Ekalesia lau faigamalaga.
I le NAF i Provo, Iuta, ISA, e faasino atu e faifeautalai ma le aufaigaluega oe e te laina i le nofoaga e paka ai taavale, e te faatofa atu ai i lou aiga, feiloai ma faifeautalai o lo o vaaia oe, ona siaki loa lea i totonu. O faifeautalai e vaaia oe—o faifeautalai ia sa iai i le NAF mo ni nai vaiaso—ua fai ma ou taiala pe a e taunuu. Latou te faamautinoaina ua taunuu au ato i lou nofoaga a o e mauaina lau pine o iai lou suafa ma saili lou potuaoga.
“O tagata uma e ese le lelei. E le afaina pe iai latou o se vaega o lau itu po o soo se faifeautalai e te feiloai iai, e agaga tagata uma e fia fesoasoani ia te oe,” o le tala lea a Sister Hanks, o se tasi o faifeautalai e iva sa matou faatalanoaina i le NAF i Provo o lo o aoaoina le gagana Mandarin Saina. O faifeautalai mai lana itu o le a galulue i Taiwan, Kanata, ma Kalefonia, ISA.
Ua faapea mai Sister Prestwich, “O se mea matagofie lava lea, o le iloa ua e taunuu mai lava iinei ma ua amata ona e faia loa lenei mea ofoofogia ua e iloa ua manaomia ai oe e fai.”
O Lau Vasega Muamua
Pe a e ulufale i le NAF, e vave ona amataina le aoaoga. I lou aso muamua, o le a e ulufale atu i lou potuaoga ma amata le aoaoga ma le faataitaiga o le auala e aoao atu ai le talalelei.
Ua fai mai Sister Singleton, “Na matou savavali atu i lo matou potuaoga ma o tagata uma sa i lo matou sone sa tautatala faa Saina ma o o matou faiaoga sa tautatala i le faa Saina.”
Ua tau mai e Elder Adams, ”Na alu sina taimi, ae i le taimi lava na amata ona e iloa ai, o le auala sili e aoao ai, e vave le alualu i luma o lou aoaoina. O se lio o le alualu i luma lelei a o e aoao.”
O mataupu e aoaoina e tutusa lelei i NAF uma lava. I NAF laiti, e faatalanoaina oe, aoaoina oe, ma fesootai pea lava pea ma le peresitene o le NAF ma lona faletua. Afai e tuuina mai e uso o le Korama a Aposetolo e Toasefululua ni aoaoga faigalotu i le NAF i Provo, e faasalalau atu foi i isi NAF.
O Lau Paranesi Fou
I NAF tetele, e tofia faifeautalai i se paranesi ma se peresitene o le paranesi (o i latou e umia le Perisitua Mekisateko o le lotoifale e valaauina e auauna atu i le NAF). E feiloai latou ma la latou paranesi mo sauniga faamanatuga i Aso Sa. I NAF laiti, e feiloai faatasi faifeautalai i lalo o le taitaiga a le au peresitene o le NAF.
I NAF tetele, e tofia faifeautalai taitasi i se sone e aofia ai ni itu. O le faatulagaga lava lenei e tasi o le a mauaina e faifeautalai i le talaiga o le misiona. I le NAF, o itu e mafai ua na o le toalua o soa, pe mafai foi ona lima pe ono. O sone e mafai ona aofia ai ni itu se lua pe afa taseni. O le faatulagaga e fesoasoani i le aoaoga ma le aoaoina. O peresitene o le NAF ma peresitene o paranesi ma o latou faletua latou te tuuina atu foi fautuaga ma lagolagoina faifeautalai a o latou aoaoina le soifuaga faalefaifeautalai.
O Le Faasologa o au mea e fai i le Vaiaso.
E tofafa faifeautalai i potu faatasi ma o latou soa ma isi faifeautalai—e masani ona taitoafa i le potu. I aso taitasi, e iai taimi e faamalositino ai (vagana Aso Sa), taimi o fuafuaga, ma taimi mo taumafataga. O le tele o lo latou taimi e faaaluina i le potuaoga, e maua ai e i latou le aoaoga i aoaoga faavae o le talalelei, gagana (pe a manaomia), ma le auala e saili ai tagata ina ia aoaoina, le auala e aoao atu ai i le Agaga, ma le auala e fuafua ai o latou taimi. O le aoaoga o le tiute muamua lea o le NAF—ina ia faaleleia lou malamalama o le talalelei ma aoao le auala silisili e faasoa atu ai le savali o le talalelei i isi. O o outou faiaoga o faifeautalai ua maea a latou galuega o e ua silafia le auala e fesoasoani ai ia te oe e atiina ae tomai faafaifeautalai e te moomia. O le faasologa o mea e fai i aso taitasi e tele naua le manaomia ae faamanuiaina foi.
Ua fai mai Elder Jackson, ”Ae ou te le i oo atu iina, sa ou manatu atonu o le a faigata lenei mea, toeitiiti e faapea e matuia. Ae o se aafiaga fiafia lava. O le mea matagofie Ua matou maua le fiafia ma galulue malosi.”
E iai foi avanoa mo auaunaga ma se aso sauniuni mo faifeautalai. O le aso lea e fai ai a latou tagamea, faamama o latou potu, ma tusi atu i o latou aiga. O le taimi foi lenei e asiasi ai faifeautalai i le malumalu.
I Aso Sa e auai atu faifeautalai i sauniga lotu ma o latou uso faifeautalai. E mafai ona valaaulia i latou e lauga i sauniga faamanatuga ma aoao atu i fonotaga a le perisitua po o le Aualofa. E auai le auperisitua i le faamanuiaina, ma le tufatufaina o le faamanatuga. I fafo atu o sauniga masani a le Ekalesia, e auai foi faifeautalai i fonotaga faaleitu, fai faatalanoaga ma o latou auperesitene o le paranesi po o le NAF, matamata i faasalalauga faaleagafesootai a le Ekalesia, talanoaga ma soa, ma fai a latou suesuega patino. E tofi faifeautalai e auauna atu o ni taitai sone, taitai o itu, ma taitai tuafafine o aoaoga e fai foi a latou aoaoga faaletaitai i Aso Sa.
E ui ina faatulaga le tele o gaoioiga o aso taitasi mo faifeautalai, e iai foi ni o latou taimi e le faatulagaina. Ua faapea mai Sister Hanks e lagona e ia o lona tiute le faaalu aoga lelei o lona taimi: ”E te filifili pe faapefea ona e faaaoga lelei lou taimi. E faitalia lava oe i le auala e te faaaogaina ai le taimi o le Atua.”
O Lau Soa Muamua
O le fetuunaiga mo le olaga faafaifeautalai e ono avea ma luitau— lagonaina o le misia o le aiga, taumafaina o taumafa ese, ma le faigata o mea e aoaoina. O se punaoa silisili ona lelei o le lomiga a le Ekalesia Fetuunaiga mo le Olaga Faafaifeautalai, o lo o maua kopi lolomi, fesootaiga i luga o le laina i le LDS.org, ma i le Potutusi o le Talalelei (Gospel Library).
O se tasi o fetuunaiga sili ona tele i le olaga o se faifeautalai o le iai lea o se soa ma oe i taimi uma. Atonu e malaga mai o ia i se atunuu ese, tautala i se gagana ese, pe iai sona malamalama ese i le faataunuuina faatasi o galuega faafaifeautalai. E ao i faifeautalai ona aoao e lagona le fiafia e faaalu le tele o taimi ma se isi tagata. Ma e ao ona latou iloa pe faapefea ona aoao e le tasi le isi. Na manatua e Elder Juilfs, ”E iai la matou lesona e tasi e ese le faigata. E eseese o matou manatu ma e sa fefinauai o le tasi i le isi. Ae na matou aoaoina le taua o le aoao atu o se soa ma tuu atu manatu e faagasolo mai.”
E faapefea ona e faia lena ituaiga o fetuunaiga? I le alofa, loto maulalo, ma fesootaiga. E pei ona faamatala mai e Elder Lee, ”E iai iloiloga a soa e faaalu ai se taimi e iloilo ai le aso po o le vaiaso ina ia malamalama ai i lau soa, le auala na te faia ai mea, ma saunia oe lava ina ia fesoasoani iai ma mafai ai e oulua ona ola alualu i luma faatasi.”
A o e taumafai e auauna atu ma faaali le agalelei i lau soa, e te aoaoina ai foi le mana o le galulue faatasi. Na faapea mai Elder Shaw, ”E ao ona e faagalo itiiti ia te oe lava, ae taulai i le lua soa o se au. A mafai loa ona oulua maua lena galulue faatasi, e malosi naua, ma e matautia.”
Atonu E Te Ma’i Manatu
I le avea ai o se faifeautalai fou i le NAF, atonu o le a e feagai ma le faigata o le galuega ma le nofo mamao ese mai le aiga o se luitau. Ua fai mai Sister Saliva, ”O se mea masani le ma’i manatu i ni nai aso muamua. Ae e faasolo lava ina lelei aua o le a outou maua le fiafia o le tasi i le isi, ma e faamafanafana mai o tatou taitai ia i tatou. O le taulai i le suesuega e fesoasoani ia te au. Ou te misia pea lou aiga, ae tupito ia te au le faia o le galuega.”
E masani ona lagona le faigata, ma e masani ai foi ona lagona nisi o tulaga luga ma lalo o le galuega. Ua faapea mai Elder Juilfs, ”O le a e lagonaina ni maualuga tonu, ma e iai mafuaaga, i nisi o taimi e lagonaina ai le maualalo laitiiti. Ae e ao ona e laa i tua ma manatua: ”Ou te le o aoaoina nei mea mo au; o lo o ou aoaoina nei mea mo i latou o le a ou aoaoina. Ae afai lava o le a ou taumafai sili, o le a oo mai lava.”
Ae o loo iai le faatulagaga lagolago sili, e aofia ai faiaoga, taitai, ma lau soa. Ua faapea mai Sister Singleton, ”E iai se taimi sa ou le fiafia ai lava i se lesona, ma e faapea ona faaopoopo mai nisi mea. Ae sa ou talanoa i lau soa, ma sa ma o mo sina savaliga laitiiti. O lena na fesoasoani ia te au—o le talanoa ai, ma tagi laitiiti. O le taulai atu i le galuega ma le uiga lelei—e fesoasoani tele lena.”
O le a Alu Saunia
Po o le a lava lou tulaga patino, afai e te sau i le NAF ma le agaga tatala ma le naunautai e aoao, faatuatua i le Alii e tausia oe, o le fai le NAF ma nofoaga malosi o aoaoga mo lau auaunaga o se faifeautalai. O le a faamalosia lau molimau, o le a e iloa ona fesootai ma alofa i tagata e te aoaoina ma i latou tou te galulue faatasi, ma o le a e aoaoina le gagana o le Agaga. O le a faalauteleina lou malamalama i le talalelei ma aoao le auala silisili e aoao atu ai ma fetuunai i tulaga eseese ma luitau. A oo mai le taimi o le a e tuua ai mo lau misiona, o le a faateleina lou talitonuga ia te oe lava ma i le Alii.