E Te Le Iloa Mea E Te Le Iloa

Ao i ai i le kolisi, sa ou alu i le Malo o Peretania mo aoaoga. I lena taimi, sa ou tauivi moni lava ia lagona le latalata i le Tama Faalelagi. Sa ou auai i sauniga faamanatuga ma le lotu i Aso Sa, ma sa ou alu i faamanatuga a le Katoliko, ma se sauniga filemu, ma matagofie a le Kueka [Quaker]. Sa ou alu soo i PesegaoleAfiafi, o se sauniga matagofie o pesega a le Anglican. Sa ou sailia soo se nofoaga ou te lagona ai le filemu. Sa ou faitau i tusi tatalo i falesa ma talanoa i Talitonuga FaaAposetolo ma tagata o o latou talitonuga, i le tele o vaega, e taulalata i ou talitonuga. Ma sa ou toe maua ai le Atua.

Sa ou lagona le tele o le alofa ma le moni i na avanoa. O le savali na ou maua afai e alofa le Atua i Ana fanau uma na te tuuina mai ai le tele o upumoni ma le matagofie, e alofa foi ma silafia e Ia au.

O se tasi lenei o vaega o a tatou aoaoga faavae ou te fiafia lava i ai, e moni lava, na tuuina mai e le Atua i Lana fanau uma le upumoni ina ia latou maua le mea moni ma faasoa mai ia i tatou (tagai 2 Nifae 29:7-13). I la tatou ekalesia tatou te talanoa e uiga i le mauaina o le “atoatoaga o le talalelei.” Ae e le faapea ai la ua tatou iloaina mea uma, ma e le na o i tatou e i ai tali. Na matagofie le faaupuina e Elder Neal A. Maxwell (1926–2004) o le Korama a Aposetolo e Toasefululua: “O loo soifua [Iesu Keriso] i le aso, ma tuuina mai ma le alofa mutimutivale i malo uma le tele o le malamalama e mafai ona latou tauaveina atoa ai ma a latou lava avefeau e aoaoina i latou. (Tagai Alema 29:8.)”¹

Ma e le na o upumoni faalelotu e tuuina mai e le Atua i Ana fanau. E pei ona faamatala mai e Peresitene Russell M.Nelson, “Pe o le upumoni e alia’e mai se falesuesue faasaienitisi pe e auala mai i faaaliga, o upumoni uma lava e pogai mai le Atua. O upumoni uma o se vaega o le talalelei a Iesu Keriso.”²

Ua ou vaai i lena malamalama ma le upumoni i le tele o tusi ma tagata ma nofoaga—ao tilotilo atu i tusi i faatufugaga, asiasiga i faletapuai, faalogo i lauga mai saienitisi, volenitia ma tagata masalosalo. Sa ia i latou uma se upumoni na aoao mai ia te au—auala e sili ona taulimaina ai isi, ina ia agalelei atili i ou manatu; i nisi upu, sa latou aoao mai ia te au auala e mulimuli ai ia Iesu Keriso. Ae e ao ona ou i ai iina—e tusa pe ou te le masani ai—ma sa ao ona ou faalogo.

Pe e faatatau i mataupu faalelotu pe faapolokiki pe o sitaili o le olaga, e leotele lo tatou lalolagi, ma e osofaia pea i tatou i savali mai i tagata e le mautinoa pe sao i latou ma e le mafai foi ona talitonu i ai. O nisi o taimi o tatou o lena tagata. Na saunoa mai Elder Quentin L. Cook o le Korama Aposetolo e Toasefululua, “O le faateleina o le solofa ifo o fesootaiga faaaloalo ua avea foi ma se… popolega. O le mataupu faavae e faavavau o le faitalia e manaomia ai lo tatou faaaloalogia o filifiliga e tele tatou te le ioeina.”³

Ua tatou iloa sa i ai le popolega o le Faaola i lena foi mea. O se tasi o mea muamua sa Ia aoao atu ina ua Ia asiasi atu i Sa Nifae i le Tusi a Mamona e faapea “e le o [Lana] mataupu lea, le faaoso o loto o tagata i le ita.” E ao ona tatou taumamao ese mai nei mea. (Tagai 3 Nifae 11:29–30.)

A mafai ona tatou lagona moni se tagata ma taumafai e malamalama i le tulaga tonu o i ai, pe tau lava o le tatou faalogo, e aunoa ma le taumafai e sui le mafaufau o se tasi, ou te manatu o le a tatou maofa i mea e mafai ona tatou aoaoina. Atonu o le a tatou maua le tele o le agaalofa ma le faaaloalo mo o latou vaaiga po o manatu, ae ia le inoino ia i latou. Atonu tatou te aoaoina foi se upumoni fou e faaopoopo i lo tatou lava malamalamaaga. Po o le iloaina ua tatou faasoaina le upumoni e tasi. O le lotomaualalo o le ki—ma tautino atu e mafai ona tatou tutu e aoao mai i se isi tagata.

O loo i ai se faamatalaga o loo pipii i luga o lau kesi e faapea mai, “E te le iloa mea e te le iloa.” O loo i ai iina e faamanatu mai ia te au o tua atu o lo’u lava poto masani, ou te matua valea lava. Ina ia faalotomaualaloina ai a’u; ou te faamoemoe o loo aoga.

O loo i ai foi iina e faamanatu mai ia te au e aua le tumau ai i le valea—e ia te au se tiutetauave e aoao pea ma faalogo ma saili le upumoni, e tusa pe oo mai le upumoni i tulaga e le masani ai. E tele mea o i ai i le Tama Faalelagi e tuuina mai ia i tatou, pe afai tatou te faalogo.