Konafesi Aoao ia Oketopa 2018

O A’u Mea e Fai o le Konafesi

Ata

man walking down a dirt road

“Na fai mai se uo ia te a’u ao faitau i savali o le konafesi aoao, na te faia se lisi o mea na talosaga mai o tatou taitai o le Ekalesia ia tatou faia. Ona ia faaaoga lea o le lisi e seti ai ni sini lea o le a fesoasoani ia te ia e mulimuli ai i le latou fautuaga. Sa tonu ia te a’u e amata sa’u foi lisi. Na faia se eseesega mo a’u ao o’u manatunatu loloto i savali ma mafaufau po o le a se galuega e tatau ona ou faia. E matua fesoasoani lava ia te a’u e taulai atu ai i mea e sili ona taua.”

—Edna Washburn, Iuta, ISA

Tago e faataitai i ai!

O nisi nei o valaaulia na tatou faalogo i ai mai le konafesi aoao. Mafaufau e iloilo ia lauga e faaopoopo i lenei lisi o valaaulia.

“Mafaufau po o le a se mea e mafai ona tatou faia ia opomau ma taliaina atili ai, ma aoga i [ni uo fou], e amata atu i le Aso Sa a sau nei” (Ulisses Soares, “Tasi ia Keriso,” Liahona, Nov. 2018, 39).
“Faitau ma le maeaea lelei ma le mafaufau loloto i lenei faaaliga (e uiga i le faaaliga o le togiolaina o e ua maliliu, o loo maua i le Mataupu Faavae ma Feagaiga 138]” (M. Russell Ballard, “O Le Faaaliga o le Togiolaina o Ē ua Maliliu,” Liahona, Nov. 2018, 73).
“Toe foi atu i le maota o le Alii faatasi ai ma lou fatu ua manu’a ma igoa o lou aiga i le faatele e mafai ai” (Neil L. Andersen, “Manu’a,” Liahona, Nov. 2018, 85).

Tali i Fesili

Sa masani ona i ai sa’u molimau, ae talu ai nei lava ua fai lava si faigata ona talitonu o loo i ai le Atua iina. E mafai ona toe foi lo’u faatuatua i le malosi lea sa i ai muamua?

“Mo nisi, o le faatinoga o le talitonu e faigata. O nisi taimi e faalavelave ai lo tatou faamaualuga. Masalo tatou te mafaufau faapena ona ua tatou atamamai, aoaoina, pe ua i ai se potomasani, ua faigofie ai ona le talitonu i le Atua. Ma ua amata ai ona tatou tilotilo i tapuaiga o se tumasani faavalevalea.

“I lo’u aafiaga, o le talitonuga e le o se atavali faagaeetia tatou te matamata i ai ma faamemelo i ai ma tatou talanoaina ma faaaliali manatu i ai. E foliga o se palau tatou te ave i le fanua ma, e ala i le afu o o tatou mata, e galueaiina ai atulaina o palapala e toto ai fatu ma fua mai ai ni fua lelei.

“Faalatalata atu i le Atua, ona faalatalata mai lea o Ia ia te outou. O le folafolaga lenei ia i latou uma o ē saili ia talitonu.”

Elder Dieter F. Uchtdorf o le Korama a Aposetolo e Toasefululua, “Talitonu, Alofa, Faia,” Liahona, Nov. 2018, 47.

Tofu Loloto

Aveina o Lona Suafa

Ua faamanatu mai ia i tatou e Peresitene Russell M. Nelson e uiga i le taua o le aveina o le suafa o le Faaola i o tatou luga—i le avea ai ma ni soo o Keriso atoa ai ma ni tagata o Lana Ekalesia. “A tatou aveesea Lona suafa mai Lana Ekalesia, ua tatou aveesea o Ia o le taulaiga tutotonu o o tatou olaga e aunoa ma le manatu i ai,” na ia saunoa mai ai.

“O le aveina o le suafa o le Faaola i o tatou luga e aofia ai le tautino atu ma le molimau atu i isi—e ala i a tatou amioga ma a tatou upu—o Iesu o le Keriso.” (“O Le Igoa Sa’o o le Ekalesia,” Liahona, Nov. 2018, 88). E toatele isi taitai na valaauliaina foi i tatou ina ia mafaufau loloto pe mafai faapefea ona sili atu ona tatou tauaveina Lona suafa i o tatou luga.

Na valaauliaina i tatou e Peresitene Henry B. Eyring tatou te fesili ifo ia i tatou lava ni fesili se lua: “O le a le mea e tatau ona ou faia e ave ai i o’u luga Lona suafa?” ma le “E faapefea ona ou iloa pe o ou alualu i luma?” (“Taumafai,” Liahona, Nov. 2018, 91).
Na ofoina mai e Elder Robert C. Gay ni auala se tolu e mafai ona tatou aveina ai i o tatou luga le suafa o le Faaola (tagai “Ave i o Tatou Luga le Suafa o Iesu Keriso,” Liahona, Nov. 2018, 97–99).
Na aoao mai Elder Paul B. Pieper i le uiga o le aveina moni o le suafa o Iesu Keriso (tagai “E Tatau i Tagata Uma ona Ave i ō Latou luga le Suafa ua Tuuina Mai e le Tamā,” Liahona, Nov. 2018, 43–45).

Mafaufau e tusifaamaumau i lau apitalaaga ou manatu ma lagona ao suesue po o le a le uiga o le ave o le suafa o le Alii i o tatou luga.