1 I tru, olsem ia nao Lod i talem long yufala, ol wokman blong mi, long saed blong ^aparabol blong gudfala sid mo rabis gras:

2 Luk, i tru mi talem, garen hem i wol, mo ol aposol oli ol man blong planem sid ia;

3 Mo afta we oli go slip mo ded, bigfala enemi blong jos, man we i mekem apostasi, woman blong rod, we i ^aBabilon, we i mekem evri nesen oli dring long kap blong hem, we enemi i stap long hat blong olgeta, we i Setan, we i sidaon blong rul—luk, hem i planem ol rabis gras; taswe, ol rabis gras oli jokem gudfala sid mo fosem ^bjos i go long waelples.

4 Be luk, long ol ^alas dei, mo tu, naoia, taem Lod i stat blong tekem toktok i kam, mo niu sut blong sid i stap gro yet mo i yangfala yet—

5 Luk, i tru mi talem long yufala, ol ^aenjel oli stap plis long Lod dei mo naet, ol enjel ia we oli rere mo oli stap wet blong Lod i sendem olgeta blong katem daon mo ^bpikimap kaekae long ol garen;

6 Be Lod i talem long olgeta: no pulumaot ol rabis gras taem ol niu sut blong sid oli yangfala yet (from i tru, fet blong yufala i no strong), nogud bae yufala i prapa spolem gud gudfala sid tu.

7 From hemia, letem gudfala sid mo ol rabis gras oli gro tugeta kasem taem we kaekae i raep gud evriwan; afta, faswan bae yufala i tekemaot ol gudfala sid long ol rabis gras, mo afta we yufala i putum tugeta ol gudfala sid, luk mo luk gud, ol rabis gras oli fasfas long ol bandel, mo garen i stap blong oli bonem.

8 From hemia, olsem ia nao Lod i talem long yufala, we ^aprishud i bin gohed blong stap tru long laen blong ol papa blong yufala—

9 From we yufala i ^agat raet folem loa, mo folem laen blong yufala, mo God i bin ^bhaedem yufala long wol wetem felosip long Kraes, tru long God—

10 From hemia, laef blong yufala mo prishud blong yufala i bin stap, mo i nid blong i mas stap tru long yufala mo laen blong yufala kasem taem mi ^aputumbak evri samting we mi bin talem tru long maot blong evri tabu profet, stat long taem we wol i stat.

11 From hemia, yufala i gat blesing sapos yufala i gohed blong kasem gud fasin blong mi, olsem wan ^alaet long Ol Jentael, mo tru long prishud ia, wan sevya long pipol blong mi, ^bIsrel. Lod i bin talem samting ia. Amen.