Wetea Tamam
Ngkana I kabutimwakaai n toutou, Yu e iango, I kona n roko ni mweengau imwain ae makuakua te ran n te kawai.
“Kukurei, bwa N na kaiririko i nanon kawaim” (Reirei ao Berita aika Tabu 78:18).
Yu e otinako man ana reirei nakon te tabo n nakonako ae korakora te nakonako iai. E kaonaki ana iango n taekan te numera man ana kabanea ni kiraati. Aomata a kawaekoa ma aia kiaba. E korakora rangan te karau ni bwaka, ao a rotoroto te kawai.
Raoraon Yu, Lin, e otinako n tei irarikina. “Ko riai n tareboniia tamam bwa e na anaiko,” e taku Lin. “Mr. Zhang e taku bwa e iabubuti ni mwakoron kaawa tabeua.”
“I kona n roko ni mweengau ibon irou.”
“Ma an taraa te ran!” E taku Lin, ni kotea te ran are e raanga man te kai ni kawawa.
N te tai ae uarereke, Yu iai te namakin ae kamanga inanona. E bon koaua ana taeka Lin? Tao e riai n tareboniia Tamana bwa e na anaia n te kaa imwain ae makuakua te kawai. Ma ngaia ao Tamana a kauntaeka ngke e bong, ao Yu e bon un naba. E aki kan butiia Tamana bwa e na buokia.
Yu e kabwara tienin ana bwatika ao e kabo nakon Lin. Ngkana I kabutimwakaai n toutou, e iango, I kona n roko ni mweengau imwain ae makuakua te ran n te kawai.
E kabutimwaaka n toutou, ma n te tai ae waekoa a rotoroto baina ao a mwaitorotoro, ana kunnikai a roto, ao e a ikeike n tauti. Teuana riki, te iango n tareboniia Tamana e roko. Bon te namakin mairoun te Te Tamnei ae Raoiroi? Mitinare ake a bwabetitoia a taku bwa te Tamnei ae Raoiroi e kona n riki bwa te tia kairia. Yu e tararake n tara karawa. E bon rang n roo n te aro are e aki kona n noora taubukin te kateitei. Ma e teimatoa n un iroun Tamana.
Yu e katinanikua te namakin ao e reitinako n toutou. E a rikirake n iabuti te ran n te aro are taan bwaibwai n titoa a kaini aia titoa. Aomata a kamwaingi aia bwai nakon tabo aika rietata. Yu e noora te tina ae kookia natina aika uoman rinanon te raanga n ran inanon te booti ae te buraetitiki.
Ma te ran ae e a raka riki iaon nimomoin waena, Yu e a kan aki kona n toutou n ana bwatika. E ruo ao e kooka ana bwatika. Tao e a bon bae n rang n iremwe ngkai ni wetea Tamana, ao e teimatoa ni bwaro te karau. E rebwetau te baa ai te iti e itirua i etana. Yu e namakina te maaku. Ao e a rang ni kua! E tara mwain kawaina. E teimatoa n raroa mweengana. E riai n aki katinanikua te Tamnei ae Raoiroi ti ibukin te kauntaeka ae nanobaba.
Yu e tei ni karaoa ana tataro ae kimototo. E aki kona n ongo bwanana iaon te karau ao rebwen te ba, ma e ataia bwa Tamana are i Karawa e kona n ongo irouna.
“Tamara are i Karawa,” e tataro Yu. “Taiaoka buokai n okira mweengau ma te kamanoaki.” Ngke e moti, e namakinna bwa e tau korakorana ni waaki nako.
N tokina, Yu e a kona n noora ana auti iaon te maunga. Ni mariri, kua, ao e aki ata buan ana kau, e a kakaea kawaina ni waerake n te maunga. E noora Tamana n tataningaia i tinaniku. Tamana e ienikuri n ruo rikaaki nakoina, n tatauri n te ran ngke e biri.
Ngke e roko irouna tamana, e rabwatia i nanoan baina Yu. “I a bon rangi n raraoma!” E taku Tamana. “Ko riai ni kaman tareboniiai!”
“I taku bwa ti uaia n un imarenara,” e taku Yu.
“I aki kona n rang un ao ni buokiko,” e taku Tamana. Imwiina e ana ana bwatika Yu ao e kokokia n nikiran te kawai n tamwarakea te maunga.
E ngae ngke e rebwetau te baa rimarenan auti aika ririeta ao te karau e ngoonako, te namakin ae abue e kaona nanon Yu. E namakina te rau ao te kamanoaki ngke e rimwiin tamana nakon mweengana.