Te Kantaninga n Au Bwabetito
Imwain au bwabetito, I tekateka n tingai ao n tataro bwa ana kaoti raoraou.
Kamataata n te tamnei iroun Julia Yellow
Ngke te ataei ngai ae I maeka i tinanikun kaawan Taipei, Taiwan, I tuai man ataa taekaia mitinare. Ngaia are te moan n tai are I kaitibo ma ngaiia, e rangin n ingainga nanou ni kan ataa aia rongorongo. E aki ana te tai ae abwabwaki imwain ae I tangiria n ira aia reirei ao n irii tuua n te euangkerio ni maiu. I namakinna bwa aio te kawai ibukiu ni kakaea ngkana bon iai raoi te Atua.
Inanon te namwakaina, I a tia n reireinaki taekan te euangkerio ao tuua ake a reiakinaki imwain te bwabeto. E roko te rau nakoiu rinanon te tataro, I karekea au kaotioti man kamatebwaiakan booki aika tabu, ao I tua man aki ira te bootaki n Taromauri. I baireia bwa n na riai ni bwabetitoaki.
Te kabanea ni bubura ni kaangaanga ae n na mwakuriia n te tai anne bon kaangaanga ake a tia n riki ma tabeman raoraou bukina bwa a totokoa rekerekeu ma te Ekaretia. I tataro mwaaka iaon kaangaanga aikai, ma e rikirake n aki nakoraoi aron ara reitaki.
I kaoia raoraou nakon au bwabetito, ma a bon aki kan butimwaea au kakao. I aki ataa raoi te bwai ae n na karaoia. Imwain au bwabetito, I tekateka n ti ngai iaon te kaintekateka imatan mataroan te umwantabu, ao n tataro bwa ana kaoti raoraou bwa I aonga n tuangiia taekan te bitaki ae tamaroa ae I a tia ni karaoi inanon maiu ao ni kakoaua nakoia bwa I a tia ni karaoa te babaire ae eti bwa n na bwabetitoaki.
A bon kaoti raoraou, ma ngke I tataro mwaka nakon te Atua, I karekea te namakin. N te tai anne, I namakina te tangira ae korakora mai iroun Tamau are i Karawa. I ataia bwa E mena ikekei ao n tia ni kakauongo raoi nakon au tataro.
I tangiria ni bwabetitoaki n te moa n tai bon ti ibukin bwaai aika tamaroa aika riki ni maiu, ma n te tai anne, I moanna n ataa te kantaninga ibukin au bwabetito.
Te namakin ae I karekea bon ti tebo ma e taetae bwanaan te Uea ao ni kaineti nakoiu, ma n taku, “Ko aki kainnanoia ni kakoaua te bwai teuana nakon temanna. Ko ti kainnanoia ni kakoaua nakoiu bwa ko kukurei n nakomai nakoiu ao n tiku ni koaua nakon au euangkerio ni karokoa tokin maium.”