Tibwauaan te Euangkerio
Iroun Unimwaane Edward Dube
Man te Itingaun
“Reirei i Rou…ao e na reke i roumi iai motikan rawaia tamneimi” (Mataio 11:29).
Te mwaane ae I mwakuri irouna e anganai katoton ana Boki Moomon. Ma I aki warekia n te maan ae kaniia uoua te ririki. Te Tabati teuana, I ana ana Boki Moomon ao n otinako ni kawain te turein i tinanikun te kaawa n te tabo are I maeka iai i Zimbabwe. I tekateka ao ni moana warekana.
N te moan tai, e bon matoatoa bwa N na ota iai. Ma I manga wareka riki ana koaua Iotebwa Timiti kaua ao ni manga warekia riki. Ana taeka e riinga nanou.
Imwiina, temanna e kaoai nakon te taromauri. N te moan tai, I bon aki mweengaraoi, ngaia are I a tekateka n te rinan mai buki. Ma ngke a waaki n tibwa aia koaua aomata iaon te Tia Kamaiu Iesu Kristo ao Ana Boki Moomon, I namakina te bwai ae tamaroa inanou.
E aki maan imwiin aei, mitinare a roko n te tabo are I maeka iai. N te tai ae waekoa I a bwabetitoaki. Tabeua te ririki imwiina, I karekea te karineaki ni beku n te mition ao n tibwa te euangkerio ma tabeman aika a mwaiti.
Te Ekaretia e a tia n rikirake ana mwaiti i Zimbabwe. Ma e teimatoa ni mwaiti ae ti kona ni karaoia n tibwauaan te Euangkerio, n aki taraia bwa ti maeka ia. Rinanon tataro, kamatebwaian koroboki aika a tabu, ao kainutu n te tairiki, ko kona n rikirake n am koaua ao n tiku ni kaan nakon Tamara are i Karawa. Am koaua e kona ni kakabwaiai maiuia aomata aika a mwaiti n tabonako n te aonaaba.