E Na’o Tusiga Faatekinolosi: Talavou Matutua

Mo le Faatupuina o le Matagofie o le Lalolagi

Saunia e Annelise Gardiner

Mekasini a le Ekalesia

O le lalolagi o se meaalofa mo i tatou e olioli ai, ae e finagalo le Atua ia tatou tausia foi lenei foafoaga.

Ata

ata o lima o loo uuina le kelope

Na e vaavaai solo i le mamalu o le lalolagi talu ai nei? Pe na e matauina le leo o le matagi o taia ai laau, talisapaia le sasala o le manogi o fuga o laau o le vao, pe pulato’a atu ou mata i le atoatoa o ao lelea taitasi i le lagi?

Ua faia e le Tama Faalelagi ni foafoaga matagofie mo Ana fanau uma ina ia fiafia ai, ae o nisi taimi e faigofie ona galo o loo ia i tatou se matafaioi tausimea e tausia ai le matagofie o le lalolagi mo i tatou lava—ma mo isi tagata uma.

Ua tau mai e tusitusiga paia ia i tatou e faapea “o mea uma e maua mai i le eleele … ua faia mo le lelei ma le faaaogaina e le tagata” (Mataupu Faavae ma Feagaiga 59:18) ma ua poloai mai le Atua i tagata taitoatasi ina ia” faato’a [le lauelele], ma ia pule i … mea ola uma” (Mose 2:28). O le a tatou “tali, o se tausimea i luga o faamanuiaga faaletino” (Mataupu Faavae ma Feagaiga 104:13). Ma e masani lava ona tatou sii ae o tatou leo i se “viiga e vivii ai i le loto faafetai” “mo le manaia o le lalolagi.”¹

O Avea Ea i Tatou o ni Tausiamea Lelei o le Lalolagi?

O faapefea la ona tatou talisapaia ma tausia lenei lalolagi matagofie na foafoaina mo i tatou? O se tasi o auala o le mafaufau lea pe o le a faapefea ona aafia fanau uma a le Atua ona o a tatou filifiliga o i ai nei e uiga i le paneta, ae le na o i tatou lava.

O le mea sao lava, o filifiliga a o tatou tuaa ua aafia ai i tatou, pe tuusao pe le tuusao mai, mo le lelei atu po o le leaga foi. E mafai ona tatou fesili ifo ia i tatou lava pe o tatou tausia foafoaga a le Atua, po o agalelei atu i isi, e le o faama’umauina punaoa, ma lotofaafetai mo mea uma ua Ia tuuina mai ia i tatou. E mafai ona tatou mafaufau pe o tatou foafoaina se lalolagi e mafai ai e augatupulaga i le lumanai ona aoao ma ola ai i le talalelei—ma pe o tatou saunia le lalolagi mo le Afio Mai Faalua o Iesu Keriso.

I se konafesi ma le faalapotopotoga a le LDS Earth Stewardship (Tausimea o le Lalolagi a le AAG),² sa fesili ai Sister Sharon Eubank, Fesoasoani Muamua i le Au Peresitene Aoao o le Aualofa: “Pe a tatou faama’umau mea e matua manaomia lava e isi, o a ni mea e faalavelavea ai o tatou loto faaletino ma lo tatou lotogatasi? O se fesili faigata lenei mo tagata o loo ola i le mea ua tatou ta’ua o Atunuu Maumea o le lalolagi aua e toetoe lava a le mafai ona tatou faama’umauina ni mea. Peitai o lo tatou Alii ma le Atua, o le Foafoa, e le faama’umauina se mea; e leai se tulaga faama’umau i Ona ala. Pe a tatou faama’umau mea e matua manaomia lava e isi tagata, o le a le mea o loo fai e lena mea i le ie o loo fefalōa’i i le va o i tatou o ni tagata soifua? “³

Auala e Tausia Lelei ai le Lalolagi

O le a se mea e mafai ona tatou faia e tausia ai le lalolagi ma lē faama’umauina ai ana punaoa taua? E mafai faapefea ona tatou fesoasoani e faatumauina ma faasaoina le matagofie o le lalolagi? O nai manatu nei e faaosofia ai lagona:

Manatua le Foafoa. E faigofie lava ona vaaia le matagofie ma le mana i le natura, ae o nisi taimi e mafai ona galo ia i tatou le mea e oo mai ai lena matagofie. Aua le tapuai i le foafoaga ae i le Foafoa. Ua molimau mai le lalolagi, o loo i ai se Foafoa Silisiliese (tagai Alema 30:44).
Ola lagom. I le faaSuetena, o le upu lagom o lona uiga o le “lava” po o le “fetaui lelei le aofaiga.” Afai tatou te faaaogaina ma le faautauta mea uma tatou te faaaogaina—meaai, lavalava, oloa—e mafai ona tatou aloese mai le faama’umauina o punaoa taua. O le Lagom o lona uiga o le mauaina o se paleni o le le tele naua ae e le o laitiiti tele foi.
Aoao e uiga i lou siosiomaga. Saili po o a meaola ma laau e masani ona i ai i le mea o loo e nofo ai. Aoao o latou igoa ma mea moni e uiga ia i latou (mo se faataitaiga, “e le manaomia e nei laau le tele o le vai”; “o manu nei o le po”). O le aoao e uiga i lou siosiomaga e suia ai le ala e te fesootai lelei atu i ai.
Ola i le Upu o le Poto. E faigofie lava ona iloa le sootaga i le va o le lalolagi ma mea tatou te aai ai. E mafai ona tatou fesoasoani e tausia ia foafoaga a le Atua e ala i le ola ai i le Upu o le Poto—o lenei mea e aofia ai fualaau aina ma saito, ae ia “itiiti” le faaaoga o aano o manu fasi ma ia lotofaafetai (tagai Mataupu Faavae ma Feagaiga 89).
Iloilo au faatinoga. O faapefea ona aafia lou siosiomaga i au faatinoga? O lou siosiomaga e aofia ai le natura, avanoa, ma tagata o loo siomia oe. O le tagai lelei i ou aafiaga i le lalolagi o le a fesoasoani e te maua ai faamatalaga e te manaomia e maua ai musumusuga mai le Tama Faalelagi i mea e mafai ona e faia e tausia ai le lalolagi.

Na foafoaina e le Atua le lalolagi mo i tatou ma fesoasoani e faamalie ai lo tatou manao, o lea e ala i le tausia o le lalolagi, ua tatou fesoasoani foi e tausia Ana fanau ma Ana foafoaga uma. Na saunoa Peresitene Russell M. Nelson e faapea: “I le avea ai ma e mauaina le Foafoaga paia, o le a se mea tatou te faia? E tatau ona tatou tausia le lalolagi, ia avea ma ni tausimea atamamai, ma faasaoina mo tupulaga o le lumanai. Ma e tatau ona tatou alolofa ma fetausiai le tasi ma le isi.”⁴ A o tatou usitaia lenei fautuaga ma faia la tatou vaega e fesoasoani e tausia le lalolagi, o le a amata ona tatou talisapaia atili ma sili atu “mauga ma vanu, ma laau ma fugalaau” taitasi.⁵ O a tatou taumafaiga o le a aoga mo i tatou lava, mo tupulaga i le lumanai, ma mo le matagofie faifai pea o le lalolagi.