Taitaiina e le Alii

Ata

man and woman working together in kitchen

Ata na pueina e Cody Bell

Giselle

Ae ma te lei faaipoipo, sa galue Andre i lana PhD ma maua se avanoa e galue ai i le Iunivesite o Michigan. Sa ma faaipoipo ma siitia atu i Michigan. Mulimuli ane, na amata ona i ai ni faafitauli i le galuega ma manao ai Andre e sui le galuega.

Na ma laiti tele, faatoa uma lava ona ma faaipoipo, ma ua leiloa le mea e fai. Sa ma filifili e tatalo e uiga i ai.

Andre

I se tasi aso, sa ou alu ai i le iunivesite ma vaaia ai se laupapa lea na faapipii ai ni avanoa mo galuega. Sa ou tusi talosaga i ni galuega eseese se tolu. I totonu o le vaiaso, sa ofoina mai ai ia te au galuega uma e tolu.

Giselle

Sa ma mafaufau po o le a le mea e fai. Na ma toe tatalo foi. O se tasi o galuega e i Egelani, ae sa ma mananao e nonofo i le Iunaite Setete. O le tasi sa i ai i Texas, ma o le isi galuega sa i Maryland e latalata i Uosigitone, D.C. O le galuega i le Maryland sa i ai ma le NASA. O Andre o se saienitisi, o lea na foliga mai ai le NASA o se nofoaga lelei e o ai.

Andre

I lo matou siitia atu i Maryland, sa ou aveina le taavale a o moe Giselle. O le taeao po lava ae ou vaaia le malumalu o Uosigitone D.C.

“Ala i luga! Ala i luga! O mafai ona e iloa atu?” Sa ou fai atu ai ia Giselle. “E pei lava o se maota tautupu!”

Giselle

Sa ou tau atu ia Andre atonu e mafai ona ma o e asiasi i ai i se aso. Ma te lei iloaina lava poo le a lena mea. I ni nai aso talu ona taunuu i Maryland, sa ou alu ai i le faletusi e faaaoga le initoneti e talosaga ai mo ni galuega ma siaki ai lau imeli.

Sa faalogo se tamaitai sa galue iina i la’u tautala ma fesili po o fea ou te sau ai. Sa ou fai atu i ai ou te sau mai Pasila ma amata loa ona ma talanoa. O lona igoa o Edna. Sa ou tau atu i ai faatoa ma siitia ese mai Michigan ma ta’u le mea sa ma nonofo ai.

“Ou te nofo i le fale totogi lava lena e tasi,” o le tala lea a Edna.

Ina ua ou toe alu atu i le faletusi i le aso na sosoo ai, sa fai mai Edna, “Ua ou fiafia lava ua e toe sau. Ou te fia valaaulia oe ma lau tane i lo’u fale mo le taumafataga o le afiafi.”

Sa ou manatu o se mea uiga ese lena aua na te lei iloaina au. Ona ia fai mai lea, “Sa ou tatalo e uiga ia oe ona sa ou lagonaina se mea faapitoa lava ina ua ou feiloai atu ia oe ananafi.”

Na ma o i lona fale ma iloa ai e lei leva ona maliu lona toalua. Ina ua uma le aiga o le afiafi, sa ia taina le, “Faaola e, Ia Ou Alofa” (Viiga, nu. 150) i luga o le piano. Sa ia fai mai o le viiga lea e fiafia lava i ai lana tane ma sa taina i lona falelauasiga. Ona ia talanoa mai lea ia i maua e uiga i le ata o le faaolataga ma valaaulia i maua e o ma ia i le lotu.

Sa ma o i le lotu, ma sa agalelei tagata iina. Na tonu ia i maua e o i le Aso Sa na sosoo ai. Sa ma malilie e faia lesona a faifeautalai. Na ofo mai Edna e fai ia lesona i lona fale. Mo le lima masina na ma o ai i le lotu i Aso Sa taitasi. O o ma loto ma agaga na saunia mo le papatisoga.

Andre

Ina ua fofogaina lo ma papatisoga, na foliga faateia tagata uma. “Oka, e le o oulua o ni tagata o le Ekalesia?” na latou fai mai ai. “Ae e te i ai iinei i vaiaso uma!” Sa faapitoa lava lo ma papatisoga. Na toe toe lava o tagata uma o le uarota sa auai.

I le tasi tausaga mulimuli ane sa faamauina ai i maua i le malumalu o Uosigitone D.C. Ina ua ma o atu i le malumalu, na ma iloaina ai o le maota tautupu lea na ma vaaia i le silia ma le tausaga talu ai!

Giselle

Ina ua uma ona faamauina i maua i le malumalu, sa faigata le tele o mea.

Ina ua maea le aso 11 o Setema, 2001, sa faigata ia i maua ona toe faafou a ma visa. Sa ou faanoanoa aua sa faatoa uma lava ona ou faauu mai se kolisi faaalalafaga ma talosagaina se sikolasipi atoatoa i le Iunivesite o Maryland. Ou te lei mauaina se sikolasipi, ma sa tapunia le potusuesue na faigaluega ai Andre.

Na ma manatu atonu ua oo mai le taimi ma te toe foi atu ai i Pasila.

Andre

Sa fai mai lo ma epikopo e mafai ona ma fesoasoani i le toatele o tagata o le lotu i Pasila ma tuputupu ae i auala ma te ono le mauaina i le Iunaite Setete. Na ia fautuaina i maua ina ia faalatalata i le Ekalesia.

“O atu i Pasila ma auauna atu i le Alii,” na ia fai mai ai.

Ina ua mavae sina taimi sa nonofo ai i Pasila, na sau lo matou peresitene o le siteki i lo ma fale ma valaauina au e avea ma se epikopo. Sa ou iloa lava o le a valaauina au. I ni nai po a o lei valaauina au, sa le mafai ona ou moe. Sa ou mafaufau ma suesue.

Giselle

Sa ou mafaufau po o le a se mea o tupu. Sa ou vaai i ni suiga ia te ia a o lei valaauina o ia.

Andre

Ina ua amata lou valaauga, sa 80 tagata toaaga o la matou uarota. Ina ua faamaloloina au, ua toatele atu tagata na auai e le aunoa i le lotu, ma e toa 12 faifeautalai na o i le misiona mai le matou uarota. Sa maoae!

I le vaitaimi na faamalolo ai au, sa faamalolo ai Peresitene Dieter F. Uchtdorf mai le Au Peresitene Sili. Ou te manatua le saunoaga a Russell M. Nelson na ia faapea mai ai sa i ai ia Peresitene Uchtdorf ni tiutetauave taua fou i le Korama a Aposetolo e Toasefululua.

I le tolu masina mulimuli ane, sa valaauina au o se fesoasoani muamua i le au peresitene o le misiona. Ou te lei auauna atu i se misiona, ae ou te fiafia i lou valaauga. Ou te fiafia e galulue ma faifeautalai. E silafia au e le Alii. Sa Ia silafia e tatau ona faamaloloina au o se epikopo ina ia mafai ai ona ou auauna atu i le taimi ma le nofoaga e tatau ai mo au i le taimi nei.