O le Mea na Aoao mai e le Lē Mafai ona Fanauina ni Fanau e Uiga i le Uluola ma ia Tumu ai le Lalolagi

Ata

young woman smelling flowers

I le amataga na foafoaina e le Atua le alii ma le tamaitai ma tuuina atu ia i laua se poloaiga: “Ia fanafanau ia, ma ia uluola, ma ia tumu ai le lalolagi” (Kenese 1:28; Mose 2:28). Ua fa ma le afa tausaga talu ona ma faaipoipo ma lou toalua, ae ma te lei maua lava se fanau. Atonu o loo i ai i latou o loo faitauina o le a tali mai (ma sa ou faalogo muamua i ai):

“Oi, ae o lena lava e te talavou!”

“Tau lava o le fiafia i lenei taimi e aunoa ma ni fanau!”

“Ia faaaoga le avanoa o le saolotoga a o maua!”

Sa ou aoao e aua nei ou ita ma tau lava o le faapasi o manatu faaalia ona ou te iloa o i latou o loo talanoa mai e le o mafaufau e faatigā. Ua ou iloa o loo i ai ni tagata ua leva atu ona faaipoipo e le’i maua lava ni fanau. Ae peitai, ou te iloa e ui lava sa na o le fa tausaga, e le faapea lava sa faigofie.

E i ai taimi e faigofie ai. Mo le lua tausaga ua mavae, sa ma nonofo ai ma lo’u toalua i Europa, ma malaga i nofoaga ma te lei mafaufauina lava o le a ma oo i ai. Sa ma aai i ni meaai mananaia. Ma ua ma feiloai i le tele o uo mai le salafa o le kelope o e ua faalauteleina o ma manatu faaalia, manatu, ma vaaiga o le lalolagi. I le tele o auala, e matua valea lava lou le loto faafetai mo lenei taimi. Ua faamalosia le ma mafutaga ma lo’u toalua, ua tele mea ua ou aoaoina, ma ua tele ni aafiaga ofoofogia.

Ae e tele foi po ma te faaaluina i luga o le nofoa e matamata ata tifaga. Ua ma fatuina ni manatuaga lea o le a le avea ma se vaega o a ma fanau i le lumanai. O le matou uarota e na o le tasi le ulugalii talavou e leai ni fanau, ma—lapataiga osovale (spoiler alert)—o ma’ua. Ma e foliga mai e tusa lava po o a aafiaga ma te oo i ai, o le mafaufau i tamaiti e i ai pea iina.

I taimi o o’u faafitauli, e masani ai lava ona ou manatunatu ai i le poloaiga na tuuina atu ia Atamu ma Eva. Ma te talitonu o loo tumau pea lenei poloaiga ua faamalosia ma faatumauina i le asō¹ ma ua faamoemoeina i tatou e mulimuli i ai. Ae peitai, sa lei mafai ona ma faia ma lo’u toalua. Ae sa le mafai foi e Atamu ma Eva, i le taimi muamua. O lea la le mea na la faia? Na pau lava le mea na la iloaina—o le taulimaina o le faatoaga. E ui ou te le nofo i le faatoaga o Etena, ae ou te nofo i le faatoaga o le eleele, le faatoaga o Netherlands, le faatoaga a lo’u aiga, ma le faatoaga o la’u uarota. O a’u togalaau nei ua poloaiina ai au e le Alii ia ou uluola ma faatumuina. O upu nei sa avea ma taulaiga o o’u mafaufauga loloto. Ua fesoasoani nei upu ia te au e toe faatulaga lo’u olaga e auauna atu i isi ma le Alii. E masani ona ou mafaufau e uiga i:

• E mafai faapefea ona ou faateleina meaalofa ua tuuina mai e le Alii ia te au ma isi?

• E mafai faapefea ona ou faateleina le faaali atu o le alofa i fanau a le Atua?

• E mafai faapefea ona ou faateleina lo’u taimi ma taumafaiga e auauna atu ai i isi?

• E mafai faapefea ona ou faatumuina lau lava vaieli faaleagaga?

• E mafai faapefea ona ou faatumuina mea ua toese a isi, pe faaletino pe faaleagaga?

• E mafai faapefea ona ou faatumuina le faamoemoe ma le faatuatua e foliga mai ua toesea mo le toatele i le lalolagi?

A o ou taulai atili atu i nei fesili, sa faamanuiaina au i avanoa e tali atu ai i ni auala mamana. Sa ou maua le avanoa e auauna atu ai i le faalapotopotoga a Tamaitai Talavou. Sa mafai ona ou faia fetuunaiga e taofi poo le a lava le mea o loo ou faia ma fesoasoani i se tasi o tapena pe tausia fanau a latou uo. Ua mafai ona ou aoao atu tala faatino i tamaiti mai le salafa o le lalolagi. Ua tele atu taimi na ou faaaluina e suesue ai le talalelei. Ua mafai ona sili atu ona ou tauaveina avega a isi ma faamafanafana atu ia te i latou o e e manaomia le faamafanafanaga. Ma le mea e sili ona taua, ua ou mauaina se malamalama sili atu, molimau, ma le malamalama faaleagaga o le talalelei ma le fuafuaga a le Atua mo au.

Ou te le o fai atu o le poloaiga ia “uluola ma tumu ai” e le o lona uiga o le i ai o ni fanau. Ua tatou i ai iinei e faatutu mai ni aiga i le amiotonu, ma e aofia ai le i ai o ni fanau, pe a mafai. Ae a o faatalitali mo le faamanuiaina i ni tamaiti, e mafai lava ona ma faataunuuina lena poloaiga e ala i le tausia lelei o faatoaga o siomia ai i ma’ua. A ou faanoanoa, le fiafia, lototiga, lotovale, ita, pe fefe ona o lo’u le mafai ona fanauina ni fanau, ou te taumafai lava e fesili ifo ia te au lava: o le a la’u mea o fai e tausi ai a’u faatoaga? Ma e faia ai se eseesega tele.