“Ou Te Fia Alu i le Parataiso”
Ina ua ou tatalo ma ole atu i le Atua e uiga i lenei ala fou, sa ou lagona le faatalitonuina o au i le upumoni na ou mauaina.
Ata mai le Getty Images, faatinoina e tagata e faataitaia
Sa avea au ma se tagata lotu tuuto atu o se isi ekalesia, ae na amata ona ou suesue i ona aoaoga e uiga i le falepuipui. O lenei manatu ua aoao ai e faapea o le agaga, pe a mavae le oti faaletino, ona ulu atu lea i se nofoaga e pei o le falepuipui, lea e tatau ona faamamaina ai a o lei alu i le parataiso.
A o ou mafaufau i le mafatia o agaga i le falepuipui, sa ou toe mafaufau ai i lou lava lumanai faaleagaga ma le ma mafutaga ma Iesu Keriso. Sa amata ona ou tatalo, “O le a se mea e tatau ona ou faia e aloese ai mai le falepuipui? Ou te fia alu i le parataiso.”
O le mea muamua lava na oo mai i lou mafaufau o le ola lea i Tulafono e Sefulu. Sa ou lagonaina afai ou te faia, o le a faatagaina au e le alofa tunoa o le Alii ina ia aloese mai le falepuipui. Sa ou tuuto atu e tausi poloaiga ma amata se vaitaimi malosi o le anapogi, tatalo, suesue i tusitusiga paia, ma manatunatu loloto.
I lena taimi, sa uunaia au e fai atu se fesili e le masani ai i se fomai i le falemai lea sa ou galue ai o se suetusi sili.
“Dr. Thibaut,” na ou fai atu ai, “e i ai le Alii o Iesu Keriso i la outou lotu?”
Sa ia fai mai o ia e auai i Le Ekalesia a Iesu Keriso o le Au Paia o Aso e Gata Ai. Mai lena taimi, sa taialaina e le Agaga la ma talanoaga. Sa ou fesili atu ia te ia e uiga i le eseesega o a ma ekalesia. Na ia tau mai ia te au e uiga i le Tusi a Mamona. A o faaauau la matou talanoaga, na faatumulia lou loto i le olioli. Sa ou lagonaina sa ou mauaina ni tali o au tatalo.
I le lua aso mulimuli ane na tuu mai ai e faifeautalai ia te au se Tusi a Mamona, lea sa matou faitauina ma suesueina faatasi. Sa ou iloaina le matagofie o le aoaoina o ni mea fou mai tusitusiga paia. Na amata ona ou usitai i le Upu o le Poto.
Ina ua ou iloaina ua leai sou fiafia i lau lotu, lea sa ou aafia loloto ai, sa ou mafaufau ai po o le a le mea ua tupu. Sa ou tatalo ma ole atu i le Atua e uiga i lenei olaga fou. Ina ua ou faia, sa ou lagona le sili atu ona faatalitonuina i le upumoni na ou mauaina. Sa ou filifili e auai i le Ekalesia, e ui lava sa ou iloa o le a ou feagai ma sauaga.
Na oo mai sauaga, ae na faamalosia au e le Alii. Ou te iloa o Le Ekalesia a Iesu Keriso o le Au Paia o Aso e Gata Ai o le tali lea i lau tatalo faamaoni: “Ou te fia alu i le parataiso.” Ou te iloa e mafai ona ou alu iina pe a mavae lo’u oti, pe afai ou te tumau faamaoni i poloaiga a le Atua.