Aoaoga Autu o le Talalelei
Na Fetalai mai Iesu Keriso ia Tatou Talia le Faamanatuga
E faamamaina ma faamaloloina i tatou pe a tatou manatuaina lo tatou Faaola i vaiaso taitasi.
O le Talisuaga Mulimuli, saunia e Carl Heinrich Bloch; ata o se tamaitai talavou o loo tatalo na saunia e Angela Suitter; Tatalo i Ketesemane, saunia e Del Parson; Ina Ia Outou Manatua Pea Au, saunia e Gary L. Kapp, e le mafai ona kopiina
A o lei maliu o Ia, na talisua Iesu Keriso i se talisuaga mulimuli na taua o le Talisuaga Mulimuli. I le faaiuga o lenei talisuaga, sa Ia faailoa atu ai le faamanatuga i Ona soo. Sa Ia tofitofi le areto ma faamanuiaina. “Tou te faia le mea nei e fai ma faamanatuga ia te au,” na Ia fetalai ai (Luka 22:19). Ona Ia faamanuia lea ma faasoa atu se ipu uaina.
O Se Vaega o le Tapuaiga Faalevaiaso
Ina ua toefuatai mai le Ekalesia a Iesu Keriso i le lalolagi, na avea le faamanatuga ma se vaega o tapuaiga i vaiaso taitasi. I le taimi o sauniga, e faamanuia ma tufatufaina atu le faamanatuga e i latou o e umia le perisitua. Latou te tatalo e faaaoga ai upu mai tusitusiga paia (tagai Mataupu Faavae ma Feagaiga 20:75–79). Ona talisua lea o tagata taitasi o le faapotopotoga i le areto ma inu le vai e manatua ai Iesu Keriso ma Lana taulaga mo i tatou, i le auala na Ia fetalai mai ai ia i tatou.
Saunia e Talia
Ina ia saunia e talia le faamanatuga, e tatau ona tatou mafaufau ma le faamaoni i o tatou olaga ma filifiliga. E tatau ona tatou salamo i mea sese ma agasala o le vaiaso ua tuanai, e aofia ai le ole atu i le Atua mo se faamagaloga. E le manaomia ona tatou atoatoa e talia ai le faamanatuga, ae e tatau ona faamaualalo o tatou loto.
E Sili Atu Nai Lo le Areto ma le Vai
O le tagofia o le faamanatuga o se taimi taua, ma le paia. O tatalo o le faamanatuga e faamanatu mai ai ia i tatou, a o tatou tagofia le areto ma le vai, ua tatou manatuaina le tino ma le toto na tuuina mai e Iesu Keriso mo i tatou. Tatou te folafola atu e mulimuli ia te Ia ma ola i se olaga Kerisiano. Tatou te folafola atu e taumafai e tausi poloaiga a le Atua. O le taui, o le a faamafanafanaina, taitaia, ma faamaloloina i tatou e le Agaga Paia.
Faafouina o Feagaiga
Pe a tagofia e i tatou o e ua papatisoina le faamanatuga ma se loto mama, tatou te faafouina le feagaiga na tatou osia i le papatisoga. E aofia ai le mauaina o le Agaga Paia ma le faamamaina mai agasala e pei ua tatou toe papatisoina. O le faamoemoe ma le alofa mutimutivale lea ua ofoina mai e Iesu ia i tatou taitoatasi. E le o tuai lava ona salamo ma faamagaloina.
O le A le Mea o loo Aoao mai e Tusitusiga Paia e uiga i le Faamanatuga?
E tatau ona tatou suesueina i tatou lava faaleagaga, vaai ma le faamaoni i totonu, a o lei tagofia le faamanatuga (tagai 1 Korinito 11:28).
Ina ua mavae Lona Toetu mai, sa faaali atu e Iesu i Lona nuu i Amerika le ala e tagofia ai le faamanatuga (tagai i le 3 Nifae 18).
Ua tau mai e perofeta o aso nei ia i tatou e faaaoga le areto ma le vai mo le faamanatuga, ae o mea tatou te aai ma feinu ai e le afaina lea (tagai Mataupu Faavae ma Feagaiga 27:2). O nisi taimi e manaomia ai e i latou e afaina gofie (allergies) ona faaaoga se isi mea e pei o se falaoa.